– بەس جىل ىشىندە 1,7 ميلليون شارشى مەتر تۇرعىن ءۇي پايدالانۋعا بەرىلدى. تۇرعىن ءۇي قۇرىلىسىنىڭ قارقىنى جونىنەن بۇل ءوڭىر رەسپۋبليكادا ءتورتىنشى ورىندا, – دەدى نۇرسۇلتان نازارباەۆ.
قازاقستان پرەزيدەنتى قاراعاندى ءوڭىرىنىڭ ەلىمىزدەگى ەڭ ۋربانيزاتسيالانعان ايماق ەكەنىن ايتىپ, وبلىستاعى بارلىق ەلدى مەكەندە الەۋمەتتىك ينفراقۇرىلىمدى ىلگەرىلەتۋدىڭ ماڭىزدىلىعىن اتاپ ءوتتى.
مەملەكەت باسشىسى ەلىمىزدىڭ كولىك-ترانزيت الەۋەتىن پايدالانۋعا جانە تۇرعىنداردىڭ ءال-اۋقاتىن ارتتىرۋعا باعىتتالعان ستراتەگيالىق دامۋ باعدارلامالارىن ودان ءارى ىسكە اسىرۋ ماسەلەلەرىنە ەرەكشە نازار اۋداردى.
ەلباسى قاراعاندى وبلىسى اكىمىنىڭ بايانداماسىن تىڭداپ, جۇرتشىلىق وكىلدەرىمەن اڭگىمەلەسكەن سوڭ, ءوڭىردىڭ ەكونوميكالىق ءوسىمىن ودان ءارى قامتاماسىز ەتۋ جونىندەگى بىرقاتار باستى مىندەتتەردى شەشۋ قاجەتتىگىن ايتتى.
– بۇل وبلىستا ارنايى ەكونوميكالىق ايماق قۇرىلعان. بۇگىندە مۇندا بارلىعى 15 كاسىپورىن تىركەلسە, سونىڭ تەك التاۋى عانا جۇمىس ىستەپ تۇر. اكىمدىككە ارنايى ەكونوميكالىق ايماقتىڭ الەۋەتىن جانداندىرۋ جونىندە ناقتى شارالار ازىرلەۋدى تاپسىرامىن. ءىرى ينۆەستورلاردى قۇرىلىس, حيميا جانە مەديتسينا يندۋسترياسى, سونداي-اق مەتالل وڭدەۋ سالالارىنا تارتۋ قاجەت, – دەدى مەملەكەت باسشىسى.
سونىمەن قاتار قازاقستان پرەزيدەنتى تۇرعىندارعا جاعداي جاساۋ جانە ولاردىڭ ءال-اۋقاتىن جاقسارتۋ ءۇشىن كاسىپورىنداردىڭ الەۋمەتتىك جاۋاپكەرشىلىگىن ارتتىرۋ قاجەتتىگى جونىندە ايتتى.
سونداي-اق نۇرسۇلتان نازارباەۆ نەعۇرلىم سۇرانىسقا يە ءارى يمپورتتالاتىن تاۋارلار ءوندىرۋ ءىسىن رەتتەپ, كورسەتىلەتىن قىزمەت ساپاسىن جاقسارتۋدى تاپسىردى.
– ءىرى 4 كاسىپورىندا يندۋستريا 4.0 ەلەمەنتتەرىن ەنگىزۋ جوسپارلانىپ وتىر, ال 2 كاسىپورىن «مودەلدى تسيفرلى فابريكا» رەتىندە ايقىندالدى. روبوتتاندىرۋ, جاساندى ينتەللەكت, ونەركاسىپتىك ينتەرنەت كاسىپورىندارعا ەڭبەك ونىمدىلىگى مەن ونىمدەرىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى. بۇل جۇمىستار تۇراقتى جۇرگىزىلۋگە ءتيىس, – دەدى ەلباسى.
سونىمەن بىرگە قازاقستان پرەزيدەنتى كورسەتىلەتىن مەملەكەتتىك قىزمەتتەردى تسيفرلاندىرۋ باعىتىنداعى جۇمىستاردى جانداندىرۋدى جانە قاراعاندى قالاسىن دامىتۋدىڭ ۇزاقمەرزىمدى ستراتەگياسى مەن ونى ىسكە اسىرۋ جونىندەگى جول كارتاسىن ازىرلەۋدى تاپسىردى.
نۇرسۇلتان نازارباەۆ ەل ەكونوميكاسىنداعى بيزنەستىڭ ماڭىزدى ءرولىن اتاپ ءوتىپ, قاراعاندى وبلىسىندا بيزنەستى دامىتۋ كارتاسىن ازىرلەۋدى, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى مەن 2020 جىلعا ارنالعان بيزنەستىڭ جول كارتاسى اياسىندا تۇرعىنداردى كاسىپكەرلىككە بەلسەندى تارتۋدى تاپسىردى.
كەڭەس بارىسىندا مەملەكەت-جەكەمەنشىك ارىپتەستىگى فورماتىنداعى جاڭا جوبالار ازىرلەۋ جۇكتەلدى.
مەملەكەت باسشىسى «بەس الەۋمەتتىك باستامانى» ىسكە اسىرۋ ماسەلەلەرىن ارنايى اتاپ ءوتىپ, ونىڭ ودان ءارى ساپالى جۇزەگە اسىرىلۋىن قامتاماسىز ەتۋدى تاپسىردى. سونداي-اق نۇرسۇلتان نازارباەۆ جوعارى ءبىلىم بەرۋ, دەنساۋلىق ساقتاۋ, تۇرعىن ءۇي قۇرىلىسى جانە وبلىستىڭ تۋريستىك الەۋەتىن دامىتۋ ساپاسىنا قاتىستى پروبلەمالاردى شەشۋ جوسپارىنا توقتالدى.
سونىمەن قاتار مەملەكەت باسشىسى اۋىل تۇرعىندارىن ساپالى اۋىزسۋمەن قامتاماسىز ەتۋ قاجەتتىگىن ايتتى.
باسقوسۋ بارىسىندا جىلۋمەن قامتۋ, وڭىردەگى ەكولوگيالىق قاۋىپسىزدىكتى قامتاماسىز ەتۋ جانە جاسىل تەحنولوگيانى ەنگىزۋ ماسەلەلەرىنە دە ەرەكشە نازار
اۋدارىلدى.
– ءبىر جىلدا ونەركاسىپ كاسىپورىندارىنان اۋاعا 600 مىڭ تونناعا جۋىق زياندى زاتتار شىعارىلادى. بۇل – رەسپۋبليكانىڭ قورشاعان ورتاسىن لاستايتىن زاتتاردىڭ تورتتەن ءبىر بولىگى. اكىمدىككە ۇكىمەتپەن بىرلەسە وتىرىپ, وبلىستاعى ەكولوگيالىق جاعدايدى جاقسارتۋ جونىندە كەشەندى شارالار قابىلداۋدى تاپسىرامىن, – دەدى قازاقستان پرەزيدەنتى.
جيىن سوڭىندا مەملەكەت باسشىسى حالىقتىڭ بىرلىگىن نىعايتۋ جولىنداعى ەلىمىزدىڭ جەتىستىكتەرىنە توقتالىپ, وبلىستى ودان ءارى دامىتۋ ءۇشىن مەملەكەتتىك باعدارلامالاردىڭ جۇزەگە اسىرىلۋىنىڭ ماڭىزى زور ەكەنىن ايتتى.
مەملەكەت باسشىسى نۇرسۇلتان نازارباەۆ كەڭەس وتكىزبەس بۇرىن «Maker» جاۋاپكەرشىلىگى شەكتەۋلى سەرىكتەستىگىنىڭ قاراعاندى قۇيۋ-ماشينا جاساۋ زاۋىتىنا باردى.
قازاقستان پرەزيدەنتى روبوتتاندىرىلعان زاماناۋي قۇرىلعىلارمەن جانە اۆتوماتتاندىرىلعان باسقارۋ جۇيەسىمەن جابدىقتالعان جاڭا ماشينا جاساۋ زاۋىتىنىڭ وندىرىستىك ۇدەرىسىمەن تانىستى.
نۇرسۇلتان نازارباەۆقا وبلىستاعى ينۆەستيتسيالىق جوبالاردىڭ ىسكە اسىرىلۋ جوسپارى باياندالدى, سونداي-اق «قازاقمىس» كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ جۇمىستارى تانىستىرىلدى.
سونىمەن قاتار ەلباسى كاسىپورىن ۇجىمىمەن جانە قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرىمەن اڭگىمەلەستى.
مەملەكەت باسشىسى ەكونوميكانى دامىتۋدىڭ زاماناۋي ۇردىسىنە ساي دۋالدى ءبىلىم بەرۋدىڭ جانە كادرلار دايارلاۋدىڭ ماڭىزدىلىعىن ايتتى.
سوڭىندا قازاقستان پرەزيدەنتى جاس ماماندارعا جۇمىستا زور تابىسقا جەتۋگە تىلەكتەستىك ءبىلدىردى.
قازاقستان پرەزيدەنتى سونداي-اق «قاراعاندى فارماتسەۆتيكا كەشەنى» جاۋاپكەرشىلىگى شەكتەۋلى سەرىكتەستىگىنە باردى.
مەملەكەت باسشىسى وزىق قۇرىلعىلارمەن جابدىقتالعان, وندىرىستىك جوبالىق قۋاتى جىلىنا 4 ميلليون بيوتەحنولوگيالىق ءدارى-دارمەك بۋماسىن شىعارۋعا لايىقتالعان كاسىپورىندى ارالاپ كوردى.
سونىمەن قاتار نۇرسۇلتان نازارباەۆقا وڭىردەگى دەنساۋلىق ساقتاۋ سالاسىن تسيفرلاندىرۋ جانە مەملەكەت-جەكەمەنشىك ارىپتەستىگى اياسىنداعى جوبالاردىڭ ىسكە اسىرىلۋ بارىسى باياندالدى.
نۇرسۇلتان نازارباەۆ سودان كەيىن قاراعاندى قالاسىنىڭ جاڭا ورتالىعىنداعى قۇرىلىس جۇمىستارىمەن تانىستى.
قازاقستان پرەزيدەنتى قاراعاندى قالاسىنىڭ «وڭتۇستىك-شىعىس» اۋدانىندا ورنالاسقان تۇرعىن الابىنىڭ قۇرىلىسىن ارالاپ كوردى. مەملەكەت باسشىسىنا قالانى دامىتۋ ءۇشىن تۇرعىن ۇيلەر مەن الەۋمەتتىك ماڭىزى بار نىساندار سالۋ بارىسى جانە ونىڭ ناتيجەلەرى جونىندە باياندالدى. جاڭا ورتالىق اۋماعىندا بىرقاتار اكىمشىلىك عيماراتتار مەن سپورت كەشەندەرىن, كونتسەرت زالىن, بالالار مەن جاسوسپىرىمدەر ءۇيىن, لوگيستيكالىق كوتەرمە-تاراتۋ ورتالىعىن جانە مەكتەپ سالۋ جوسپارلانعان.
سونىمەن قاتار نۇرسۇلتان نازارباەۆقا «نۇرلى جەر» جانە «نۇرلى جول» باعدارلامالارىنىڭ ىسكە اسىرىلۋ بارىسى, سونىڭ ىشىندە قاپشاعاي – بۋرىلبايتال – بالقاش باعىتىنداعى جولدىڭ قۇرىلىسى مەن وبلىستىڭ ىشكى جولدارىن قايتا جوندەۋ ناتيجەلەرى جونىندە مالىمدەلدى.
قايرات ءابىلدا,
«ەگەمەن قازاقستان»
قاراعاندى
