قازىرگى تاڭدا برازيليانىڭ ەكونوميكالىق دامۋ قارقىنى ايتارلىقتاي دەۋگە بولادى. سوڭعى ءمالىمەتتەرگە قاراعاندا, اتالعان ەلدىڭ ىشكى جالپى ءونىمى دۇنيە ءجۇزى بويىنشا التىنشى ورىنعا كوتەرىلدى. ءسويتىپ, برازيليا وسىعان دەيىن سول ورىندا تۇرعان انگليانى جەتىنشى ورىنعا ىعىستىردى.
قازىر ءىجو بويىنشا اقش-تىڭ وزگە مەملەكەتتەردەن وق بويى وزىق تۇرعانى بەلگىلى. وسىدان شامالى ۋاقىت بۇرىن ەكىنشى ورىندا تۇرعان جاپونيانى قىتاي باسىپ وزعانى ءمالىم. ال ءتورتىنشى جانە بەسىنشى ورىنداردا تيىسىنشە گەرمانيا مەن فرانتسيا ورنالاسقان. رەسەي – توعىزىنشى, ءۇندىستان ونىنشى ورىندا. تاياۋ بولاشاقتا رەسەي ءۇشىنشى, ءۇندىستان بەسىنشى ورىنعا شىعادى دەگەن بولجام بار.
تاليبتەرمەن بەيبىت كەلىسسوزگە كەلىستى
اۋعانستان پرەزيدەنتى حاميد كارزاي تاليبتارمەن بەيبىت كەلىسسوز ءجۇرگىزۋگە كەلىسىمىن بەرىپ, ولارعا كاتاردا وزدەرىنىڭ وكىلدىكتەرىن اشۋعا رۇحسات ەتتى. بۇل تۋرالى ول كەشە جاساعان ءۇندەۋىندە جاريالادى. كارزايدىڭ سوزىنە قاراعاندا, ەگەر اقش اسكەري توپپەن بايلانىس ورناتۋدى قاجەت دەپ تاپسا, وندا كابۋل بۇل قادامعا دا بارادى. بۇعان دەيىن اۋعانستان تاليبتەر كاتاردا ءوز ەلىنىڭ اتىنان وكىلدىك اشۋدى جوسپارلاپ وتىرعانىن بىلگەن سوڭ, سول ەلدەگى ەلشىسىن كەرى شاقىرىپ العان ەدى. ەندى كابۋل بەيبىت كەلىسسوزگە شەت مەملەكەتتەر ارالاسپايتىن بولسا, وكىلدىك اشۋعا كەدەرگى جاسامايتىنىن قۋاتتاپ وتىر.كيم چەن ير اكەسىنىڭ جانىنا قويىلدى
كحدر استاناسى – پحەنيان قالاسىندا 17 جەلتوقساندا كوز جۇمعان ەل كوسەمى كيم چەن يرمەن 3 ساعاتتىق قوشتاسۋ ءراسىمى اياقتالدى. ءراسىم قالىڭ جاۋعان قارعا بايلانىستى 4 ساعات كەيىن وتكىزىلدى. قوشتاسۋعا كوز جاستارىن كول ەتكەن ءجۇز مىڭداعان ادام قاتىستى. قارالى راسىمدە كيم چەن ءيردىڭ « ۇلى مۇراگەرى» – كىشى ۇلى كيم چەن ىن مەن كۇيەۋ بالاسى چان سون تحەكتىڭ بولعانى ايتپاسا دا تۇسىنىكتى. ءسوز جۇزىندە ەندى ەلگە بيلىكتى كيم چەن ىن جۇرگىزەدى دەلىنگەنىمەن, ءىس جۇزىندە بيلىك چان سون تحەكتىڭ تىكەلەي قاتىسۋىمەن جۇزەگە اسىرىلاتىن بولادى. ال كيم چەن ءيردىڭ بالزامدالعان ءمايىتى ماۆزولەيدە جاتقان اكەسى كيم ير سەننىڭ قاسىنا قويىلدى.ەۋروكوميسسيانىڭ ەسەبىنە كۇمان بار
ەۋروپارلامەنت ەۋروكوميسسياعا سەربيانى ەو قۇرامىنا تەزىرەك قابىلداتۋ ءۇشىن ەلدە بۇعان دەيىن ورىن العان سوت قۇقىعىنا قاتىستى فاكتىلەر تۋرالى ۇندەمەستىك تانىتتى دەگەن كۇدىك ءبىلدىردى. ءسوز ورايىندا ايتا كەتسەك, ەۋروكوميسسيا ۇستىمىزدەگى جىلدىڭ شىلدەسىندە بەلگرادقا سەربياداعى سوت جۇيەسىنە باعا بەرۋ ءۇشىن ساراپشىلار توبىن جىبەرگەن ەدى. «جاسىلدار» پارتياسىنان ەۋرودەپۋتات فرانتسيسكا برانتنەر ەۋروكوميسسارلاردان سەربياداعى جاعداي تۋرالى رەسمي ەسەپ ساراپشىلار دەرەكتەرىمەن سالىستىرعاندا نە سەبەپتى جۇمسارتىلعانىن ءتۇسىندىرۋدى تالاپ ەتتى. ەۋرودەپۋتاتتىڭ سوزىنە قاراعاندا, ەسەپتىڭ شىندىققا سايكەستىگى سەربيانى ەو-عا قابىلداۋ تۋرالى شەشىم شىعارۋدا ماڭىزدى ءرول اتقاراتىن بولادى.جەڭىلسەك جەر كوتەرەدى قاعيداتىمەن
رەسەيدىڭ ورتالىق سايلاۋ كوميسسياسى كەشە رلدپ-نىڭ سەركەسى ۆلاديمير جيرينوۆسكي مەن رفكپ-نىڭ باسشىسى گەننادي زيۋگانوۆتى رەسەي پرەزيدەنتتىگىنەن ۇمىتكەرلەر رەتىندە ءتىركەدى. ءسويتىپ, رەسەي باسشىسى بولعىسى كەلەتىندەر سانى ازىرشە تورتەۋگە جەتىپ وتىر. ۆ.جيرينوۆسكي پرەزيدەنتتىك دوداعا بەسىنشى مارتە ءتۇسىپ وتىر. 1991 جانە 2008 جىلدارى ول سايلاۋ ناتيجەلەرى بويىنشا ءۇشىنشى ورىنعا تۇراقتاسا, 1996 جانە 2000 جىلدارى بەسىنشى ورىندى قاناعات تۇتقان ەدى. گ.زيۋگانوۆ ءۇش مارتە باعىن سىناپ كورسە (1996, 2000 جانە 2008 جىلدار), اركەز مارەگە ەكىنشى كەلىپ وتىرىپتى. ال وسك قۇجاتتارىن قابىلداعاندار قاتارىندا «يابلوكا» سەركەسى گ.ياۆلينسكي, بيزنەسمەن م.پروحوروۆ, ت.ب. بار.قىزىل تۇرعىندارى مەكتەپتە تۇنەۋدە
شىعىس سىبىردە قۋاتى ايتارلىقتاي جەر سىلكىنىسى تىركەلدى. ماسەلەن, العاشقى دۇمپۋدەن كەيىن بيلىك تىۆا استاناسى – قىزىل قالاسىنىڭ تۇرعىندارىنا مەكتەپتەر مەن بالالار باقشاسىندا جانە سپورت كەشەنىندە تۇنەپ شىعۋ تۋرالى اقىل-كەڭەس بەرگەن. الدىن الا دەرەكتەر بويىنشا, قيراعان نىساندار مەن زارداپ شەككەن ادامدار جوق. حاكاسيا مەن كەمەروۆ وبلىسىنىڭ كەنشىلەرى شاحتالاردان دەرەۋ شىعارىلىپتى. رەسەي توتەنشە جاعدايلار ءمينيسترى سەرگەي شويگۋ تابيعات اپاتىنا وراي سەلەكتورلىق ءماجىلىس وتكىزگەن. جەر سىلكىنىسىنىڭ ماگنيتۋداسى (جەر استىنداعى قۋاتى) 6,7 باللدى قۇراعان كورىنەدى. ال جەر استى دۇمپۋلەرىنىڭ ەپيتسەنترى قىزىلدان شامامەن 100 شاقىرىم جەردە بولعان.قىسقا قايىرىپ ايتقاندا:
ارگەنتينا پرەزيدەنتى كريستينا فەرناندەس دە كيرشنەر حانىمنىڭ راك اۋرۋىنا شالدىققانى بەلگىلى بولدى. سىرقات مەديتسينالىق تەكسەرۋ كەزىندە انىقتالعان. ەندى وعان ىسىكتى الىپ تاستاۋ بويىنشا وپەراتسيا جاسالاتىن بولادى.
قىرعىزستاننىڭ وش قالاسىنىڭ اۋەجايىندا تۋ-134 ۇشاعى اپاتقا ۇشىرادى. ناقتىلانعان دەرەك بويىنشا, 18 ادام زارداپ شەكسە, 7-ەۋى اۋرۋحاناعا جاتقىزىلعان. قالعاندارىمەن, ارالارىندا ەكيپاج مۇشەلەرى دە بار, دارىگەرلەر مەن پسيحولوگتار جۇمىس ىستەپ جاتقان كورىنەدى.
NASA سپۋتنيگى قىزىل تەڭىزدە جاڭا ارالدىڭ پايدا بولۋ ۇدەرىسىن سۋرەتكە تۇسىرگەن. ارال يەمەننىڭ باتىس جاعالاۋلارىنا جاقىن جەردە پايدا بولىپتى. جالپى, بۇل ماڭدا ۆۋلكان تۋىنداتقان كوپتەگەن شاعىن ارالدار بار.
تۇركىمەنستان پرەزيدەنتى گۋربانگۋلى بەردىمۇحامەدوۆ ەلدەگى ورىس ءتىلدى جالعىز گازەت – «نەيترالنىي تۋركمەنيستان» باسىلىمىنىڭ باس رەداكتورى ۆلاديمير گۋبانوۆتى وتستاۆكاعا جىبەردى. وتستاۆكانىڭ سەبەبى بەلگىسىز.
ينتەرنەت ماتەريالدارى نەگىزىندە ازىرلەندى.
