تاراز قالاسىنداعى «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىندا» اعىمداعى جىلى مامىر ايىندا تۇڭعىش رەت بۇيرەككە ترانسپلانتاتسيا جاسالعانىن جازعان بولاتىنبىز. جامبىلدىق ازاماتقا تۋعان اعاسى ءبىر بۇيرەگىن بەرىپ, وعان العاشقى وتانى قازاقستان رەسپۋبليكاسىنىڭ اعزالاردى ترانسپلانتتاۋ جونىندەگى ۇلتتىق ۇيلەستىرۋشىسى جاقسىلىق دوسقاليەۆ جاساعان ەدى. ناتيجەسىندە بۇيرەك دەرتىنە شالدىققان ازامات ساۋىعىپ, ءارى بۇل وتاندىق مەديتسينا تاريحىندا ايتارلىقتاي جەتىستىك رەتىندە باعالاندى. سول جولى ترانسپلانتولوگ-دارىگەردىڭ اسسيستەنتى تاراز قالاسىنداعى «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىنىڭ» مامانى عاني قۇتتىمۇراتوۆ بولعان.
اتالعان ورتالىقتى بۇل كۇندە ەلىمىزگە تانىمال عالىم سەيىتحان جوشىباەۆ باسقارادى. مىنە, تاراز جەرىندە تۇڭعىش رەت جاسالعان بۇيرەك ترانسپلانتاتسياسىنان سوڭ, بىرقاتار شەت مەملەكەتتەردىڭ ازاماتتارى اتالعان كلينيكاعا كەلە باستاپتى. ناتيجەسىندە گرۋزيا جانە قىرعىز مەملەكەتتەرىنىڭ ازاماتتارى وتا جاساتۋ ءۇشىن وسى ورتالىقتى تاڭداعان. ايتا كەتۋ كەرەك, تاراز قالاسىنداعى «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىندا» بۇگىندە سالا بويىنشا دوكتورانتۋرا دارەجەسىن شەتەلدە وقىعان بىلىكتى ماماندار جۇمىس ىستەيدى. سونىمەن قاتار, اتالعان كلينيكا ەلىمىزدىڭ وڭتۇستىك ايماعىنداعى جەتەكشى ورتالىق بولىپ سانالادى.
اتالعان كلينيكادا تۇڭعىش رەت بۇيرەك الماستىرۋ ترانسپلانتاتسياسىنان ءتورت اي وتكەن سوڭ, گرۋزيا جانە قىرعىز ازاماتتارىنا بۇيرەك الماستىرۋ وپەراتسيالارى جاسالدى. وتانى استانا قالاسىنداعى ۇلتتىق عىلىمي ونكولوگيا-ترانسپلانتولوگيالىق ورتالىعىنان اۋىسىپ كەلگەن تاجىريبەلى مامان عاني قۇتتىمۇراتوۆ جاسادى. عاني مۇرات ۇلى بۇگىندە وسى «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعى» ديرەكتورىنىڭ ورىنباسارى بولىپ جۇمىس ىستەيدى. ونىڭ ايتۋىنشا, مۇندا العاشقى بۇيرەك الماستىرۋ وپەراتسياسى جاسالعان مامىر ايىنان بەرى 3-4 بۇيرەك الماستىرۋ وتاسىن وزدەرى جاساپتى. ونىڭ بىرەۋى عانا ەل ازاماتى بولسا, قالعانى شەتەل ازاماتتارى ەكەن. ەندى توعىزىنشى رەت شەتەل ازاماتتارىنا وتا جاسالدى. قىرعىز ەلىنىڭ 62 جاستاعى ازاماتىنا 35 جاستاعى نەمەرە ءىنىسى بۇيرەگىن بەرىپتى. گرۋزيا ازاماتىنىڭ دا جاعدايى وسىعان ۇقساس ەكەن. ونىڭ تۋىستارى دا ناۋقاستىڭ ءومىرىن ساقتاپ قالۋ ءۇشىن ترانسپلانتاتسيا جاساۋعا كەلىسىپتى.
ترانسپلانتولوگ عاني قۇتتىمۇراتوۆ ەلىمىزدە بۇيرەككە مۇقتاج جانداردىڭ كوپ ەكەنىن ايتتى. ال قازىرگى كەزدە اعزالار تەك ءتىرى دونوردان عانا الىنۋدا. دەي تۇرعانمەن, كەز-كەلگەن ادام ءۇشىن اعزاسىنىڭ ءبىر بولشەگىن بەرۋ وڭاي ەمەس. سوندا دا بولسا قايىرىمدى ازاماتتار تۋىستارىنىڭ ءومىرى ءۇشىن وسىنداي ەرلىككە بارىپ وتىر. ماسەلەن ءبىر عانا جامبىل وبلىسىندا 250-گە تارتا ازامات ترانسپلانتاتسيا جاساتۋ ءۇشىن ايلاپ اۋرۋحانا توسەگىنە تاڭىلىپ, دونور كۇتۋدە ەكەن. ەلىمىزدە ولاردىڭ سانى ءۇش جارىم مىڭنان اسادى. ءتىپتى كەيبىر ناۋقاس ازاماتتار جاساندى بۇيرەكتىڭ قىزمەتىنە جۇگىنۋگە ءماجبۇر.
ادامنىڭ قاي جەرى اۋىرسا, جانى سول جەردە. كەيبىر ازاماتتارعا دونور تابىلىپ, ءساتتى وپەراتسيا جاسالعانىمەن, كوپشىلىك ءۇشىن بۇل ماسەلە ءالى وزەكتى. الايدا تاراز قالاسىنداعى بىلىكتى ماماندار جۇمىس ىستەيتىن «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعى» تالاي جاننىڭ ءومىرىن ساقتاپ قالۋدا ەڭبەك ەتىپ, وتاندىق مەديتسينانىڭ دامۋىنا ۇلەس قوسىپ كەلەدى.
حاميت ەسامان,
«ەگەمەن قازاقستان»
جامبىل وبلىسى
