15 پايىز داۋىستان ءۇمىتتى

«اۋىل» سوتسيال-دەموكراتيالى پارتيا­سى­نىڭ سايلاۋالدى شتابىندا الدىمىزدا بولاتىن ساياسي ناۋقانعا بايلانىستى جۇ­مىستار قىزۋ قارقىن الۋ ۇستىندە. كەشەگى كۇنى مۇندا پولشادان كەلگەن ەقىۇ وكىل­دەرى بولىپ, پارتيانىڭ جۇمىس جاعدايىمەن تانىستى. ولاردى پارتيا توراعاسى, اۋىل شارۋاشىلىعى عىلىمدارىنىڭ دوكتورى, اكادەميك عاني قاليەۆ قابىلدادى. مەيماندارمەن بولعان اڭگىمە بارى­سىن­دا قازاقستاندىق قوعامدا دەموكراتيالىق ۇدەرىستەردىڭ ءورىس الۋ جاعدايى, الداعى ساي­لاۋ­عا دايىندىق ماسەلەلەرى, «اۋىل» پار­تيا­سىنىڭ قوعامداعى ءرولى تۋرالى ايتىلدى. ەقىۇ وكىلدەرىنىڭ قويعان سۇراقتارىنا بايلانىستى پارتيا توراعاسى وزدەرىنىڭ سايلاۋ كەزىندە داۋىستاردىڭ 15 پايىزىن الۋعا ءۇمىتتى ەكەندىكتەرىن جەتكىزدى. بۇل پارتيا 2000 جىلدىڭ قاڭتار ايىندا قۇرىلعان بولاتىن. ونىڭ قۇرامىندا 200 مىڭنان استام مۇشە بار. پارتيا فيليال­دارى بارلىق وبلىستاردا جانە استانا مەن الماتى قالالارىندا جۇمىس ىستەيدى. قۇرىلىمى 160 اۋداندىق ۇيىمدى, 2090 باستاۋىش ۇيىمدى قامتيدى. اڭگىمە بارىسىندا عاني قاليەۆ قازىرگى ۋاقىتتا قازاقستاندا پارلامەنت ءماجىلىسى دەپۋتاتتىعىنا سايلاۋالدى جۇمىستارى بەيبىت جاعدايدا, ءوزارا ۇنقاتىسۋ نەگىزىندە ءورىس الىپ كەلە جاتقاندىعىن اتاپ كورسەتتى. كەشەگى كۇنى سونداي-اق «اۋىل» پارتيا­سى­نان پارلامەنت ءماجىلىسى دەپۋتاتتىعىنا كانديدات بولىپ تىركەلگەن جاسقايرات ءسۇن­دەت ۇلى باتىس قازاقستان وبلىسىنىڭ جاڭا­قالا اۋدانىندا بولىپ, اۋدان تۇرعىن­دارى­مەن كەزدەسۋىن باستادى. ماستىقساي اۋى­لىن­دا بولىپ وتكەن سايلاۋشىلارمەن كەزدەسۋ بارىسىندا  «اۋىل» پارتياسىنىڭ باعدار­لا­ماسى مەن سايلاۋالدى تۇعىرناماسى تۋرالى اڭگىمە بولدى. كانديدات پارتيانىڭ العا قويىپ وتىرعان ماقساتتارىن حالىققا ءتۇسىندىرىپ بەردى. وسىنداي كەزدەسۋ اۋدان اكىمدىگىندە دە بولىپ ءوتتى. پارتيانىڭ ورتالىق سايلاۋالدى شتا­بىن­دا قازىرگى كۇنى ۇگىت-ناسيحات جۇمىس­تا­رىن ءجۇر­گىزۋ ءتارتىبى مەن حالىققا جەتكىزۋ قۇرالدارى پىسىقتالىپ, ازىرلەنۋ ۇستىندە. قالالىق اۆتوبۋستاردا جۇگىرتپە جولدار ارقىلى ۇگىت جۇرگىزىلمەك. سونداي-اق كوشەلەردە بيلبوردتار مەن باسقا دا كورنەكىلىكتەر ىلىنبەك. كەشە, سونداي-اق پارتيانىڭ سايلاۋالدى شتابى باستىعىنىڭ ورىنباسارى عالىمجان ماديەۆ «7-ءشى» تەلەارنا تىلشىسىنە سۇحبات بەرىپ, پارتيانىڭ جۇرگىزىپ جاتقان جۇ­مىستارىنا كەڭىنەن توقتالدى. سۇڭعات ءالىپباي.