ۇگىت پويىزى جولعا شىقتى

كەشە قاراعاندى قالاسىنىڭ تەمىر جول ۆوكزالىنان قازاقستان كوممۋنيستىك حالىق­تىق پارتياسىنىڭ سايلاۋالدى جۇمىستارىن جۇرگىزەتىن توپتارىنان قۇرالعان ۇگىت پويى­زى ءوڭىردىڭ ەلدى مەكەندەرىن ارالاۋعا ات­تان­دى. ۇگىتشىلەردىڭ نەگىزگى قۇرامى قكحپ وب­لىستىق فيليالىنىڭ بەلسەندىلەرىنەن جا­ساقتالعان. ەكى اپتادان ارتىق مەرزىمگە جوسپارلان­عان ۇگىت پويىزىنىڭ ساپارى قاراعاندى وبلىسىنىڭ اۋىلدىق اۋداندارى مەن تەمىرتاۋ, ساران, اباي, شاحتينسك سياقتى قالا­لارىندا جالعاسپاق. ۇگىت بريگاداسىنىڭ جەتەكشىسى تيمۋر ءسايفۋلليننىڭ ايتۋىنشا, ساپارعا شىققان ۇگىت پويىزىنىڭ باستى ماقساتى – جەر-جەردەگى تۇرعىندارمەن تىكەلەي جۇزدەسۋ. ءبىر جاعىنان, وسى كەزدەسۋلەر بارىسىندا قكحپ-نىڭ سايلاۋالدى تۇعىر­نا­ماسىمەن تانىستىرىپ, جان-جاقتى ۇگىت جۇمىستارىن وتكىزۋ بولسا, ەكىنشى جاعىنان, شالعاي ەلدى مەكەندەردەگى تۇرعىنداردىڭ ارىز-شاعىمىن تىڭداپ, دەپۋتاتتىقتان ءۇمىت­كەرلەرگە ايتاتىن اماناتتارىن قا­بىلداۋ. قكحپ وبلىستىق سايلاۋالدى شتابىنىڭ جەتەكشىسى الەكساندر زەۆاحين بۇل ۇگىت پويىزىن دايىنداۋعا مۇگەدەك بالالارى بار انالاردىڭ مۇددەسىن قورعايتىن «قامقور» قوعامدىق بىرلەستىگىنىڭ ەرەكشە بەلسەندىلىك تانىتقانىن اتاپ كورسەتتى. ونىڭ ايتۋىن­شا, قاراعاندى وبلىسىندا كوممۋنيستەردىڭ سايلاۋالدى ۇگىت-ناسيحات جۇرگىزۋ جۇمىسى ەرەكشە بەلسەندىلىكپەن باستالعان. ۇگىت جۇمىستارى باستاۋ العان كەزەڭنەن بەرى قكحپ قۇرامىنان ۇسىنعان ۇمىتكەرلەردىڭ ساياسي كوزقاراسىن ايقىندايتىن بىرنەشە اقپاراتتىق بيلبوردتار ىلىنگەن. بۇل رەتتە جەرگىلىكتى بيلىك ورگاندارى كوممۋنيستەرگە ەشقانداي كەدەرگى كەلتىرىپ وتىرماعاندىعىن دا وبلىستىق شتاب جەتەكشىسى اتاپ ايتتى. – ءبىز ءۇي-ۇيلەردى ارالاپ, قكحپ ءۇمىت­كەر­لەرىنىڭ باعدارلامالارىمەن تانىستىرىپ ءجۇرمىز. تۇرعىندار ءبىزدى جىلى قارسى الۋدا. قازىردىڭ وزىندە مەن قاراعان­دىلىق­تاردىڭ كوپشىلىگى ءبىزدىڭ پارتياعا جىلى قاباق تانىتىپ وتىرعاندىعىنا كۋا بولىپ ءجۇرمىن. الداعى ۋاقىتتا ءبىز جۇمىسى­مىزدى وسى قارقىنمەن قىزۋ جالعاستىرا بەرمەكپىز, – دەيدى قكحپ-نىڭ جاس ۇگىتشىسى ارمان لەزباەۆ ءوز ويىمەن ءبولىسىپ. قازاقستان كوممۋنيستىك حالىقتىق پارتياسى سايلاۋالدى ۇگىت-ناسيحات جۇمىس­تا­رىن بارلىق وڭىرلەردە قىزۋ جۇرگىزۋدە. وعان پارتيا تاراپىنان بەلگىلەنگەن ۇگىت­شى­لەردىڭ بەلسەندى قيمىلى ايعاق بولعانداي. جىلقىباي جاعىپار ۇلى.