ءىس-شارا اياسىندا كەلۋشىلەر ۇلتتىق ناقىشتاعى ديزاينەرلىك بۇيىمدارمەن, ءداستۇرلى ونەر كورمەلەرىمەن, قازاقتىڭ ۇلتتىق سپورت تۇرلەرىمەن تانىستى. قۇسبەگىلىك ونەر مەن جۇيرىك تازى يتتەرى دە كورەرمەن نازارىن وزىنە اۋدارىپ, كوشپەندىلەر وركەنيەتىنىڭ تەرەڭ تاريحىنان سىر شەرتتى.
ۇلت مادەنيەتىنىڭ قاتار ەلىندەگى سالتاناتى
مادەني كۇندەردىڭ شوقتىعى بيىك ساتتەرىنىڭ ءبىرى – «Mezzo» ۆوكالدىق توبىنىڭ كونتسەرتى بولدى. ۇجىم الەمدىك كلاسسيكا مەن قازاقتىڭ ۇلتتىق اۋەندەرىن ۇيلەستىرە وتىرىپ, تىڭدارمانعا زاماناۋي مۋزىكالىق تۋىندىلار ۇسىندى. كەش بارىسىندا كورەرمەندەر ورىنداۋشىلاردىڭ جوعارى كاسىبي دەڭگەيىنە ءتانتى بولىپ, ەرەكشە اسەر الدى.
سونىمەن قاتار قاتارداعى قازاقستان مادەنيەتى كۇندەرىندە «جوشى» ەتنو-فولكلورلىق ءانسامبلىنىڭ كونتسەرتى ءوتتى. ۇجىم قازاق حالقىنىڭ باي رۋحاني مۇراسىن ۇلتتىق مۋزىكا ارقىلى جاڭاشا قىرىنان كورسەتتى. دومبىرا, قوبىز, جەتىگەن, سىبىزعى سەكىلدى ءداستۇرلى مۋزىكالىق اسپاپتاردا ورىندالعان شىعارمالار قازاق دالاسىنىڭ كەڭ تىنىسىن, تاريحى مەن تابيعاتىن اۋەنمەن ورنەكتەدى.
ءاربىر كومپوزيتسيا تىڭدارماندى وتكەن مەن بۇگىندى جالعاعان رۋحاني ساپارعا جەتەلەپ, قازاق مادەنيەتىنىڭ تەرەڭدىگىن سەزىندىردى. كونتسەرتپەن قاتار ۇيىمداستىرىلعان ارنايى كورمەدە ۇلتتىق مۋزىكالىق اسپاپتار تانىستىرىلىپ, ولاردىڭ تاريحى, جاسالۋ ەرەكشەلىگى مەن ورىنداۋ تاسىلدەرى تۋرالى كەڭ ماعلۇمات بەرىلدى. قوناقتار قازاقتىڭ ءداستۇرلى ونەرىمەن جاقىن تانىسىپ, ۇلتتىق مادەنيەتتىڭ قىر-سىرىن تەرەڭىرەك ۇعىنۋعا مۇمكىندىك الدى.
قاتارداعى قازاقستان مادەنيەت كۇندەرىنىڭ ۇيىمداستىرىلۋى ەكى ەل اراسىنداعى مادەني ديالوگتى نىعايتىپ, وتاندىق مادەنيەتتى حالىقارالىق دەڭگەيدە ناسيحاتتاۋعا ىقپال ەتتى. الداعى ۋاقىتتا قازاقستاندا قاتار مەملەكەتىنىڭ مادەنيەت كۇندەرىن وتكىزۋ جوسپارلانعان.
