جاقىندا استانانىڭ 20 جىلدىق مەرەيتويىن ابىرويمەن وتكەردىك. وسى تۇستا الماتى وبلىسىنىڭ اكىمدىگى ەلورداداعى بۇرىنعى «اراي» دەمالىس ورنىن قايتا جاساقتاپ, وعان «جەتىسۋ» دەگەن اتاۋ بەردى. جاڭا دەمالىس ورنىنا اينالعان «جەتىسۋ» ساياباعى جەرۇيىق ولكەنىڭ ارقا توسىنە كوشكەن ءبىر اسەم بولشەگىندەي بولىپ شىعا كەلدى. جالپى, جەتىسۋدىڭ جەتى كەرەمەتىن كوزبەن كورىپ, سەزىنۋ ءۇشىن استاناداعى ساياباقتى ارالاۋ كەرەك. وسى ساياباقتاعى نەگىزگى نىشاننىڭ ءبىرى اپورت اعاشىنىڭ التىن جالاتىلعان ءمۇسىنى بولسا كەرەك. كەلۋشىلەردىڭ كوزىنە وتتاي باسىلاتىن الاڭقايدىڭ ءوزى دە «اپورت الاڭى» دەپ اتالادى. وسى «مولشىلىق» دەپ اتالاتىن كومپوزيتسيا يدەياسى – قازاق الماسىنىڭ وتانىنا دەگەن قۇرمەت. جەتىسۋ, ونىڭ ىشىندە الماتى توپىراعى اپورتتىڭ التىن تامىرىنا ءنار بەرىپ تۇرعان كيەلى مەكەن ەكەنى اقيقات.
جالپى, بۇل جەردە ءبىر ىزگى ماقسات بايقالادى. جەتىسۋدىڭ جاۋھارىنا اينالعان اپورت كوشەتىن ارقانىڭ اتاسى بولەك تابيعاتىنا جاقىنداتىپ, المانىڭ ءدال وسى ءتۇرىن استانادا وسىرۋگە دەگەن قۇلشىنىس بار. ويتكەنى «جەتىسۋ» ساياباعىن ارالاعان ادام اڭعارادى, مۇندا الماعا قاتىستى كوپتەگەن دەكوراتسيالار مەن ەلەمەنتتەردەن بولەك, كادىمگى الما كوشەتتەرى ەگىلگەن. قازىر 400 ءتۇپ جەمىس اعاشى ءوسىپ تۇر.
– جەتىسۋدى المانىڭ وتانى دەيمىز. ال استانا – وتانىمىزدىڭ جۇرەگى. دەمەك, الماتىنىڭ اپورتى ەلوردانىڭ اينىماس بولىگىنە اينالۋى كەرەك. ساياباقتى جوسپارلاعاندا وسىنى ماقسات ەتتىك. بۇل جەر جەتىسۋ ولكەسىنىڭ اينىمايتىن كوشىرمەسى عانا ەمەس, ءتۇبى استانانى ماۋەلى باققا اينالدىراتىن ابات مەكەن بولسىن دەدىك. الما كوشەتتەرىن تاڭداپ ەككەنىمىز سوندىقتان. 400 ءتۇپ اپورت اعاشى ەگىلدى. استانادا اپورت ءيىسى اڭقىپ, جەمىسىن ۇرپاقتارىمىز جەيتىنىنە سەنەمىن, – دەيدى بۇل جايىندا الماتى وبلىسىنىڭ اكىمى اماندىق باتالوۆ.
ەلباسى نۇرسۇلتان نازارباەۆ جەتىسۋداعى الما باقتاردىڭ ازايىپ كەتكەنىنە الاڭداۋشىلىق ءبىلدىرىپ, جەمىس اعاشتارىن قالپىنا كەلتىرۋدى مىندەتتەگەن بولاتىن. قازىر وبلىستا بۇل جۇمىس جۇيەلى تۇردە جۇرگىزىلىپ جاتىر. وڭىردە 23 مىڭ گەكتار جەمىس باعى بولسا, ونىڭ 1500 گەكتارىنا تەك اپورت كوشەتتەرى ەگىلگەن ەكەن. بيىل وسى القاپتىڭ 743 گەكتارى ماۋە سالىپ, جەمىس بەرە باستاپتى.
...توقەتەرىن ايتقاندا, اپورت ءيسى الماتىنىڭ باقتارىندا عانا ەمەس, استانانىڭ ساياباعىندا دا اڭقىپ, ءتاتتى الما ارقا توسىنەن ماۋەلەيتىن كۇن جاقىن.
قالماحانبەت مۇقامەتقالي,
«ەگەمەن قازاقستان»
