استانانىڭ 20 جىلدىعىنا وراي ۇيىمداستىرىلعان ءىس-شاراعا ەلىمىزدەگى جانە شەتەلدىك تانىمال اقىندار قاتىسادى. اتاپ ايتقاندا شىعارماشىلىق كەشكە فينليانديالىق اقىن, ەسسەشى, سلاۆيان, ورىس ادەبيەتىنىڭ اۋدارماشىسى يۋككا ماللينەن, اقىن, جەتپىس كىتاپتىڭ اۆتورى, شانحاي ۋنيۆەرسيتەتىنىڭ پروفەسسورى وۋيانگ يۋ, فرانتسۋز جازۋشىسى, پۋبليتسيست جانە اۋدارماشى, پروزاشى تەرري مارينياك, اقىن, باسپاگەر, سۋرەتشى مالگوجاتا ماحلەۆسكايا, اقىن, باسپاگەر گاگيك داۆتيان, اقىن ليۋبوۆ كراساۆينا, اقىن, پروزاشى, سىنشى, «ليتەراتۋرنىي گازەتى» اتتى گازەتتىڭ باس رەداكتورى ماكسيم زامشەۆ, اقىن سەرگەي مناتساكانيان, اقىن, اۋدارماشى ميحايل سينەلنيكوۆ قاتىسادى.
«مادەنيەت جانە سپورت مينيسترلىگىنىڭ ۇيىمداستىرۋىمەن وتكەلى وتىرعان «اق وردالى استانا» حالىقارالىق پوەزيا كەشىنىڭ بەرەرى مول ەرەكشە ءىس-شارا بولعالى تۇر. وسى كۇنگە دەيىن ءبىزدىڭ قالامگەرلەر شەت ەلدەرگە بارىپ ولاردىڭ استانالارىن جىرعا قوسسا, ەندى مىنە, تاۋەلسىزدىكتىڭ ارقاسىندا ءبىزدىڭ استاناعا شەت ەل اقىندارى جىر ارناماق. بۇل قازاق ەلىنىڭ جەتكەن جەتىستىگى, مارتەبەسىنىڭ وسكەنى. ارينە, مۇنداي باسقوسۋ ءبىز ءۇشىن وتە قاجەت. اقىن-جازۋشىلار دا ەركىن تاجىريبە الماسىپ, شەت ەل اقىن جازۋشىلارىمەن تەڭ تۇرىپ سويلەپ, كەڭ تۇرىپ كوسىلىپ جۇمىس ىستەيتىندەي دارەجەگە جەتكىزەتىن وسى ءبىر حالىقارالىق پوەزيا كەشىن ەرەكشە كۇتىپ جۇرگەن جايىمىز بار. شەت ەلگە بەرەرىمىز دە, شەت ەلدەن الارىمىز دا كوپ», دەيدى بەلگىلى اقىن باۋىرجان قاراعىز ۇلى
ەرلان ءجۇنىس, اقىن, قجو الماتى وبلىستىق فيليالىنىڭ ديرەكتورى:
«قازاق دالاسى قاي عاسىردا دا الەم تاريحشىلارى, مادەنيەتتانۋشىلار, اقىندار مەن عالىمدار ءۇشىن تاڭعاجايىپ كەڭىستىك – التىن ساندىق ىسپەتتى بولعان. كونە قالالارىمىز – تاراز بەن ءسۇياب, فاراب پەن ياسى جونىندە قالام تارتپاعان, جىرىنا وزەك, جازباسىنا ارقاۋ قىلماعان شايىرلار مەن حاكىمدەر نەكەن-ساياق. تاۋەلسىزدىك العاننان كەيىنگى جىلدارى جاڭا قازاقستان الەم عالىمدارىنىڭ, ءدىن باسىلارىنىڭ, ساياساتتانۋشىلاردىڭ پىكىرلەسۋ الاڭىنا اينالدى. قر مادەنيەت جانە سپورت مينيسترلىگىنىڭ «استانا – الەم اقىندارى كوزىمەن» اتتى اۋقىمدى ءىس-شاراسى الەم قالامگەرلەرى مەن ەل قالامگەرلەرى اراسىندا التىن كوپىر بولاتىندىعىمەن قۋانتادى. استانانى جىرلاۋ – قازاق ەلىنىڭ وتكەنى مەن بۇگىنىن, جارقىن كەلەشەگىن, ونىڭ اسقاق ارماندارى مەن اسىل مۇراتتارىن جىرلاۋ. وسى تۇرعىدان كەلگەندە بۇل ءىس-شارا مادەني وقيعا بولعالى تۇر دەپ سانايمىن».
