دۇيسەنبى كۇنى كورەيا حالىق-دەموكراتيالىق رەسپۋبليكاسىنىڭ (كحدر) مەملەكەتتىك تەلەديدارى سولتۇستىك كورەيا رەسپۋبليكاسىنىڭ ليدەرى كيم چەن ءيردىڭ ومىردەن وزعانىن حابارلادى. رەيتەر اقپارات اگەنتتىگىنىڭ تاراتقان اقپاراتتارى بويىنشا, كحدر باسشىسى 17 جەلتوقساندا جۇرەك تالماسىنان قايتىس بولعان.
كيم چەن ير سولتۇستىك كورەيانى 1994 جىلدان ءۇزىلىسسىز 17 جىل باسقاردى. كەيبىر اقپارات كوزدەرىنە قاراعاندا, ونىڭ كەنەتتەن قايتىس بولۋى 2008 جىلى العان جۇرەك تالماسىنىڭ سالدارى بولسا كەرەك. كورەيا كوسەمى 70 جاسقا بىرنەشە ايداي ۋاقىت قالعاندا كوز جۇمىپ وتىر. شەتەلدىك باق-تار ونىڭ سول كەزدەن باستاپ قولىنداعى بيلىگىن كىشى ۇلى كيم چون ىنعا بىرتىندەپ بەرە باستاعانىن ايتادى. قازىرگى كەزدە كحدر بيلىگىن كيم چون ىنعا تاپسىرۋ ۇدەرىسى ءجۇرىپ جاتىر. ال كيم چەن ءيردى جەرلەۋ ءراسىمى 28 جەلتوقساندا پحەنياندا وتەدى.
تۇتقىنداۋعا وردەر بەردى
يراك سوتى ەلدىڭ ۆيتسە-پرەزيدەنتى تاريك ءال-حاشەميدى تۇتقىنداۋعا وردەر بەردى. فرانس-پرەسس اگەنتتىگىنىڭ حابارلاۋىنشا, ول انتيتەررورلىق زاڭنامالاردى بۇزعان كورىنەدى. يراك ىشكى ىستەر ءمينيسترىنىڭ مەملەكەتتىك تەلەديدارعا بەرگەن سۇحباتىندا كەلتىرىلگەن دەرەكتەر بويىنشا, تاريك ءال-حاشەميدىڭ كۇزەتشىلەرى تەررورلىق ارەكەتتەر جاساۋدى جوسپارلاعان. ۆيتسە-پرەزيدەنتتىڭ ءوزى ولارعا قولداۋ كورسەتكەن جانە قارجىمەن قامتاماسىز ەتكەن سياقتى. ال ۆيتسە-پرەزيدەنتتىڭ ەكى كۇزەتشىسى تاريك ءال-حاشەميدىڭ ۇشاعىنا مىنگەلى جاتقاندا تۇتقىنعا الىنعان. بىرقاتار باق-تار ۆيتسە-پرەزيدەنتتىڭ كۇرد اۆتونومياسى اۋماعىنا ۇشىپ شىعۋى الدىن الا جوسپارلانعانىن جازادى.كانديدات رەتىندە تىركەدى
رەسەي فەدەراتسياسىنىڭ ورتالىق سايلاۋ كوميسسياسى پرەمەر-مينيستر ۆلاديمير ءپۋتيندى پرەزيدەنتتىككە كانديدات رەتىندە تىركەدى. ريا نوۆوستي اگەنتتىگىنىڭ حابارلاۋىنشا, ول رەسمي تۇردە تىركەلگەن ءبىرىنشى كانديدات بولىپ تابىلادى. ۆلاديمير پۋتين پرەزيدەنتتىككە كانديداتتىققا ءوزى جەتەكشىلىك ەتەتىن «ەدينايا روسسيا» پارتياسىنان ۇسىنىلىپ وتىر. ورتالىق سايلاۋ كوميسسياسىنا تىركەۋدەن ءوتۋ ءۇشىن «سپراۆەدليۆايا روسسيا» پارتياسىنىڭ باسشىسى سەرگەي ميرونوۆ, رلدپ كوسەمى ۆلاديمير جيرينوۆسكي جانە رەسەي كوممۋنيستەرىنىڭ جەتەكشىسى گەننادي زيۋگانوۆ قۇجاتتارىن تاپسىرعان. سايلاۋ كوميسسياسى, سونداي-اق بيزنەسمەن ميحايل پروحوروۆتىڭ, ۆلاديۆوستوكتىڭ ەكس-مەرى ۆيكتور چەرەپكوۆتىڭ, يركۋتسك وبلىسىنىڭ گۋبەرناتورى دميتري مەزەنتسەۆتىڭ دە قۇجاتتارىن قابىلداعان.وپات بولعاندار ايتارلىقتاي
«ۋوشي» اتالاتىن تايفۋن فيليپپين جۇرتشىلىعىن جويقىن اپاتقا سوقتىرىپ وتىر. رەيتەر اگەنتتىگىنىڭ اقپاراتتارىنا قاراعاندا, سۋ باسۋ مەن جەر كوشۋىنىڭ سالدارىنان كەشەگى كۇنگە دەيىن 957 ادام قۇربان بولىپ, تاعى 50-گە جۋىق تۇرعىن حابار-وشارسىز كەتكەن. فيليپپين بيلىگىنىڭ حابارلاۋىنشا, وتكەن اپتانىڭ سوڭىنا قاراي باستالعان تابيعات اپاتىنان ەلدىڭ ءوڭتۇستىگىندە ورنالاسقان كاگايان-دە-ورو جانە ليگان قالالارىنىڭ ماڭىنداعى ەلدى مەكەندەر كوپ زارداپ شەككەن. اتالعان قالالاردىڭ باسشىلىعى جۇقپالى اۋرۋلاردىڭ بەلەڭ الماۋى ءۇشىن وپات بولعانداردى تەزدەتىپ جەرلەۋ مۇمكىندىگىن قاراستىرىپ جاتىر.30 ترلن. يەن شىعىندايدى
جاپونيا بيلىگى ۆاليۋتالىق قور كولەمىن ۇلعايتۋ ماقساتىندا 30 تريلليون يەن (385 ميلليارد دوللار) ءبولۋ تۋرالى شەشىم قابىلدادى. اعر اگەنتتىگىنىڭ تاراتقان اقپاراتتارى بويىنشا, ۇكىمەتتىڭ ۆاليۋتا ينتەرۆەنتسياسىنا جۇمسايتىن شىعىنىنىڭ كولەمى 195 تريلليون يەنگە دەيىن ءوسىپ وتىر. قور كولەمىن ۇلعايتۋ ەل تاريحىندا وسىمەن ەكىنشى رەت قايتالانعان كورىنەدى. بۇعان دەيىن ۆاليۋتالىق قور ينتەرۆەنتسياسى 2003-2004 جىلدىڭ كوكتەمىندە جاسالىپ, جاپونيا يەن باعامىن قولداۋ ءۇشىن شارالار دا قابىلداعان-تىن. بۇل جونىندە ەل بيلىگى «ۇلكەن سەگىزدىك» ەلدەرىمەن كەلىسكەن دە سىڭايلى.161 دانا اتىس قارۋى الىندى
ۆاشينگتوندا كەڭ اۋقىمدا جۇزەگە اسىرىلعان وپەراتسيانىڭ ناتيجەسىندە قارۋ-جاراق پەن ەسىرتكى زاتتارىن ساقتادى جانە ساتتى دەگەن كۇدىكپەن 70 ادام تۇتقىندالدى. جەرگىلىكتى قۇقىق قورعاۋ ورگاندارىنىڭ مالىمدەۋىنشە, ولاردان الىنعان قارۋ تۇرلەرى مەن ەسىرتكى زاتتارىنىڭ جالپى قۇنى 7,1 ميلليون دوللاردان اسادى. قىلمىستىق توپتاردان 9,6 كيلو كوكاين مەن گەروين, سونداي-اق 161 دانا اتىس قارۋى الىنعان. وپەراتسياعا ارالارىندا فەدەرالدىق تەرگەۋ بيۋروسىنىڭ قىزمەتكەرلەرى بار بىرقاتار فەدەرالدىق ۆەدومستۆولار دا قاتىسقان. ال وپەراتسيا 2010 جىلدىڭ قاراشاسىنان باستاپ قولعا الىنعان ەكەن.قىسقا قايىرىپ ايتقاندا:
• كەشە قىتاي پوليتسياسى گۋاندۋن پروۆينتسياسىنىڭ ءوڭتۇستىگىندەگى حايمەن قالاسىنىڭ ۇكىمەتتىك كەڭسەسىن كۇشپەن باسىپ الماق بولعان شەرۋشىلەردى قۋىپ تاراتتى. ولاردىڭ تالابى – اۋانى لاستايتىن ەلەكتر ستانساسىن جابۋ.
• وڭتۇستىك كورەيا كيم چەن ءيردىڭ قايتىس بولۋىنا بايلانىستى سولتۇستىك كورەيا باسشىلىعىنا كوڭىل ايتتى. سونىمەن قاتار, سەۋل پحەنيانعا قارالى جيىنعا قاتىسۋ ءۇشىن رەسمي دەلەگاتسيا جىبەرەتىنىن دە مالىمدەدى.
• ەگيپەت جوعارى اسكەري كەڭەسىنىڭ وكىلى, گەنەرال ادەل يمار ەل پارلامەنتىنىڭ عيماراتىن ورتەمەك بولعانداردىڭ انىقتالعانىن جاريا ەتتى.
• اقش كونگرەسى 2014 جىلى مينسكىدە حوككەيدەن وتەتىن الەم چەمپيوناتىنا قاتىسۋدان باس تارتۋعا شاقىرعان زاڭ قابىلداۋى مۇمكىن.
ينتەرنەت ماتەريالدارى نەگىزىندە ازىرلەندى.
