بەلگىلەنگەن قۇزىرەتتىلىك شەگىندە رەتتەۋشىلىك, ىسكە اسىرۋ جانە باقىلاۋ فۋنكتسيالارىن جۇزەگە اسىراتىن ورگان ايماقتاعى مەملەكەتتىك مەكەمەلەردىڭ كادرلىق جاي-كۇيىنە مونيتورينگ جۇرگىزىپ, اقتاۋ قالاسى اكىمى اپپاراتى, ماڭعىستاۋ اۋدانى اكىمى اپپاراتى, قاراقيا اۋدانى اكىمى اپپاراتى, ماڭعىستاۋ وبلىسىنىڭ قارجى باسقارماسى جانە ماڭعىستاۋ وبلىسىنىڭ ىشكى ىستەر دەپارتامەنتىنەن بىرقاتار كەمشىلىكتەردى انىقتاعان. ايتۋلارىنشا, كادر قىزمەتتەرىنىڭ جۇمىسى جاۋاپتىلىقتى تالاپ ەتكەندىگىنە قاراماستان, كاسىبي تاجىريبە, ءبىلىمى مەن دايارلىعىنىڭ تەپە-تەڭدىگىنىڭ بولماۋىنان وسىنداي ماسەلەلەر تۋىنداپ وتىر.
الدىمەن انىقتالعانى - اۋماقتىق دەپارتامەنتتەر مەملەكەتتىك ورگانداردىڭ ينتەرنەت پورتالىنا (مويپ) ۋاقىتىلى ەسەپتەلىكتى جۇكتەۋ مىندەتتەلگەنىنىڭ ءوز دەڭگەيىندە ورىندالمايتىنى. ولاردىڭ قاتارىندا يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ ماڭعىستاۋ وبلىسى بويىنشا دەپارتامەنتى, ماڭعىستاۋ وبلىسىنىڭ ىشكى ىستەر دەپارتامەنتى, تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ ماڭعىستاۋ وبلىسى بويىنشا دەپارتامەنتى جانە وبلىستىق قوعامدىق دەنساۋلىقتى ساقتاۋ دەپارتامەنتى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسى بويىنشا دەپارتامەنت باسشىسى نۇرگۇل جاننازاروۆا بارلىق ەسەپتىك اقپاراتتاردىڭ دايەكتىلىگىن, ساپالىلىعىن جانە مەرزىمىنىڭ ساقتالۋىن قاداعالاۋ قاجەتتىگىن ەسكە سالدى. اسىرەسە پەرسونالدى باسقارۋ قىزمەتتەرى ماماندارىنىڭ ءوز مىندەتتەرىنە سالعىرت قاراماي, ەسەپتىلىكتىڭ ماڭىزدىلىعىن ءتۇسىنىپ, جاۋاپكەرشىلىكتى سەزىنۋگە شاقىردى.
- اعىمداعى جىلدىڭ ءىىى توقسانىنان باستاپ ستاتيستيكالىق ەسەپتى «ە-قىزمەت» اقپاراتتىق جۇيەسىندە جولداۋ تاپسىرىلعان. الايدا ۋاقىتىلى ورىندالماعان جانە ەنگىزىلمەگەن قۇجات اينالىمدار, سونىمەن بىرگە قاتە ەنگىزىلگەن قۇجاتتار وسى ەسەپتىلىكتىڭ كەزىندە انىقتالاتىن. بۇدان باسقا تەكسەرىس بارىسىندا, مەملەكەتتىك مەكەمەلەردىڭ اۆتوماتتىق جۇيەدە قۇجات اينالىمىنىڭ كورسەتكىشى تومەن بولىپ شىقتى. سونداي-اق, 2018 جىلدىڭ 1 تامىزى بويىنشا تازا اۋىسىمدىلىق – 27 (2%) ادام بولسا, وتكەن جىلدىڭ ەسەپتىك كەزەڭىندە بۇل كورسەتكىش 59 (4,4%) ادامدى قۇراعان. وتكەن جىلمەن سالىستىرمالى تۇردە تازا اۋىسىمدىلىقتىڭ سانى 2,2 ەسەگە ازايعاندىعىن بايقاۋعا بولادى. اگەنتتىكتىڭ ستراتەگيالىق جوسپارىنا ەنگىزىلگەن كورسەتكىشتەر بويىنشا وسى جىلعا تازا اۋىسىمدىلىق دەڭگەيى – 7,5% اسپاۋى قاجەت دەپ بەلگىلەنگەن بولاتىن. الايدا, اۋداندار بولىنىسىندە قىزمەتتەن ءوز ەركىمەن كەتۋ دەرەكتەرىنىڭ كوپتىگىنەن العاشقى ورىنداردا اقتاۋ قالاسى(4%), جاڭاوزەن قالاسى(4%) تۇرسا, باسقارمالار بولىنىسىندە قىزمەتتەن ءوز ەركىمەن كەتۋ دەرەكتەرىنىڭ كوپتىگىنەن العاشقى ۇشتىكتى جولاۋشىلار كولىگى جانە اۆتوموبيل جولدارى باسقارماسى 33,3%, ەنەرگەتيكا جانە كوممۋنالدىق شارۋاشىلىق باسقارماسى 15%, دەنساۋلىق ساقتاۋ باسقارماسى 14,8% قۇرايدى, دەيدى دەپارتامەنت باسشىسى.
2018 جىلدىڭ 1 قاڭتارىنداعى جاعدايى بويىنشا بوس ورىندار سانى 159 بىرلىكتى قۇرادى. قازىرگى تاڭدا جالپى شتاتتىق بىرلىكتىڭ 93,3% (89,9%) قامتىلعان. الايدا, وبلىس بويىنشا وتكەن جىلمەن سالىستىرعاندا 2018 جىلدا تەستىلەۋگە قاتىسىپ, مەملەكەتتىك قىزمەتكە قىزىعۋشىلىق ءبىلدىرىپ جاتىرعان ۇمىتكەرلەردىڭ سانىنىڭ 2,1 ەسە ارتقاندىعىنا قاراماستان, كەيبىر مەملەكەتتىك مەكەمەلەردىڭ بوس ورىندارى تولىقتىرىلا الماي كەلەدى.
سونداي-اق, اعىمداعى جىلدىڭ 6 ايىنىڭ كورسەتكىشى بويىنشا جەكە جانە زاڭدى تۇلعالاردىڭ وتىنىشتەرىن قاراۋ ناتيجەسىندە 11 مەملەكەتتىك قىزمەتشى ءارتۇرلى دارەجەدە تارتىپتىك جاۋاپكەرشىلىككە تارتىلعان. ال, 2017 جىلدىڭ 12 ايىندا بۇل كورسەتكىش 14 ادامدى قۇراعان. سوندا وڭىرىمىزدە مەملەكەتتىك قىزمەتشىلەردىڭ تاراپىنان جىلدان جىلعا زاڭ بۇزۋشىلىققا جول بەرۋ دەرەگى ارتۋدا ما دەگەن سۇراق تۋىندايدى؟ وڭىردەگى ءبىر-جار باسقارمالار مەن اۋدان اپپاراتىنىڭ قىزمەتكەرلەرى «ەسكەرتۋ» السا, مەملەكەتتىك دەپارتامەنت وكىلى «قاتاڭ سوگىس» ارقالاعان, ال تارتىپتىك جازاعا تارتىلعاندار قاتارىندا اقتاۋ قالاسى اكىمى اپپاراتى 2 قىزمەتشىسى, يندۋستريالىق دامۋ جانە ونەركاسىپ قاۋىپسىزدىگى كوميتەتىنىڭ وبلىستىق دەپارتامەنتىنىڭ 3 قىزمەتشىسى بار.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسى بويىنشا دەپارتامەنتىنە تۇسكەن ارىزدارعا ساي نەگىزسىز بەرىلگەن سىياقىنى بيۋدجەتكە قايتارۋ تۋرالى 2 ۇسىنىس جولدانىپ, 174 745 تەڭگە مەملەكەت بيۋدجەتىنە وندىرىلسە, 2018 جىلدىڭ 6 ايىندا 6 قىزمەتشى ارنايى قورعا 10 زاڭسىز سىيلىق تاپسىرعان, بۇل كورسەتكىش وتكەن جىلى 2 قىزمەتشى تاراپىنان 3 سىيلىق تاپسىرىلعان بولاتىن. قاتاڭ تىيىم سالىنسا دا, زاڭسىز سىيلىق الۋدىڭ ازايماي, كەرىسىنشە, سالىستىرمالى تۇردە كوبەيگەنى الاڭداتادى.
ماڭعىستاۋ وبلىسىنداعى مەملەكەتتىك قىزمەت كادرلارى جاي-كۇيىنىڭ مونيتورينگى ءالى دە جۇرگىزىلەدى. بۇل رەتتە پەرسونالدى باسقارۋ قىزمەتتەرىنىڭ جاۋاپتى ماماندارىنا ءبىلىمىن جەتىلدىرىپ, بىلىكتىلىگىن ارتتىرۋعا كەڭەس بەرىلىپ, كادر ماسەلەسىندە كەمشىلىكتەرگە جول بەرمەس ءۇشىن, باسقوسۋلاردا پىكىر الماسىپ وتىرۋ قاجەت ەكەندىگى ايتىلدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
