اتالعان ءبىلىم بەرۋ وشاعى ديرەكتورىنىڭ عىلىمي-ادىستەمەلىك ءىسى جونىندەگى ورىنباسارى, جاڭارتىلعان ءبىلىم بەرۋ مازمۇنى بويىنشا جاۋاپتى قىزمەتكەرى گاۋھار ەلعونوۆا بۇل رەتتە دە بىرقاتار جەتىستىكتىڭ بار ەكەنىن ايتتى. بايقاعانىمىزداي, مۇندا بيولوگيا ءپانىنىڭ مۇعالىمدەرى ايجان قارعاباەۆا, جاڭاگۇل تىلەبالديەۆا, ايگەرىم وسپانوۆا, فيزيكا ءپانىنىڭ مۇعالىمى ءلاززات ايداروۆا جانە ينفورماتيكا ءپانىنىڭ مۇعالىمى ايجان قۋانىشباەۆا سياقتى بىلىكتىلىك كۋرسىنان وتكەن مۇعالىمدەر ءوز پاندەرىن اعىلشىن تىلىندە جۇرگىزەدى ەكەن. ال 2015-2016 وقۋ جىلىنان باستاپ №1 مەكتەپ-ليتسەيىنىڭ ۇجىمى كەمبريدج ۋنيۆەرسيتەتى ءبىلىم بەرۋ فاكۋلتەتى زەرتتەۋ توبىنىڭ ولەنا فيميار, تسەديسو ماكوەل, ميشەل سومەرتون سياقتى جەتەكشىلەرىمەن جۇمىس ىستەپ كەلەدى. ناتيجەسىندە اعىلشىن تىلىندە ءبىلىم بەرۋ ماسەلەسى اتالعان مەكتەپتە ءبىرجولا جولعا قويىلادى.
ت.رىسقۇلوۆ اۋدانىنداعى №1 مەكتەپ-ليتسەيى 2015 جىلدان بەرى جاڭارتىلعان ءبىلىم بەرۋ مازمۇنىن اپروباتسيادان وتكىزدى. قاناتقاقتى سىنىپتىڭ مۇعالىمى ايجان شاجاليەۆا ءبىزدى ءوزىنىڭ ساباق ءوتۋ ەرەكشەلىگىمەن تانىستىردى. ياعني, وقۋشىلاردى ءوزى وقىپ وتىرعان ساباققا ىنتالاندىرۋ, ولاردىڭ كوزقاراسىن ءبىلۋ – باستى ماقسات. مۇعالىم وقۋشىلاردىڭ ويلاۋ دەڭگەيلەرىن ءبىلۋ, ءتۇسىنۋ, قولداۋ دەپ ءۇش تۇرگە بولەدى. «ونەر» ساباعىندا «اقىن دەگەن كىم؟» دەگەن ساۋال ارقىلى وقۋشىلاردى كەيىپكەرلەردىڭ ءىس-ارەكەتىن باعالاۋ, تىڭدارماننىڭ نازارىن اۋدارتۋ, ادەبي شىعارمانىڭ جانرىن انىقتاۋ, قاتەنى تابۋ جانە تۇزەتۋ سياقتى ەرەكشەلىكتەرگە ۇيرەتەدى. «ساباقتىڭ ماقساتى – نەگىزگى تىرەك سوزدەر مەن ءسوز تىركەستەرى ارقىلى شىعارمانىڭ تاقىرىبى بويىنشا اقىن تۋرالى ءتۇسىندىرۋ. قۇندىلىقتاردى دارىتۋ بويىنشا وقۋشى ىنتىماقتاستىق, بىرلىك جانە سىيلاستىقتى تۇيسىنەدى. ال وقۋلىقپەن جۇمىس بارىسىندا بالالار ءماتىندى تىزبەكتەپ ىشتەي وقيدى, جۇپپەن تالقىلايدى جانە رولگە ەنىپ ورىندايدى. سوڭىندا بالالاردىڭ ساباققا قانشالىقتى قاتىسقاندارىن وزدەرىنىڭ كومەگىمەن كەرى بايلانىس جاساتۋ ارقىلى بىلەمىز», دەيدى ايجان قويشىعۇلقىزى. سونىمەن قاتار بۇل ايتىلعانداردىڭ, ساباق بارىسىندا جازىلعان دۇنيەلەردىڭ ءبارى دە وقۋشىلارعا اعىلشىن تىلىندە تۇسىندىرىلەدى ەكەن.
ءار مۇعالىمنىڭ ساباق ءوتۋ ءتاسىلى ارقالاي. دەسەك تە جاڭاشىلدىققا ۇمتىلۋ ارقىلى وقۋشىلاردى وزىندىك ويلاۋعا جەتەلەۋ ءاربىر ۇلاعاتتى ۇستازدىڭ ءىسى بولماق. بۇگىندە اتالعان مەكتەپ ينتەراكتيۆتى تاقتالارمەن جابدىقتالعان. سونىمەن قاتار تاريح جانە اعىلشىن تىلىنەن رەسۋرس ورتالىعى, پسيحولوگيالىق جانە مەديتسينالىق ورتالىق تا بار. بۇدان وزگە دە ءبىلىم وشاعىندا وقۋشىلاردىڭ باسەكەگە قابىلەتتىلىگىن ارتتىرىپ, زاماناۋي ءبىلىم الۋعا ءتيىستى مۇمكىندىكتەر قاراستىرىلعان.
حاميت ەسامان,
«ەگەمەن قازاقستان»
جامبىل وبلىسى
