ءدال ەل تاۋەلسىزدىگىنىڭ 20 جىلدىق مەرەيتويى ءوتىپ جاتقان تاريحي ساتتە مۇنداي سۇمدىق وقيعا بولادى دەپ كىم ويلاعان؟ جاڭاوزەندەگى جاعدايدى تەلەديداردان كورىپ, جاعامدى ۇستادىم. بۇزاقىلاردىڭ ىستەپ جۇرگەندەرى مۇلدەم دۇرىس ەمەس. بەيقام جاتقان ەلدىڭ شىرقىن بۇزىپ, دۇرلىكتىرىپ جىبەردى. قاشاندا حالىقتىڭ تىنىشتىعىن, بەرەكە-بىرلىگىن تىلەپ وتىراتىن ءبىز سياقتى اعا ۇرپاق وكىلدەرى مۇندايعا جول بەرگەن اعايىندارعا وكپەلىمىز.
مەنىڭشە, بۇل مۇنايشىلاردىڭ ءوز تاراپىنان جاساعان ارەكەتى ەمەس, سىرتتان ىقپال ەتىپ وتىرعان ارانداتۋشى كۇشتەردىڭ جىمىسقى ساياساتى دەپ بىلەمىن. ويتكەنى, ءبىزدىڭ ەلىمىز وسى جيىرما جىلدا ءوسىپ, وركەندەپ, باسقا مەملەكەتتەر قىزىعا دا قىزعانا قارايتىنداي قارىشتاپ دامىپ كەتتى. ەل ىشىندەگى ايرانداي ۇيىعان تاتۋلىق پەن تۇراقتىلىقتىڭ ءناتيجەسىندە قازاق ەلى ءوزىنىڭ ىشكى-سىرتقى ساياساتىن ساۋاتتى ءجۇرگىزىپ, بارلىق جاعىنان الدىڭعى قاتارعا شىقتى. ءمىنە, وسى جەتىستىگىمىزدى كورە المايتىندار, ءىشتارلىق ەتۋشى جات پيعىلدى كۇشتەر جاڭاوزەندەگى وقيعاعا تىكەلەي اسەر ەتىپ, بۇزاقىلاردىڭ قولىمەن وت كوسەگىسى كەلدى. بىراق ءبىز بۇعان الدانىپ, ارانداپ قالماۋىمىز كەرەك. ەلدەگى تەنتەكتەردى تەزگە سالىپ, ءتيىستى جازاسىن بەرۋگە ءتيىسپىز. ال ارام ويلارىن جۇزەگە اسىرماق بولعان سىرتقى كۇشتەرگە مەملەكەت تاراپىنان مىقتى توسقاۋىل قويىلسا, جاقسى بولار ەدى. مۇنداي قيىن-قىستاۋ شاقتا ءوز ىشىمىزدە الاۋىزدىق تانىتپاي, الىپقاشپا سوزگە ەرىپ ءدۇرلىكپەي, ءبىر شاڭىراقتىڭ استىنا توپتاسىپ, قازاقستاندى ارانداتۋشى توپتاردان اراشالاپ قالۋعا تىرىسايىق.
شىعىس قازاقستان وبلىسىنداعى ارداگەرلەر جانە اقساقالدار كەڭەسىنىڭ مۇشەلەرى ماڭعىستاۋلىق مۇنايشىلاردى وسىنداي سىن ساتتە سابىرلىلىق ساقتاپ, تاۋەلسىزدىكتىڭ ءتاتتى جەمىسىن تاتا بەرۋگە شاقىرادى. ەل تىنىشتىعىن ويلاپ, بولاشاقتا قازاقستاننىڭ قارىشتاپ العا باسا بەرۋىنە ۇلەس قوسايىق, اعايىندار. مەن ءوزىم 40 جىل بويى وسكەمەن قورعاسىن-مىرىش كومبيناتىندا قاراپايىم مەتاللۋرگ بولىپ ەڭبەك ەتتىم. قاجىرلى ەڭبەگىم لايىقتى باعالانىپ «ەڭبەك داڭقى» وردەنىنىڭ تولىق يەگەرى اتاندىم. بۇل «ەڭبەك ەرى» دەگەن اتاققا پارا-پار. دەمەك, ەل يگىلىگى ءۇشىن ادال ەڭبەك ەتكەنگە نە جەتسىن!
قايىربەك ايجىگىتوۆ, ارداگەر مەتاللۋرگ, «ەڭبەك داڭقى» وردەنىنىڭ تولىق يەگەرى.
وسكەمەن.
