جىلقى مالىن حالقىمىز ەجەلدەن مىنسەڭ – كولىك, جەسەڭ – اس, ىشسەڭ سۋسىن دەپ قاتتى باعالاعان. وكىنىشكە قاراي, كەشەگى كەڭەس زامانىندا الىپ يمپەريانىڭ حرۋششەۆ سىندى اپەرباقان باسشىسى سول قاسيەتتى جىلقى مالىنا قىرعيداي تيگەن. ابىروي بولعاندا ەلىمىز ەگەمەندىككە قول جەتكىزگەننەن بەرگى جەردە اۋزىمىز اققا جاري باستادى. سونىڭ ءبىر ايعاعىنداي, بۇگىندە كەشەگى سەمەي اتوم پوليگونىنىڭ ناق ىرگەسىندەگى سارجال, قاينار اۋىلىنىڭ داڭقى ەندى بال تاتىعان سارى قىمىزىمەن بۇكىل ەل كولەمىندە تانىلىپ قالدى. سارجالدا قىمىز تسەحى جۇمىس ىستەپ تۇر. سونىڭ ناتيجەسىندە قۇتىعا قۇيىلعان قىمىز الىس-جاقىن جەرلەرگە تولاسسىز جونەلتىلۋدە.
ەندى, مىنە, بيىلعى جىلدىڭ ناۋرىز ايىنان بەرى قىمىز ۇنتاعىن دايىنداپ, ونى ءتىپتى شەتەلدەرگە ءجونەلتۋمەن اينالىساتىن «يگەرۋ» اتتى كاسىپورىن ىسكە كىرىسىپ كەتتى. ەلباسىمىزدىڭ قازاقستان حالقىنا ارناعان بيىلعى جولداۋىنا وراي يننوۆاتسيالىق ءۇردىستى يگەرۋ ماقساتىمەن اشىلعان بۇل كاسىپورىن قالادان اباي ەلىنە شىعابەرىستە ورنالاسقان. مۇنداعى قۇرعاق قىمىز ءوندىرىسى نەمىس تەحنولوگياسىمەن ازىرلەنەدى. قازىردە ءجۇز ليتر ساۋمالدان ءۇش كيلو قۇرعاق ۇنتاق الىنۋدا. ەۋروپا ەلدەرىندە ونىڭ ءبىر كيلوسىنىڭ باعاسى 20-25 ەۋرو تۇراتىن كورىنەدى. ال كارى قۇرلىق تۇرعىندارى وعان نەگە قۇمارتىپ وتىر دەگەنگە كەلەتىن بولساق, بيەنىڭ جاڭا ساۋىلعان ءسۇتى انا ءسۇتىنىڭ قۇرامىنا 90 پايىز جاقىندايدى ەكەن. سول سەبەپتەن دە ەۋروپاڭىزدا الگى قىمىز ۇنتاعى نەگىزىنەن كوسمەتولوگيا, فارماتسەۆتيكا سالاسىندا, بالالاردىڭ ديەتالى تاعامدارىنا قولدانىلۋدا. سونداي-اق, بۇل ونىمگە عارىشكەرلەر, الپينيستەر مەن شاحتەرلاردىڭ دا سۇرانىسى ارتىپ وتىرعان كورىنەدى.
وسىنداي يگىلىكتى شارۋامەن اينالىساتىن «يگەرۋ» كاسىپورنى سەمەيدەگى «يبراەۆ-ك» وندىرىستىك كووپەراتيۆىنىڭ قۇرامىندا جۇمىس جاساپ جاتىر. اتالعان كووپەراتيۆتىڭ باس ديرەكتورى عابباس يبراەۆ بۇرىن تەمىر جول سالاسىنداعى ەرەن ەڭبەگىمەن كوزگە تۇسسە, ەندى تىڭ باستامانى قولعا الىپ وتىر. ونىڭ سان-سالالى ەڭبەگى ەسكەرۋسىز قالىپ وتىرعان جوق. سونىڭ ايعاعىنداي, ول بۇگىندە وبلىستىڭ قۇرمەتتى ازاماتى, وبلىستىق ءماسليحاتتىڭ دەپۋتاتى. «يگەرۋدىڭ» يگىلىگىن ەل كورىپ جاتسا, ماقساتىمىزدىڭ ورىندالعانى دەيدى ول.
داۋلەت سەيسەن ۇلى.
سەمەي.
