ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان مىندەتتەردى جۇزەگە اسىرۋ بارىسىندا اقمولا وبلىستىق سۋديالار قاۋىمداستىعىنىڭ اتسالىسۋىمەن دارحان دالانىڭ داناگوي بيلەرىنىڭ قاسيەتتى ەسىمدەرى ۇرپاعىمەن قايتا قاۋىشتى. الەمدەگى ەشبىر حالىقتىڭ تاريحىندا كەزدەسپەيتىن, جالعىز-اق قازاقتىڭ ساناسىندا ساقتالعان, زامانىندا ۇلتىمىزدىڭ قوعامدىق ومىرىنە قالتقىسىز قىزمەت ەتكەن بيلەر قىزمەتى بۇگىندە ونەگە الار بايلىعىمىز ساناتىندا. ءباتۋالى بيلەر شەشىمىنىڭ سالماعى قازاق قوعامىنداعى حان بيلىگىمەن قاتار تۇرعان. حان بيلىگى ءوز بيىگىن قامتاماسىز ەتۋ ءۇشىن بيلەردىڭ بيلىگىنە جۇگىنگەن. ىلكى زاماندا بي ءار ۋاقىتتا حالىقتىڭ اتىنان سويلەدى جانە ونىڭ شىن جاناشىرى بولىپ سانالدى.
تاياۋدا كوكشەتاۋ قالاسىنىڭ بىرلىك شاعىن اۋدانىنداعى بۇرىنعى نوۆوسەلوۆ كوشەسىنىڭ اتى وزگەرتىلىپ, وعان باپان ءبيدىڭ ەسىمى بەرىلدى. باپان تۇرانالى ۇلى – قانجىعالى بوگەنباي باتىردىڭ نەمەرەسى. ارتىنا ولمەيتىن ءسوز, شىندىققا سۋارىلعان شەشىم قالدىرعان كورنەكتى تۇلعا. وسى كوشەگە وبلىستىق سوتتىڭ سۋديالار كورپۋسى ءبيدىڭ بەينەسى كەسكىندەلگەن بيلبورد ورناتتى. مۇنداي يگى ءىس جالعىز ەمەس, وبلىس ورتالىعىنداعى زاپادنايا كوشەسى بايدالى ءبيدىڭ, زاۆودسكايا كوشەسى ساققۇلاق ءبيدىڭ ەسىمدەرىمەن اتالاتىن بولدى.
بايقال ءبايادىل,
اقمولا وبلىسى
«ەگەمەن قازاقستان»
