2017 جىلى «تەلەديدار جانە راديو حابارلارىن تاراتۋ تۋرالى» قازاقستان رەسپۋبليكاسى زاڭىنىڭ 42-بابىنا ەنگىزىلگەن وزگەرتۋلەرگە سايكەس ەلىمىزدىڭ اۋماعىندا حابار تاراتاتىن بارلىق شەتەلدىك تەلە جانە راديو ارنالار وسى زاڭ قولدانىسقا ەنگىزىلگەن كۇننەن باستاپ التى اي ىشىندە قازاقستان اۋماعىندا زاڭدى تۇلعانى نەمەسە وكىلدىگىن (فيليالىن) تىركەۋگە مىندەتتەلگەن ەدى.
اتالعان زاڭ 2018 جىلدىڭ 9 قاڭتارىندا كۇشىنە ەنگەندىكتەن, تەلەراديولاردى تىركەۋگە 9 شىلدەگە دەيىن ۋاقىت بەرىلدى. مىنە, ارادا التى اي وتكەندە اقپارات جانە كوممۋنيكاتسيالار مينيسترلىگى كۋالىكتەرى قايتارىلىپ, حابار تاراتۋى توقتاتىلاتىن ارنالاردىڭ ءتىزىمىن جاريالاپ وتىر. بۇل – زاڭنىڭ تالابى جانە ەلدىڭ اقپاراتتىق قاۋىپسىزدىگىن ساقتاۋدىڭ ماڭىزدى ءبىر تارماعى ەكەنى داۋسىز.
اقپارات سالاسىنداعى وسىناۋ وزگەرىستى اقپارات جانە كوممۋنيكاتسيالار ءمينيسترى داۋرەن اباەۆ ءوزىنىڭ الەۋمەتتىك جەلىدەگى پاراقشاسىندا جاريالادى.
«بۇگىندە قازاقستاندا شەتەلدىك 307 تەلەراديو ارنا تىركەۋلى. ولاردىڭ جۇمىسىن رەتتەپ وتىرۋ ماقساتىندا مينيسترلىك جىل باسىندا زاڭنامالارعا وزگەرىس ەنگىزۋگە مۇرىندىق بولىپ, سوعان سايكەس بارلىق شەتەلدىك تەلەارنالار قازاقستان رەسپۋبليكاسىندا وكىلدىكتەرىن اشۋعا مىندەتتەلدى. ولارعا جاڭا تالاپتاردى ورىنداۋى ءۇشىن جارتىجىلدىق ۋاقىت بەرىلدى. قازىرگى كۇنى 219 تەلەارنا اتالعان تالاپتى ورىندادى. قالعان 88 تەلەارنانىڭ حابار تاراتۋىن توقتاتۋ ماقساتىندا مينيسترلىك ارنايى بۇيرىق ازىرلەدى», دەپ جازدى د. اباەۆ.
قازىرگى ۋاقىتتا ەلىمىزدىڭ اۋماعىندا حابار تاراتۋدى توقتاتاتىن ارنالاردىڭ تولىق ءتىزىمى اقپارات جانە كوممۋنيكاتسيالار مينيسترلىگىنىڭ سايتىندا تۇر.
بۇل ارادا ۋاكىلەتتى ورگاننىڭ زاڭ اياسىنداعى جۇمىسىنىڭ تياناقتى جاسالعاندىعى بايقالادى. ويتكەنى مينيسترلىك جىل باسىنان بەرى وكىلدىكتەرىن اشپاعان شەتەلدىك تەلە-راديو ارنالاردىڭ يەلەرىنە ءوز قىزمەتىن قازاقستان زاڭناماسى تالاپتارىنا سايكەستەندىرۋ قاجەتتىلىگى تۋرالى اقپاراتتىق-ءتۇسىندىرۋ جۇمىستارىن جۇرگىزگەن بولاتىن.
ەندى قازاقستان اۋماعىندا حابار تاراتۋىن جالعاستىرۋعا قىزىعۋشىلىق تانىتاتىن شەتەلدىك تەلە-راديو ارنالار ءوز وكىلدىكتەرىن اشىپ, قايتادان تىركەۋگە تۇرۋى قاجەت.
جۋىردا عانا مينيسترلىك «شالقار» راديوسىنىڭ تارالۋ اۋقىمىن كەڭەيتىپ, اسىرەسە, شەكاراعا جاقىن ەلدى مەكەندەردى قامتۋعا قول جەتكىزگەندىگىن جازدىق. وسى ەكى قادامنىڭ دا ءتۇپ-توركىنى اقپاراتتىق قاۋىپسىزدىك تۇرعىسىنداعى ماڭىزى جوعارى ماسەلە بولىپ وتىر.
سەرىك ابدىبەك,
«ەگەمەن قازاقستان»
