«ەرى جومارت ەلدىڭ قىزى جەتىم بولمايدى». الايدا رەسمي ستاتيستيكاعا سۇيەنسەك اتا-انا قامقورلىعىنسىز قالعان جەتكىنشەكتەردىڭ سانى از ەمەس. ولارعا جان-جاقتى قولداۋ كورسەتۋ بارلىق قوعام مۇشەلەرىنىڭ مىندەتى. جەتكىنشەكتەردى جەتىستىككە جەتەلەگەن بۇل ءتۋرنيردىڭ دە باستى ماقساتى وسى.
جارىس قورىتىندىسىنا سايكەس 13-16 جاس ارالىعىنداعى تەننيسشىلەر سايىسىندا رۋدنىي قالاسىنان كەلگەن ولگا كيم جەڭىمپاز دەپ تانىلدى. تەننيس سپورتىن ەس بىلگەلى جانىنا سەرىك ەتىپ كەلە جاتقان قارشاداي قىزدىڭ ارمانى الەم چەمپيونى اتانۋ. تاعدىر تالكەگىن كورگەن جاسوسپىرىمدەردى قاناتتاندىرىپ, بولاشاعىنا جول اشۋدى كوزدەگەن «پينگ-پونگ» حانشايىمى ءتۋرنيرى ولگانىڭ وسى ارمانىن جاقىنداتقانداي بولدى.
ويتكەنى قاتارلاستارىنان دارا شىققان ورىمدەي قىز 9 بەن 12 جاس ارالىعىنداعى تەننيسشىلەر تارتىسىندا توپ جارعان قاراعاندىداعى «تاڭشولپان» بالالار ءۇيىنىڭ تاربيەلەنۋشىسى ەۆگەنيا تۋزوۆامەن بىرگە شانحاي قالاسىنداعى سپورت مەكتەبىنە بارۋعا مۇمكىندىك الىپ وتىر. ءۇمىت ارتقان قوس قىزىمىز شانحايداعى تاجىريبەلى مامانداردان ارنايى شەبەرلىك دارىستەرىن ۇيرەنبەك. بىلتىر ءدال وسى مۇمكىندىك ءتۋرنيردىڭ وتكەن جىلعى جەڭىمپازدارى ماريا زاموتويلو مەن لاۋرا مۋحامەتجانوۆاعا بۇيىرعان ەدى. قىتاي استاناسى بەيجىڭگە بارىپ ءبىر اپتا بويى تاجىريبەلى مامانداردان ساباق العان سپورتشى قىزدار ۇلكەن سپورتتىڭ قىر-سىرىنا قانىعىپ قايتقان ەدى.
تۋرنير ۇيىمداستىرۋشىلارى بۇعان دەيىن دە جاستاردىڭ سپورتقا دەگەن قىزىعۋشىلىعىن وياتۋ ماقساتىندا ەلىمىزدىڭ تۇكپىر-تۇكپىرىندەگى 100 جەتىمدەر ۇيىنە 100 تەننيس وينايتىن ۇستەل مەن سپورتتىق جابدىقتار سىيعا تارتقان بولاتىن. ەندى بالالار ءۇيىنىڭ تاربيەلەنۋشىلەرى وليمپيادالىق سپورت تۇرىنە ەنەتىن ۇستەل تەننيسىن ويناپ, ەركىن جاتتىعۋ جاساپ شەبەرلىكتەرىن شىڭداي الادى.
جارىستىڭ سالتاناتتى جابىلۋ ءراسىمى كەزىندە تۋرنيرگە قاتىسۋشى بارلىق بالالارعا ماقتاۋ قاعازدارى مەن سىي-سياپاتتار تابىستالدى. جەڭىمپازداردى قۇتتىقتاۋعا ارنايى كەلگەن الماتى قالاسىنىڭ ماسليحات دەپۋتاتى اسىلحان تولەپوۆ, نۇر وتان پارتياسىنىڭ الماتى كالالىق بولىمشەسى توراعاسىنىڭ ورىنباسارى قايىم-مۇنار تابەەۆ, ايگىلى بالۋان يسلام بايرامۋكوۆ جاس سپورتشىلارعا ساتتىلىك تىلەدى.
ارمان وكتيابر,
«ەگەمەن قازاقستان»
الماتى
