«قازاقستان مەن گەرمانيا اراسىنداعى ىنتىماقتاستىقتىڭ ديناميكاسى قارىم-قاتىناستىڭ بۇكىل اۋقىمى بويىنشا تۇراقتى دامۋ سيپاتىنا يە بولدى. بۇل تۇرعىدا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن گەرمانيا فەدەراتيۆتىك رەسپۋبليكاسىنىڭ فەدەرالدى پرەزيدەنتى فرانك-ۆالتەر شتاينمايەر جانە كانتسلەرى انگەلا مەركەل اراسىنداعى جوعارى دەڭگەيدە تۇراقتى بايلانىستار ەرەكشە ماڭىزدىلىققا يە», - دەدى ق. ءابدىراحمانوۆ.
قازاقستاننىڭ سىرتقى ساياسي ۆەدومستۆوسىنىڭ باسشىسى ساۋدا-ەكونوميكالىق جانە ينۆەستيتسيالىق سالالاردا ايتارلىقتاي الەۋەتتىڭ بار ەكەندىگىن اتاپ ءوتتى.
قازاقستان گەرمانيانىڭ ورتالىق ازياداعى سىرتقى ساياسي جانە ەكونوميكالىق بەلسەندىلىكتىڭ باسىم باعىتى رەتىندە قاراستىرىلاتىندىعى تۋرالى جانە گفر-دىڭ 2019-2020 جج. ارنالعان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قولداۋ كورسەتكەندىگى ءۇشىن العىس ايتىلدى.
تاراپتار ەكىجاقتى ساۋدا-ەكونوميكالىق ىنتىماقتاستىقتىڭ پەرسپەكتيۆالارىن جەكە تالقىلاپ, قازاقستان مەن گەرمانيا اراسىنداعى تاۋار اينالىمىنىڭ تۇراقتى ءوسۋىن قاناعاتتانارلىقپەن اتاپ ءوتتى. جالپى, 2017 جىلى ەلدەرىمىز اراسىنداعى تاۋار اينالىمى 4,9 ملرد. اقش دوللارعا جەتتى.
ينۆەستيتسيالىق ىنتىماقتاستىقتى تەرەڭدەتۋدە ايتارلىقتاي الەۋەتتىڭ بار ەكەندىگى اتاپ ءوتىلدى. 2017 جىلى قازاقستان ەكونوميكاسىنا گەرمانيانىڭ تىكەلەي ينۆەستيتسيالاردىڭ جالپى اعىمى 345 ملن. اقش دوللاردان استى. جالپى, 2005 جىلعى قاڭتاردان 2018 جىلدىڭ قاڭتارىنا دەيىن گەرمانيادان قازاقستانعا تىكەلەي ينۆەستيتسيالاردىڭ جالپى اعىمى 4,2 ملرد. اقش دوللاردان اسىپ ءتۇستى.
قازاقستان ەكونوميكاسىنا نەمىس ينۆەستيتسيالاردىڭ 90 پايىزدان استامى «شيكىزاتتىق ەمەس» سالاعا, اتاپ ايتقاندا وڭدەۋ ونەركاسىبىنە, حيميا ونەركاسىبىنە, قۇرىلىس ماتەريالدارىن ءوندىرۋ, كولىك جانە اگروكەشەنىنە جاتاتىنى ەرەكشە اتاپ ءوتىلدى. وسىعان بايلانىستى, گەرمانيانىڭ يندۋستريا 4.0 ونەركاسىپتىك تەحنولوگيالاردى ەنگىزۋدەگى جەتىستىكتەرىن ەسكەرە وتىرىپ, اتالعان سالاداعى الداعى ىنتىماقتاستىقتىڭ ماڭىزدىلىعى اتاپ ءوتىلدى. بۇعان شيكىزات, ونەركاسىپتىك جانە تەحنولوگيالىق سالالارداعى ارىپتەستىك تۋرالى ەكى جاقتى كەلىسىم جاقسى دەمەۋ بەرەدى.
تاراپتار ءوزارا ءىس-قيمىلدىڭ قولدانىستاعى جانە جاڭا ينستيتۋتتار ارقىلى ەكى جاقتى بايلانىستاردىڭ ءوسۋ قارقىنىن قولداۋدى جالعاستىرۋعا ۋاعدالاستى.
سونداي-اق, حالىقارالىق كۇن تارتىبىندەگى وزەكتى ماسەلەلەر بويىنشا, سونىڭ ىشىندە سيريا مەن كحدر جانىنداعى جاعداي تۋرالى پىكىر الماستى.
