ەلىمىزدىڭ اتىنان ونەر كورسەتكەن شۋلىق ونەرپازداردى تۇركيا جەرىنە شۋ اۋدانى اكىمىنىڭ ورىنباسارى كلارا قوجاعاپپانوۆا, جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باس مامانى ەركەجان سەمباەۆا, وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى ەلميرا دۇتباەۆا جانە قازاقستاننىڭ ەڭبەك سىڭىرگەن قايراتكەرى اۋەسحان كەلگەنباەۆ باستاپ بارعان بولاتىن.
ونەر مەرەكەسىنىڭ الدىندا جامبىلدىق دەلەگاتسيا ەتيمەسگۋت اۋدانىنىڭ مەرى ەنۆەر دەميرەلدىڭ قابىلداۋىندا بولىپ, اۋليەاتالىق شەبەرلەردىڭ قولىنان شىققان جامبىل جاباەۆتىڭ بەينەسى سالىنعان كىلەمشەنى سىيعا تارتتى. ون كۇنگە سوزىلعان ءداستۇرلى فەستيۆال اياسىندا بىرقاتار تۇركى تىلدەس مەملەكەتتەر مەن تۇركيانىڭ ونەر جۇلدىزدارىمەن قاتار, جامبىلدىقتار دا كورەرمەندەردى ريزا ەتكەن. شارا بارىسىندا شۋ اۋدانىنان بارعان ونەرپازدار «جان ەركەم», «اۋىلىڭ سەنىڭ ىرگەلى» سياقتى حالىق اندەرىمەن قاتار, مايلىقوجانىڭ «وسيەت» تەرمەسىن, ءابدىمومىن جەلدىباەۆتىڭ «ەركەسىلقىم» كۇيىن ورىنداپ, ەسكەندىر حاسانعاليەۆتىڭ «اتامەكەن», مەلس وزبەكوۆتىڭ «تولقيدى شۋىم» اندەرىن شىرقادى. ال انكارا تورىندە قازاق ونەرىن ايگىلەگەن «اسەم اۋەن» فولكلورلىق ءانسامبلىن تۇرىكتىڭ «بەنگۇ» ارناسىنىڭ تىكەلەي ەفيردەن كورسەتۋى دە اتاپ وتۋگە تۇرارلىق جەتىستىك. سونىمەن قاتار ەنۆەر دەميرەلدىڭ كەلەسى جىلى تۇركيادا كۇيشى ءابدىمومىن جەلدىباەۆتىڭ شىعارماشىلىق كەشىن وتكىزۋ تۋرالى ۇسىنىسى دا قازاق مادەنيەتىنە كورسەتىلگەن قۇرمەت. ال ءداستۇرلى فەستيۆال سوڭىندا ەلىمىزدىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى اۋليەاتالىق ونەرپازدارعا العىسىن ءبىلدىردى. بۇدان كەيىن جامبىلدىقتار نيگدە قالاسىندا دا ونەر كورسەتتى.
شۋ اۋدانى اكىمىنىڭ ورىنباسارى كلارا قوجاعاپپانوۆانىڭ ايتۋىنشا, تۇركيانىڭ نيگدە قالاسىنىڭ التاي دەگەن اۋىلىندا كىلەڭ قازاق ۇلتى وكىلدەرى تۇرادى ەكەن. التايلىقتار دا جامبىل وڭىرىنەن بارعان باۋىرلارىن قۇرمەتپەن قارسى الىپ, قانداستار ونەرىن تاماشالاۋ ءۇشىن قالاعا ارنايى كەلىپتى. ايتا كەتەيىك, ون بەس جىل بۇرىن باستاۋ العان ءداستۇرلى فەستيۆالعا وڭىرىمىزدەن وتكەن جىلى ت.رىسقۇلوۆ اۋدانىنىڭ ونەرپازدارى قاتىسىپ قايتقان بولاتىن.
حاميت ەسامان,
«ەگەمەن قازاقستان»
جامبىل وبلىسى
