وزبەك حالقىنىڭ ءتىلى, مادەنيەتى جانە سالت-ءداستۇرى كۇنىنە ارنالعان «تۇركىستان-تۇركى حالىقتارىنىڭ رۋحاني ورتالىعى» اتتى مەرەكەلىك شارا تۇركىستان قالاسىنداعى ەسىم حان الاڭىندا ءوتتى.
تۇركىستان وبلىسى قازاقستان حالقى اسسامبلەياسى مەن وبلىستىق وزبەك ەتنومادەني بىرلەستىگى ۇيىمداستىرعان مەرەكەلىك ءىس-شاراعا پارلامەنت دەپۋتاتتارى, وزبەكستان رەسپۋبليكاسىنان ارنايى كەلگەن دەلەگاتسيا وكىلدەرى, ەتنومادەني بىرلەستىكتەردىڭ مۇشەلەرى قاتىستى. مەرەكەلىك شارا قوناقتاردىڭ قوجا احمەت ياساۋي كەسەنەسىنە زيارات ەتۋىمەن باستالىپ, وزبەك ەتنومادەني بىرلەستىگىنىڭ قولونەر بۇيىمدارى, ۇلتتىق تاعامدارى جانە اقىن-جازۋشىلاردىڭ تاڭداۋلى تۋىندىلارىنىڭ كورمەسىن تاماشالاۋمەن جالعاستى.
وبلىس اكىمى جانسەيىت تۇيمەباەۆ كوپشىلىك الدىندا سويلەگەن سوزىندە ەلدەگى ىنتىماق پەن بىرلىكتى نىعايتۋدىڭ, تاتۋلىق پەن تۇراقتىلىقتى ساقتاۋدىڭ ماڭىزىنا توقتالدى. «مەملەكەت باسشىسى نۇرسۇلتان ءابىش ۇلى نازارباەۆ: «بىرلىك, ىنتىماق, سابىرلىلىق پەن پاراساتتىلىق, ەڭ الدىمەن, وزىمىزگە كەرەك. بىرلىگىمىز بولسا, ءبىز ءبىر-ءبىرىمىزدى سىيلايمىز. بۇعان دەيىن وسىلاي بولعان, بۇدان كەيىن دە سولاي بولۋعا ءتيىس» دەگەن بولاتىن. بىرلىكتىڭ قادىرىن ءبىلۋ, ونى تەرەڭىنەن ءتۇيسىنۋ, بايىپتى باعامداۋ سىزدەر مەن بىزدەرگە جۇكتەلىپ وتىرعان اۋقىمدى مىندەت ەكەنىن ۇعىنۋعا مىندەتتىمىز», - دەدى وبلىس اكىمى.
جيىندا ەل بىرلىگىن نىعايتۋعا قازاقستاندىق ءپاتريوتيزمدى دامىتۋعا قوسقان ەلەۋلى ۇلەسى ءۇشىن بىرقاتار ازاماتتار قازاقستان وزبەكتەرى قوعامدىق بىرلەستىكتەرىنىڭ «دوستىق» قاۋىمداستىعىنىڭ «قوعام بەلسەندىسى» توسبەلگىسىمەن ماراپاتتالدى.
مەرەكەلىك شارا وتاندىق جانە وزبەكستاندىق ەسترادا جۇلدىزدارىنىڭ قاتىسۋىمەن گالا-كونتسەرتكە ۇلاستى.
عالىمجان ەلشىباي,
«ەگەمەن قازاقستان»
تۇركىستان وبلىسى
