ءوڭىر تۇرعىندارى ءۇشىن ماڭىزى زور نىساندى 1997 جىلى «قازتسينك» كومپانياسى 25 جىلعا جالعا العان بولاتىن. «1997 جىلدان بەرى مۇنداعى نەگىزگى قوندىرعىلاردىڭ بارلىعى جاڭارتىلدى. ول ءۇشىن ناقتى جوسپار قۇردىق. ينۆەستيتسيالىق باعدارلامامىز ءار بەس جىل سايىن جاڭارىپ وتىردى. مىنە, سونىڭ ناتيجەسىندە ستانساداعى ترانسفورماتورلاردىڭ بارلىعى اۋىستىرىلدى. سوڭعى 15 جىلدىڭ ىشىندە بىردە-ءبىر رەت توتەنشە جاعداي ورىن العان جوق دەسەك تە بولادى», - دەيدى "قازتسينك" جشس بۇقتىرما سەس كەشەنىنىڭ ديرەكتورى سەرگەي كوبلوۆ.
وتكەن عاسىردىڭ 50 جىلدارى بۇقتىرما بوگەنىن سالۋ كەزىندە كەڭەستەر وداعىندا العاش رەت قاتتى بەتون پايدالانىلعان ەكەن. سودان بەرى جارتى عاسىردان استام ۋاقىت وتسە دە تاۋەلسىز ساراپشىلار بەتوننىڭ بەرىكتىگى ارتىپ كەلە جاتقانىن راستاعان كورىنەدى. بۇقتىرما 2012 جىلى الەمدەگى ەڭ بەرىك بوگەن بولىپ تانىلىپتى. دەسە دە سەس جۇمىسشىلارى ارقانى كەڭگە سالعان ەمەس. نىساندا مەملەكەتتىك جانە تاۋەلسىز تەكسەرۋلەر تۇراقتى تۇردە جۇرگىزىلىپ, قاۋىپسىزدىك شارالارى قاتاڭ باقىلاۋعا الىنعان.
ماماندار ستانساداعى سۋ اگرەگاتتارى ەنەرگەتيكالىق تيىمدىلىگى جوعارى دوڭگەلەكتەرگە اۋىستىرىلعاندىقتان ەلەكتر قۋاتىن وندىرۋگە كەتەتىن سۋدىڭ كولەمى ازايعانىن, بۇل ستانسانىڭ قۋاتتىلىعىن ارتتىرا تۇسكەنىن ايتادى. «قازىر مۇندا وزدىگىنەن جۇمىس اتقاراتىن اسپاپتاردىڭ جيىنتىعى ورناتىلدى. سونىڭ ارقاسىندا استاناداعى ورتالىقتا وتىرىپ-اق, مۇنداعى جۇمىستى باسقارۋعا بولادى. قىزمەتكەرلەر تەلەفون اپپاراتى ارقىلى دا گەنەراتوردىڭ كەز كەلگەن قىزمەتىن توقتاتىپ نەمەسە قايتا قوسا الادى», - دەيدى س.كوبلوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى
