بەدەل مەن سەنىم ۇشتاسىپ...
سايلاۋشىلارمەن كەزدەسۋىن نۇروتاندىقتار الماتى وبلىسىندا جالعاستىردى. «نۇر وتان» رەسپۋبليكالىق سايلاۋالدى شتابى وكىلدەرى «قازاقستان. 2017 ماقساتتارى» تۇعىرناماسىنىڭ باسىم باعىتتارىن ءوڭىر تۇرعىندارىمەن جانە سپورتشىلار قاۋىمداستىعىمەن تالقىلادى. ۇگىت توبىنىڭ باستى ماقساتى – ءاربىر سايلاۋشىعا جەتۋ. بۇل – «نۇر وتان» پارتياسىنىڭ كۇندەلىكتى جۇمىس ءتارتىبىنىڭ نەگىزى. «نۇر وتان» پارتياسى وتكەن جىلى الماتى وبلىسىنىڭ, قىزىلاعاش اۋىلىندا بولعان اپات سالدارىن جويۋعا بەلسەنە قاتىسقان ەدى. سوندىقتان شتاب مۇشەلەرى ەڭ الدىمەن قايتا قالپىنا كەلگەن اۋىل تۇرعىندارىمەن كەزدەستى. جالپى, اۋىل بويىنشا 465 جاڭا ءۇي سالىنىپ, 32 ءۇي ءجوندەۋدەن وتكىزىلگەن. جاڭارتىلعان عيماراتتار قاتارىندا مادەنيەت ءۇيى, اكىمدىك ءۇيى, بالاباقشا, مەكتەپتەر مەن مونشالار بار. «نۇر وتاننىڭ» شتابى مۇشەلەرى اۋىلدىقتارمەن كەڭ كولەمدە اڭگىمە جۇرگىزىپ سۇراقتارىنا جاۋاپ بەردى, سونىمەن بىرگە, وزدەرىنىڭ الداعى 5 جىلداعى ماقساتتارىن بايان ەتتى. بۇل ەڭ الدىمەن, ءبىلىم مەن عىلىمنىڭ دامۋى, دەنساۋلىق ساقتاۋ سالاسى, ەكونوميكانى تۇراقتاندىرۋ, جاڭا الەۋمەتتىك ساياسات, اۋىلدى دامىتۋ, حالىق بىرلىگىن نىعايتۋ. نۇروتاندىقتار سونداي-اق جاپپاي سپورتپەن اينالىسۋدى, سالاماتتى ءومىر سالتىن ناسيحاتتاۋدى ماقسات ەتىپ وتىر. كوپتەگەن سپورتشىلار بەلسەندى نۇروتاندىقتار بولىپ تابىلادى, ونىڭ ۇستىنە ولار «نۇر وتاننىڭ» پارتيالىق تىزىمىنە كىرگەن. بۇل تۋرالى نۇروتاندىقتاردىڭ تالدىقورعان قالاسىنداعى سپورت الاڭدارىنىڭ بىرىندە وتكەن, الماتى وبلىسى سپورتشىلارىمەن كەزدەسۋىندە ءسوز بولدى. ءوڭىر ءوزىنىڭ سپورتتىق ءداستۇرلەرىن ماقتان ەتەدى. وبلىس سپورتشىلارىنىڭ حالىقارالىق دەڭگەيدەگى ابىرويلى جارىستاردا ەڭ جوعارى ساتىدان بوي كورسەتكەن كەزدەرى از ەمەس. وسى كەزدەسۋگە بەلگىلى سپورتشىلار, سپورت قايراتكەرلەرى جانە بولاشاق جۇلدىزدار كەلدى. كۇمىسجان بايجان. _________________بەينەتتىڭ زەينەتى بولۋى ءتيىس
قازاقستان پاتريوتتارى پارتياسىنىڭ ءبىر توپ بەلسەندىلەرى قازىر وڭتۇستىك ءوڭىردىڭ بىرقاتار ەلدى مەكەندەرىن ارالاپ, ناسيحات جۇمىستارىمەن اينالىسىپ ءجۇر. جامبىل وبلىسىنىڭ ورتالىعى تاراز قالاسىنا اتباسىن بۇرعان اتالعان توپ مۇندا بىرقاتار كەزدەسۋلەر وتكىزدى. سونداي كەزدەسۋلەردىڭ ءبىرى رەسپۋبليكالىق ورتكە قارسى كۇرەس قوعامىنىڭ ەرىكتىلەرىمەن ءوتىپ, ءورت قاۋىپسىزدىگى ماسەلەسى جونىندە بىرقاتار مالىمەتتەر ورتاعا سالىندى. سونداي-اق, كەزدەسۋ بارىسىندا كۇش قۇرىلىمدارى قىزمەتكەرلەرىنىڭ باسىنداعى احۋال دا نازاردان تىس قالماعاندىعىن ايتا كەتۋ كەرەك. وسىنداعى ناسيحات جۇمىستارى بارىسىندا پاتريوتتىقتار جاقىندا لاڭكەستىڭ قولىنان قازا تاپقان پوليتسيا كاپيتانى ع.بايتاسوۆتىڭ قازا تاپقان جەرىنە بارىپ, رۋحىنا تاعزىم ەتىپ, گۇل شوقتارىن قويىپتى. سونىمەن قاتار, زاپاستاعى اسكەري, پوليتسيا, ۇلتتىق قاۋىپسىزدىك قىزمەتكەرلەرىنىڭ باسىنداعى جاعداي دا ءسوز ەتىلگەن. اتاپ ايتقاندا, وسى كۇش قۇرىلىمدارى قىزمەتكەرلەرى زەينەتكە شىققاندا قولدارىندا ءار ءتۇرلى جەڭىلدىكتەرى مەن باسىندا باسپاناسى بولۋى شارت. ياعني, تىرىسىندە جالاقىسى جوعارى بولىپ, الەۋمەتتىك قامسىزداندىرۋ ماسەلەلەرى تۇگەل شەشىمىن تابۋى ءتيىس. قالا تۇرعىندارىمەن كوشەدە تۇرىپ كەزدەسۋ ءوتكىزگەن پارتيا بەلسەندىلەرى ولار تاراپىنان قويىلعان كوپتەگەن سۇراقتارعا جاۋاپ بەرىپ, وزدەرى دە كوپتەگەن جايتتەردەن حاباردار بولدى. بۇدان باسقا پارتيا بەلسەندىلەرى تاراز قالاسىنىڭ ورتالىق بازارىندا بولىپ, شاعىن جانە ورتا كاسىپ وكىلدەرىمەن كەزدەسۋلەر وتكىزگەن. ولار ءوز تاراپىنان اكىمدىك جاڭا بازار اشىپ, سول جەردە تولەمدەردىڭ اشىق تا ءادىل جۇرگىزىلۋى قاجەتتىگىن كوتەرگەن. قازىرگى زامانعا ساي ساۋدا ورنىن اشىپ بەرسە, وندا ولار سول جەرگە بارىپ, ساۋدالارىن جۇرگىزۋگە دايىن ەكەندىكتەرىن بىلدىرگەن. ەگەر بۇل ماسەلە شەشىمىن تاپسا, وندا كاسىپكەرلەر بيۋدجەت ءتۇسىمىن ارتتىرۋعا دايىن. اسقار تۇراپباي ۇلى. ___________________اۋىل تۇرعىندارىمەن جۇزدەستى
«رۋحانيات» پارتياسى وسى كۇندەرى اۋىلداردى ارالاپ قايتتى. اتاپ ايتقاندا, الماتى وبلىسى, ەڭبەكشىقازاق اۋدانىنا قاراستى قازاقستان اۋىلىندا, وڭتۇستىك قازاقستان وبلىسىنىڭ تۇلكىباس اۋدانىندا بولدى. قازاقستان اۋىلىنداعى جيىندى «رۋحانيات» پارتياسىنىڭ جاناشىر سايلاۋشىلارى ۇيىمداستىرىپ, كەزدەسۋگە اۋىلدىڭ جاسى مەن قارتى قوسا جينالىپ, پارتيانىڭ سايلاۋالدى جۇمىستارىمەن تانىستى. «رۋحانيات» پارتياسىنىڭ اتىنان پارلامەنت ءماجىلىسىنىڭ دەپۋتاتتىعىنان ۇمىتكەرلەر ەركىن راقىشەۆ پەن گەرويحان قىستاۋباەۆ اۋىل تۇرعىندارىمەن تىلدەسىپ, پارتيانىڭ باعدارلاماسىمەن تانىستىردى. وندا تۇيتكىلدى, حالىققا قاجەتتى ماسەلەلەر از بولمادى. اۋىل جاستارىنىڭ جۇمىسسىزدىعىنا كومەك بەرۋ, زەينەتكەرلەردىڭ زەينەتاقىسىن كوتەرۋ, اۋىل تۇرمىسىن جاقسارتۋ سەكىلدى ماسەلەلەر ءسوز ەتىلدى. جالپى, «رۋحانيات» پارتياسى ۇلتتىق مۇددەنى, قازاق ۇلتىن قورعايتىن پارتيا بولعاندىقتان, سايلاۋشىلار پارتيانى قولدايتىندىقتارىن جەتكىزدى. تۇلكىباس اۋدانىندا «رۋحانيات» پارتياسىنان پارلامەنت ءماجىلىسىنە دەپۋتاتتىققا كانديدات ەركىن راقىشەۆ پەن پارتيا وكىلى رامازان قۇرمانباەۆ اۋىل اقساقالدارىمەن, كوللەدج ستۋدەنتتەرىمەن جانە تۇرعىندارمەن كەزدەسۋ وتكىزدى. ونىڭ بارىسىندا ەركىن راقىشەۆ پارتيانىڭ باعدارلاماسىمەن تانىستىرىپ, «رۋحانيات» پارتياسىنىڭ نەگىزگى ماقساتى قاراپايىم حالىقتىڭ ءمۇددەسى ءۇشىن قىزمەت ەتۋ, ستۋدەنتتەر مەن جاستارعا كومەك كورسەتۋ, مۇقتاج جاندارعا جاردەم بەرۋ سەكىلدى ماڭىزدى ماسەلەلەر ەكەنىن ايتتى. پارتيانىڭ ەندىگى ءبىر جۇرتشىلىقپەن جۇزدەسۋى قاينار ۋنيۆەرسيتەتىنىڭ قابىرعاسىندا وسى وقۋ ورنىنىڭ ستۋدەنتتەرىمەن, وقىتۋشىلارىمەن بولدى. وندا پارتيانىڭ باعدارلاماسى جينالعاندارعا تولىعىمەن تانىستىرىلىپ, نەگىزگى كوتەرىلەتىن ماسەلەلەر اتاپ كورسەتىلدى. انار تولەۋحانقىزى. _____________________جاستار قولداۋىنان ءۇمىتتى
قازاقستاننىڭ «اق جول» دەموكراتيالىق پارتياسىنىڭ توراعاسى ازات پەرۋاشەۆ باستاعان ءبىر توپ اقجولدىقتار اقتوبەگە كەلدى. ولار پارتيانىڭ سايلاۋالدى ۇگىت-ناسيحات جۇمىستارىنىڭ اياسىندا ۇيىمداستىرىلعان بوكستان وليمپيادا چەمپيونى باقىت سارسەكباەۆتىڭ جۇلدەسى ءۇشىن جارىستىڭ اشىلۋىنا قاتىستى. جارىستا ەلىمىزدىڭ ءتورت وبلىسىنان كەلگەن بوكسشىلار شارشى الاڭعا شىعىپ, شەبەرلىكتەرىن سىنعا سالدى. سودان كەيىن ولار وبلىستىق كاسىپوداقتار ۇيىندە وبلىستىق شتابتىڭ مۇشەلەرىمەن جانە بۇقارالىق اقپارات قۇرالدارى وكىلدەرىمەن كەزدەستى. كەزدەسۋدە ءسوز العان ازات پەرۋاشەۆ «اق جول» دەموكراتيالىق پارتياسىنىڭ سايلاۋالدى باعدارلاماسىن تارقاتا اڭگىمەلەدى.پارتيانىڭ نەگىزگى ماقساتتارى – مەملەكەتتىڭ حالىق مۇددەسىنە قىزمەت ەتۋىن جاقسارتۋ, مەملەكەتتىك ءتىلدىڭ قولدانۋ اياسىن كەڭەيتۋ, ەكونوميكالىق دەربەستىگىمىزدى قالىپتاستىرۋ, ءبىلىم بەرۋدى دامىتۋ, كاسىپكەرلىكتى قولداۋ, سالىق ساياساتىن جەتىلدىرۋ, جەمقورلىقپەن كۇرەستى كۇشەيتۋ, سونداي-اق پارلامەنتتىڭ وكىلەتتىگىن ارتتىرۋ سياقتى قاداۋ-قاداۋ ماسەلەلەردى قامتيتىنىن جەتكىزدى. – سىزدەردىڭ الدارىڭىزعا كەلىپ وتىرعان ەركەبۇلان ءىلياسوۆ – پارتيا تىزىمىمەن پارلامەنت ءماجىلىسى دەپۋتاتتىعىنا تىركەلگەن ەڭ جاس كانديدات. نەبارى 26 جاستاعى ول كەنتاۋ ترانسفورماتور زاۋىتىنىڭ قاتارداعى جۇمىسشىسىنان ۆيتسە-پرەزيدەنتى دارەجەسىنە دەيىنگى ەڭبەك جولىنان وتكەن, «جاس مامان» بىرلەستىگىنىڭ كوشباسشىسى. جالپى, بىزدەر جاستاردىڭ قولدايتىنىنا سەنىم ارتامىز. ءوزىم پارتيا توراعاسى بولىپ كەلگەننەن بەرى عانا 20 مىڭنان استام ادام مۇشەلىككە ءوتتى. سونىڭ باسىم بولىگى جاستار, – دەدى ازات پەرۋاشەۆ ءوز سوزىندە. ونىڭ مالىمدەۋىنشە, پارتيانىڭ رەسپۋبليكالىق سايلاۋالدى شتابىندا بىلىكتى زاڭگەرلەر توبى قۇرىلعان, ولار ۇگىت-ناسيحات جۇمىستارىنىڭ زاڭدىلىعىنا باعدار بەرەدى, سايلاۋدىڭ اشىق جانە زاڭدىلىقتارعا سايكەس وتكىزىلۋىن قاداعالايدى. ساتىبالدى ءساۋىرباي ___________________وبلىستار اۋماعىندا جالعاسادى
جالپىۇلتتىق سوتسيال-دەموكراتيالىق پارتيانىڭ قۇرىلعان كۇنىنەن اينالىسىپ جۇرگەن باستى ماسەلەسىنىڭ ءبىرى – باسپانا بولىپ تابىلادى. كەشە بۇل پارتيانىڭ وكىلدەرى الماتىداعى «شاڭىراق» شاعىن اۋدانىندا بولىپ, جۇرتشىلىقپەن كەزدەسۋ وتكىزدى. كەزىندە بۇل جەردەگى جەردى زاڭسىز باسىپ الۋعا بايلانىستى ورىن العان كەلەڭسىز وقيعالاردىڭ وڭ شەشىلۋىنە اتالمىش پارتيا دا ارالاسقان بولاتىن. ەندىگى جەردە جالپىۇلتتىق سوتسيال-دەموكراتيالىق پارتيانىڭ باس حاتشىسى ءامىرجان قوسانوۆ: – «شاڭىراق» ماسەلەسى – ەلدىڭ الەۋمەتتىك-تۇرمىستىق تىرشىلىگىندە ەلەۋلى ورىن الادى. «شاڭىراق» وقيعاسى كەزىندە ءبىز وسىندا بولدىق, ونى كوپشىلىك بىلەدى. سوندىقتان الماتىداعى سايلاۋالدى كەزدەسۋلەردىڭ ءبىرىن وسى جەردە وتكىزىپ وتىرمىز. وكىنىشكە قاراي, تەك الماتىدا عانا ەمەس, ۇلكەن قالالاردا قاراپايىم ازاماتتاردىڭ زاڭدى تۇردە جەر الىپ, جەر تەلىمدەرىن زاڭداستىرۋ ماسەلەسى ءارتۇرلى اكىمشىلىك كەدەرگىلەر مەن باسقا دا تۇيتكىلدى جايتتەرگە بايلانىستى شەشىلمەي جاتادى. سوندىقتان ءبىزدىڭ پارتيا وسى ماسەلەگە بايلانىستى ۇستانىمىن ايتتى, – دەيدى. سونداي-اق, پارتيا جەتەكشىلەرى شاڭىراقتىقتارعا ءوز وكىلدەرى پارلامەنتكە وتەتىن بولسا, الداعى ۋاقىتتا دا وسى پروبلەمانى زاڭ جۇزىندە رەتتەۋگە اتسالىساتىندىقتارىن ءبىلدىردى. پارتيانىڭ باس حاتشىسى بۇل كۇنى وزدەرى كەزدەسۋ وتكىزگەن اۋداندا باسقا كەزدەسۋ ۇيىمداستىرىلىپ, اۋدان تۇرعىندارىنىڭ ءبىر بولىگى سول باسقوسۋعا كەتىپ قالعانىن كولدەنەڭ تارتتى. – بىراق, سايلاۋالدى ناۋقانىندا مۇنداي باسەكە بولىپ تۇرادى. بۇل – قالىپتى جاعداي. ءبىز وعان تاڭقالمايمىز, – دەيدى جسدپ جەتەكشىلەرى. ال اتالمىش پارتيانىڭ الداعى ۇگىت-ناسيحات جۇمىستارىنا كەلەتىن بولساق, ول وبلىستار اۋماقتارىندا جالعاسا بەرمەك. ايناش ەسالي. الماتى. ______________بەلسەندىلەرىنىڭ سانى ارتۋدا
قازاقستان كوممۋنيستىك حالىقتىق پارتياسى ورتالىق كوميتەتىنىڭ حاتشىسى ۆلاديمير كوسارەۆ ەكى-ءۇش كۇننەن بەرى شىرايلى شىعىستى ارالاپ, سايلاۋشىلارمەن كەزدەستى. – ساپارىمىز جامان ءوتىپ جاتقان جوق. سەمەيدە بىرنەشە كەزدەسۋ ءوتتى. ونداعى كەزدەسۋلەرگە دە كوپتەگەن ادام قاتىستى. ەندى, مىنە, وسكەمەنگە كەلدىم, وسى ايدىڭ 29-ىنان باستاپ, بىرقاتار اۋدانداردى ارالاپ شىعۋ ويدا بار, – دەپ حالىقشىل كوممۋنيستەر سەركەسى ادەتىنشە ەكپىندەتىپ اڭگىمەسىن باستادى. ۆ.كوسارەۆ پارتيانىڭ سايلاۋالدى تۇعىرناماسىمەن جانە باعدارلاماسىمەن تانىستىردى. ونىڭ ايتۋىنشا, قازىر قوعامدا شەشۋىن كۇتكەن ماسەلەلەر دە بار. جانار ماي باعاسى اسپانداپ بارادى, ونى توقتاتاتىن, توقتاتقىسى كەلەتىن باسشىلار كورىنبەيدى. «بۇل كۇندەرى 600 مىڭ ادام جۇمىسسىز ءجۇر, ولاردىڭ وتباسىن كىم اسىرايدى؟ ەلىمىزدە جىلىنا 400 مىڭ توننا ماقتا, 350 مىڭ تونناداي ءجۇن وندىرىلەدى ەكەن. ال وسى بايلىق بوسقا ءراسۋا بولىپ جاتىر. قىتايدىڭ ساپاسىز بۇيىمدارىن تاسىعانشا, وزىمىزدە ءوندىرۋشى كاسىپورىنداردى قۇرساق, قانشاما جۇمىس ورنى اشىلعان بولار ەدى. سونداي-اق, اياق كيىم شىعارۋ ءۇشىن بىلعارى جەتكىلىكتى. قازاقستاننىڭ اياق كيىمى كوزدەن بۇل-بۇل ۇشقانىنا ىقىلىم زامان ءوتتى. مىنە, ءبىز ەگەر پارلامەنت تورىنەن ورىن الاتىن بولساق, وسى جاعدايلارعا باسا نازار اۋدارىپ, حالىقتىڭ مۇڭ-مۇقتاجىن شەشۋگە اتسالىسار ەدىك», – دەدى پارتيا سەركەسى. – قازىر ءبىزدىڭ پارتيادا 81 مىڭ مۇشە بار. كەندى التايدا 7,5 مىڭ ادام كوممۋنيستىك حالىقتىق پارتياعا مۇشە بولىپ تابىلادى. بىراق سەمەي مەن وسكەمەن ەكى بولەك جۇمىس ىستەپ جاتىر. قاراعاندى, اتىراۋ وبلىستارىندا دا پارتيا بەلسەندىلەرى كۇن سايىن كوبەيىپ كەلەدى. وتكەن سايلاۋدا 1,5 مىڭ مەن 6 مىڭ ارالىعىندا بەلسەندىلەر بولسا, بيىلعى سايلاۋدا بەل شەشە كىرىسىپ, ۇگىت-ناسيحات جۇمىستارىمەن 18 مىڭ ادام اينالىسۋدا, – دەدى ۆ.كوسارەۆ. وڭداسىن ەلۋباي. _______________تۇعىرناما تانىستىرىلدى
قازاقستان سوتسيال-دەموكراتيالىق «اۋىل» پارتياسىنىڭ ءتوراعاسى, پارلامەنت ءماجىلىسى دەپۋتاتتىعىنا كانديدات عاني قاليەۆ اقمولا وبلىسى بۋراباي اۋدانىنداعى شورتاندى قالاسىندا بولىپ, ونداعى ورمان شارۋاشىلىعى عىلىمي-زەرتتەۋ ينستيتۋتىنىڭ ۇجىمىمەن كەزدەستى. بۇل كەزدەسۋگە سونداي-اق پارلامەنت ءماجىلىسى دەپۋتاتتىعىنا كانديدات قۋانىش ءابۋوۆ پەن «اۋىل» پارتياسى وبلىستىق فيليالىنىڭ توراعاسى بولات مۇقانوۆ قاتىستى. كەزدەسۋ بارىسىندا ءسوز العان اكادەميك عاني قاليەۆ جينالعاندارعا پارتيانىڭ سايلاۋالدى تۇعىرناماسىندا قاراستىرىلعان ءماسەلەلەر تۋرالى اڭگىمەلەدى. بۇل تۇعىرنامادا پارتيانىڭ الدىندا تۇرعان ماقسات-مىندەتتەر كورسەتىلگەن. پارتيا سول مىندەتتەرىنىڭ بىرىندە اگرارلىق عىلىمدى دامىتۋ, اۋىل شارۋاشىلىعى ءوندىرىسىن ويداعىداي وركەندەتۋدىڭ نەگىزگى شارتى بولىپ تابىلادى دەپ ەسەپتەيدى. عىلىمي تەحنولوگيالار مەن يننوۆاتسيالىق شەشىمدەر عاسىرىندا اگرارلىق عىلىم ءوندىرىس پەن بيزنەس تالاپ ەتەتىن ساپالى جاڭا شەشىمدەر ۇسىنۋعا ءتيىس. ۇلت دەنساۋلىعى, قازاقستاننىڭ قاۋىپسىزدىگى مەن گۇلدەنۋى وسى ماسەلەنىڭ ويداعىداي جۇزەگە اسۋىنا كوپ بايلانىستى. جينالعاندار «اۋىل» پارتياسىنىڭ تۇعىرناماسىمەن تانىسا كەلە, ونى قولداۋعا لايىق دەپ تاپتى. وسى كۇنى مۇنداي كەزدەسۋلەر سولتۇستىك قازاقستان وبلىسى پەتروپاۆل قالالىق №3 اۋرۋحاناسىندا «اۋىل» پارتياسىنىڭ اتىنان پارلامەنت ءماجىلىسى دەپۋتاتتىعىنا كانديدات يۆان كەنديۋحپەن, الماتى وبلىسىنىڭ سارقان اۋدانىندا پارتيا اتىنان پارلامەنت ءماجىلىسى دەپۋتاتتىعىنا كانديدات سارسەنعالي اجىباەۆپەن بولىپ ءوتتى. ال پاۆلودار قالاسىنداعى «دوستىق ءۇيى» مادەني-دەمالىس ورتالىعىندا پارتيا مۇشەلەرى جەرگىلىكتى ەسترادالىق ورىنداۋشىلارمەن بىرلەسە وتىرىپ, قالاداعى ۇلى وتان سوعىسى مەن ەڭبەك ارداگەرلەرىنە, زەينەتكەرلەرگە, مۇگەدەك ادامدارعا كونتسەرت بەردى. سۇڭعات ءالىپباي. ______________ماقسات – ۇلتجاندىلىق سەزىمىن وياتۋ
كەشە استانادا «ادىلەت» دەموكراتيالىق پارتياسى «ايتۇمار» قازاق ۇلتتىق بالالار ەتنوگرافيالىق اكادەمياسىنىڭ عيماراتىندا پارلامەنت ءماجىلىسى مەن ءماسليحاتتار سايلاۋلارى قارساڭىندا جۇرگىزىلگەن ۇگىت-ناسيحات شارالارىنا بايلانىستى اكادەميا ۇجىمىمەن جانە بالالاردىڭ اتا-انالارىمەن كەزدەسۋ وتكىزدى. كەزدەسۋگە «ادىلەت» پارتياسى ءتوراعاسىنىڭ ورىنباسارى مۇساعالي دۋانبەكوۆ قاتىستى. ول اكادەميانىڭ قىزمەتكەرلەرى مەن اتا-انالاردى كەلە جاتقان جاڭا 2012 جىلمەن قۇتتىقتاپ, ولارعا مىقتى دەنساۋلىق, باقىت, وتباسىلارىنا تىنىشتىق تىلەدى. سونداي-اق, ول كەزدەسۋگە قاتىسۋشىلارعا پارتيانىڭ سايلاۋالدى تۇعىرناماسىندا بەلگىلەنگەن نەگىزگى باسىمدىقتار جونىندە اڭگىمەلەپ بەردى. بۇعان قوسا, پارتيا توراعاسىنىڭ ورىنباسارى جينالعاندار مەن جۋرناليستەردىڭ وتباسى ماسەلەسىنە, ءبىلىم بەرۋگە, بولاشاق ۇرپاقتى ءتاربيەلەۋگە جانە باسقا دا قىزىقتىرعان ساۋالدارىنا جاۋاپ بەردى. بۇگىن قازاقستان تاۋەلسىزدىگىنىڭ 20 جىلدىق مەرەيتويىنا وراي, سونداي-اق ەلىمىزدە تۇراقتىلىق پەن كەلىسىمدى نىعايتۋ ماقساتىندا جاستار ساياساتىنا قولداۋ كورسەتۋگە بايلانىستى «ادىلەت» دەموكراتيالىق پارتياسىنىڭ «ءادىل جاستار» قاناتى «ادىلەت العا!» ۇرانىمەن ارنايى ءىس-شارا ۇيىمداستىردى. شارانىڭ باسى-قاسىندا جۇرگەن ازاماتتاردىڭ ايتۋىنشا, ولار مىنالار: قازاقستان حالقىنىڭ ءبىرتۇتاس ەكەندىگىن كورسەتۋ, قازاقستان جاستارىنىڭ بويىندا ءوز وتانىنا دەگەن ۇلتجاندىلىق قاسيەتتى تەرەڭنەن ءسىڭىرۋ, قازاقستاندى تۇراقتىلىق پەن دامۋدىڭ سيمۆولى رەتىندە تانىتۋ, قوعامنىڭ ءوز ىشىنەن ءبولىنۋى مەن جارىلۋىنا اكەلىپ سوعاتىن ءتۇرلى ساياسي ۇندەۋلەر مەن ۇراندارعا قارسىلىق ءبىلدىرۋ. پارتيا وكىلدەرىنىڭ ايتۋىنشا, مۇنداي سيپاتقا ساي ءىس-شارالار ەلىمىزدە بۇعان دەيىن وتكىزىلمەگەن, سوندىقتان, ادىلەتتىكتەر وسىنداي باستامالاردى ۇيىمداستىرۋ ارقىلى قوعامعا جاڭاشىلدىق ەنگىزۋدى ماقسات تۇتىپتى. ءلايلا ەدىلقىزى.
