كونفەرەنتسيادا العاشقى بولىپ ءسوز العان پارتيانىڭ فيليال باسشىسى, الماتى قالاسىنىڭ اكىمى باۋىرجان بايبەك بايانداما جاساپ, 2017 جانە 2018 جىلدارى اتقارىلعان شارۋالار جايىندا ەسەپ بەردى. راسىندا دا «نۇر وتاننىڭ» باستاماسىمەن الاتاۋ بوكتەرىندە ورنالاسقان اسەم شاھاردا ءبىراز اۋقىمدى جۇمىستار اتقارىلعان ەكەن. اتاپ ايتساق, قالا كوشەلەرىندە كۇردەلى قۇرلىستار مەن جاڭعىرتۋ جۇمىستارى قارقىندى تۇردە جۇرگىزىلۋدە; جول ايىرىقتار ىسكە قوسىلۋدا; جەر استى جولدارى جاڭا كەيىپكە ەنۋدە; تالاي تۇرعىن ءۇي بوي كوتەرىپ, جاستار ءۇشىن سول پاتەرلەر 5 پايىزدىق جەڭىلدىك نەسيەمەن بەرىلۋدە; «الماتىنى دامىتۋدىڭ 50 جوبالار-درايۆەرلەرى» باستاماسى شەڭبەرىندە 180 ميلليارد تەڭگە سوماسىنا 41 جوبا ىسكە اسىرىلۋدا; الماتى حالىقارالىق اۋەجايى جاڭعىرتىلۋدا; اۆتوبۋس پاركى 30 پايىزعا جاڭارتىلىپ, 500 اۆتوبۋس ساتىلىپ الىندى; قازىرگى كەزدە 2 جاڭا مەترو ستانتسياسىنىڭ قۇرىلىسى جۇرگىزىلۋدە...
وسىلاي تىزبەكتەي بەرسەك, الماتىدا كوپتەگەن وڭدى ىستەر اتقارىلىپ جاتقانىنا انىق كوز جەتكىزۋگە بولادى. اسەم شاھارىمىزدى كوركەيتۋ ماقساتىندا ءالى دە تىندىرىلۋعا ءتيىس شارۋالار جەتەرلىك. بۇل رەتتە دە جۇمىس قارقىندى جۇرگىزىلۋدە. وسىنىڭ بارلىعى دا ەلباسى نۇرسۇلتان نازارباەۆتىڭ قازاقستاننىڭ الەمدەگى ەڭ دامىعان 30 مەملەكەتتىڭ قاتارىنا كىرۋ جونىندەگى جاڭا ستراتەگيالىق ماقساتىن جۇزەگە اسىرۋعا باعىتتالعان يگى شارالار, – دەيدى باۋىرجان بايبەك.
«نۇر وتان» پارتياسى مەملەكەت اۋقىمداعى ماڭىزدى ستراتەگيالىق مىندەتتەردى شەشۋمەن قاتار, ءاردايىم قاراپايىم ادامداردىڭ پروبلەمالارىنا دا كوپ كوڭىل بولۋدە. ءبىر عانا مىسالى, سوڭعى ەكى جىل ىشىندە الماتى قالالىق پارتيا فيليالىنىڭ قوعامدىق قابىلداۋ بولمەسىنە 14 مىڭنان اسا ازاماتتىڭ ءوتىنىشى كەلىپ ءتۇستى. سولاردىڭ ۇشتەن ءبىرىنىڭ شەشىمى تابىلىپ, قالعاندارىنا كونسۋلتاتسيالىق كومەك كورسەتىلىپ, تۇسىنىكتەمەلەر بەرىلدى.
كونفەرەنتسيا بارىسىندا الماتى قالالىق فيليالى ساياسي كەڭەسى مەن باقىلاۋ تەكسەرۋ كوميسياسىنىڭ مۇشەلەرى سايلانىپ, «نۇر وتان» پارتياسىنان الماتى قالاسى ءماسليحاتىنىڭ دەپۋتاتتىعىنا ۇمىتكەرلەر ۇسىنىلدى. سونىمەن قاتار, «كوپشىلىك الدىندا سويلەۋ شەبەرلىگى», «جاڭا بۇقارالىق اقپارات قۇرالدارىنداعى جۇمىس تەحنولوگيالارى» جانە «كاسىپكەرلىكتى دامىتۋ» تاقىرىبىندا سەمينار-ترەنينگ ءوتتى.
عالىم سۇلەيمەن,
«ەگەمەن قازاقستان»
