اتالمىش كورمە تورىنە قويىلعان جادىگەرلەر اراسىنان شاقشاق جانىبەكتىڭ نەمەرەسى ىرعىز-تورعاي ءوڭىرىنىڭ اتاقتى ءبيى شەگەن مۇسا ۇلىنىڭ شاپانىن كورىپ كوزايىم بولدىق. بۇل مۇرانى مۋزەيگە ەكى جىلدىڭ الدىندا ءبيدىڭ ءبىر بالاسى بەكتەمىستەن تاراعان تۇقىم-جۇراعاتى ءھام بايىرعى جۋرناليست ساعي ابىلحاسەن ۇلى تاپسىرعان ەكەن. شاپان سۇر ءتۇستى, جولاقتى كەنەپ ماتادان تىگىلىپ, كيىمىنىڭ سىرتىنان جەلبەگەي جامىلۋعا ارنالعان سياقتى. ويتكەنى شاپان استارلانباعان ءارى قاۋسىرما جيەگى التىن تۇستەس سارى جىپپەن كومكەرىلىپتى.
اعارتۋشى التىنساريننىڭ ءومىر-تاريحىن زەرتتەۋشىلەر جاقسى بىلەدى – ىبىراي اتامىز وسى شەگەن ءبيدىڭ ۇلكەن قىزى ايعانىستان تۋادى. ياعني تۋعان جيەنى. ىبىرايدى تورعايعا شاقىرىپ, مەكتەپ اشىپ, بالا وقىتۋىنا كومەك بەرگەن دە وسى كىسى. التىنسارين اتامىز ءوز ەستەلىكتەرىندە ناعاشى اتاسىنىڭ مەكتەپ اشۋعا قالاي كومەكتەسكەنى جايلى اسا ءبىر ماقتانىشپەن اڭگىمەلەيدى. ءتىپتى «ناعاشى اتا» دەيتىن جازباسىندا شەگەن بي ايتتى دەگەن كەرەمەت, ۇلاعاتتى ويلار تىزبەگىن كەلتىرەدى.
شەگەن بي زامانىندا وزىق ويلى ادام بولعان. زەرتتەۋشى ەرتاي قارابالانىڭ جازۋىنشا, بۇل كىسى قايتپاس ەر مىنەزىمەن, باتىرلىعىمەن, ەل بيلەۋدەگى ادىلدىگىمەن, شەشەندىگىمەن دە تانىلعان تۇلعا دەسە, الاش رۋحتى اقىن حاميتبەك مۇساباەۆتىڭ: «كوكىرەگىن كۇيدىرسە دە شەر-شەمەن, كىسىلىكتى ادالدىقپەن ولشەگەن, ايىر ءتىلدى ابىز ءبيدىڭ بىرەۋى, جانىبەك تارحان شوبەرەسى ەر شەگەن» دەگەن جىرى بار.
ىبىراي العاش مەكتەپ اشقاندا وقۋعا بارعان 11 شاكىرتتىڭ تورتەۋى وسى شەگەن ءبيدىڭ تىكەلەي ۇرپاقتارى. ياكي ءبيدىڭ ۇلكەن ۇلى ءبىرىمجاننىڭ بالالارى قورعانبەك پەن ابدىبەك, تاعى ءبىر ۇلى وتەتىلەۋدەن تۋعان نەمەرەسى حايروللا مەن بەكتەمىس دەيتىن ۇلىنىڭ بالاسى ومارلار ەكەن.
وسىلاردىڭ ىشىندە ءبىرىمجانوۆتار اۋلەتى ءوز الدىنا جەكە ديناستيا. ايتالىق ورىنبور گيمنازياسىن, قازان ۋنيۆەرسيتەتىنىڭ زاڭ فاكۋلتەتىن لەنينمەن بىرگە وقىپ, التىن مەدالمەن بىتىرگەن الاش قايراتكەرى احمەت ءبىرىمجانوۆ, الاشوردانىڭ بەلسەندى مۇشەسى عازىمبەك ءبىرىمجانوۆ, ىبىرايدىڭ ءىسىن جالعاستىرۋشى ۇستاز-اعارتۋشىلار – ابدىبەك, قورعانبەك, داۋرەنبەك ءبىرىمجانوۆتار. بۇلاردىڭ سوڭعىسى حيميا عىلىمدارىنىڭ دوكتورى باتىربەك بىرىمجانوۆپەن تۇيىقتالىپ تۇر.
بەكەن قايرات ۇلى,
«ەگەمەن قازاقستان»
