سەسسيانىڭ تاقىرىبى «بۇۇ-دى بارلىق ادامداردىڭ مۇددەلەرىنە جاقىنداتۋ: بەيبىت, ادىلەتتى جانە تۇراقتى قوعامداردى قولداۋداعى جاھاندىق جەتەكشىلىك پەن ورتاق جاۋاپكەرشىلىك» دەپ اتالادى.
بۇۇ باس اسسامبلەياسى 73-ءشى سەسسياسىنىڭ نەگىزگى باسىمدىقتارى رەتىندە ۇيىمدى ودان ءارى رەفورمالاۋ, جانجالداردى بولدىرماۋ, ادام قۇقىقتارىن قامتاماسىز ەتۋ, گەندەرلىك تەڭدىك جانە الەمدەگى ادىلەتسىزدىكتى ەڭسەرۋ بولىپ تابىلادى.
سەسسيانىڭ كۇن تارتىبىندە حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ, تۇراقتى دامۋ, ادام قۇقىقتارى, گۋمانيتارلىق كومەك, قارۋسىزدانۋ, سوت تورەلىگىن نىعايتۋ جانە حالىقارالىق قۇقىقتى دامىتۋ سياقتى سالالاردا 175-تەن استام ماسەلە قامتىلدى.
ەكۆادوردىڭ سىرتقى ىستەر جانە كوشى-قون ءمينيسترى ماريا فەرناندا ەسپينوسا گارسەس اعىمداعى سەسسيادا باس اسسامبلەيانىڭ توراعاسى بولىپ سايلاندى. ءبىر جىلعا سوزىلاتىن توراعالىق كەزەڭىندە ول كوشى-قون, قورشاعان ورتانى قورعاۋ, مۇگەدەكتەردىڭ قۇقىقتارى, گەندەرلىك تەڭدىك جانە تۇراقتى دامۋدى ناسيحاتتاۋ ماسەلەلەرىنە باسا نازار اۋدارۋدى جوسپارلايدى.
باس اسسامبلەيانىڭ جۇمىسىندا ەكونوميكالىق دامۋعا جاردەمدەسۋ جانە كوشى-قون جانە بوسقىندار تۋرالى جاھاندىق كەلىسىمدەردى قابىلداۋ تاقىرىبى دا ماڭىزدى ورىن الادى.
جاڭا سەسسيانىڭ العاشقى كۇندەرىندە اسسامبلەيانىڭ التى نەگىزگى كوميتەتتەرىنە كۇن تارتىبىندەگى ماسەلەلەردى بولۋگە قاتىستى ماسەلەلەر قاراستىرىلاتىن بولادى. جىل سايىنعى جالپى پىكىرتالاس 25 قىركۇيەكتە باستالىپ, 1 قازانعا دەيىن جالعاسادى.
بۇۇ باس اسسامبلەياسىنىڭ جالپى دەباتتارىنا سىرتقى ىستەر ءمينيسترى قايرات ءابدىراحمانوۆ باستاعان قازاقستان رەسپۋبليكاسىنىڭ دەلەگاتسياسى قاتىسادى. 24-29 قىركۇيەك ارالىعىندا كوپجاقتى جانە ەكىجاقتى فورماتتاعى بىرقاتار ءىس-شارالار جوسپارلانعان. قازاقستان سىرتقى ىستەر ءمينيسترىنىڭ ءسوز سويلەۋى 28 قىركۇيەككە جوسپارلانعان.
اسسامبلەيانىڭ سەسسياسىندا قازاقستان ءۇشىن باستى وقيعا «تەرروريزمنەن ازات الەمگە قول جەتكىزۋ» مىنەز-ق ۇلىق كودەكسىنىڭ تانىستىرىلىمى بولادى. قۇجات قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باستاماسىمەن جاسالدى. كودەكستىڭ نەگىزگى ماقساتى 2045 جىلى بۇۇ-نىڭ ءجۇز جىلدىعىنا وراي تەرروريزمگە قارسى كۇرەس جانە تەرروريزمنەن ەركىن الەمگە قول جەتكىزۋ بويىنشا سەرىكتەس ەلدەردىڭ كەڭ حالىقارالىق كواليتسياسىن قۇرۋ بولىپ تابىلادى.
قازاقستان دەلەگاتسياسىنىڭ كوپجاقتى فورماتتا وتەتىن ءتۇرلى كەزدەسۋلەرگە قاتىسۋى كۇتىلۋدە اتاپ ايتقاندا بۇۇ باس اسسامبلەياسىنىڭ 73-ءشى سەسسياسىنىڭ جالپى دەباتتارىنىڭ اشىلۋى; ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) سىرتقى ىستەر مينيسترلەرىنىڭ بەيرەسمي كەزدەسۋى جانە قحر-دان تاجىكستانعا توراعالىقتى تاپسىرۋ; ۇجىمدىق قاۋىپسىزدىك شارتى ۇيىمىنا (ۇقشۇ) مۇشە ەلدەردىڭ سىرتقى ىستەر مينيسترلەرىنىڭ كەزدەسۋى; يادرولىق قارۋدى تولىق جويۋعا قارسى كۇرەس حالىقارالىق كۇنىنە ارنالعان جوعارى دەڭگەيدەگى كەزدەسۋ; بۇۇ قاۋىپسىزدىك كەڭەسىنىڭ قىزمەتى بويىنشا بىرقاتار وتىرىستار; ەكونوميكالىق ىنتىماقتاستىق ۇيىمى مينيسترلەر كەڭەسىنىڭ بەيرەسمي كەزدەسۋى; تەڭىزگە شىعۋ جولى جوق دامۋشى ەلدەر توبى مەملەكەتتەرىنىڭ مينيسترلەر كەزدەسۋى; بۇۇ وركەنيەتتەر اليانسىنىڭ دوستارى توبىنىڭ مينيسترلەر كەزدەسۋى.
اقش توراعالىعىمەن, سونداي-اق پرەزيدەنت دونالد ترامپ پەن مەملەكەتتىك حاتشى مايكل پومپەونىڭ قاتىسۋىمەن بۇۇ قاۋىپسىزدىك كەڭەسىنىڭ بىرقاتار اشىق وتىرىستارى وتەدى. 2017-2018 جىلدار ارالىعىندا قازاقستان اتالعان كەڭەستىڭ تۇراقتى ەمەس مۇشەسى بولىپ تابىلادى.
بىتىمگەرشىلىك, ءبىلىم بەرۋ, مادەنيەت, دەنساۋلىق ساقتاۋ سالالارداعى بىرقاتار ماڭىزدى ءىس-شارالار, اتاپ ايتقاندا, تۋبەركۋلەزدى جويۋ جونىندەگى جوعارى دەڭگەيدەگى كەزدەسۋلەر نازار اۋدارادى. بۇۇ شتاب-پاتەرىندە شىڭعىس ايتماتوۆتىڭ 90-جىلدىق مەرەيتويىنا ارنالعان سالتاناتتى كورمەنىڭ اشىلۋى جوسپارلانۋدا.
سونىمەن قاتار, ق. ءابدىراحمانوۆ بۇۇ رەسمي وكىلدەرى, سىرتقى ىستەر مينيسترلەرى, امەريكاندىق جانە حالىقارالىق بيزنەس وكىلدەرىمەن بىرقاتار ەكىجاقتى كەزدەسۋلەر وتكىزەدى.
جالپى العاندا, بۇۇ باس اسسامبلەياسىنىڭ سەسسياسى قر پرەزيدەنتى ن. نازارباەۆتىڭ تۇراقتى دامۋ ماقساتتارىنا قول جەتكىزۋ جانە بۇۇ-نىڭ 2030 كۇن ءتارتىبىنىڭ شەڭبەرىندە تاراتپاۋ جانە قارۋسىزدانۋ, بىتىمگەرشىلىك, تۇراقتى الەۋمەتتىك-ەكونوميكالىق دامۋ سالالارىنداعى بىرقاتار سىرتقى ساياسي باستامالارىن ىلگەرىلەتۋگە مۇمكىندىك بەرەدى.
