ايتىپ كەلمەيتىن اپات حالىقتىڭ الاڭداۋشىلىعىن تۋدىرۋمەن قاتار, مەملەكەتكە دە وراسان زيان كەلتىرەدى. جامبىل وبلىسىنىڭ قىرعىزستان رەسپۋبليكاسىمەن شەكارالاس ايماعىنىڭ تاۋلى بوكتەرىندە ءورت شىعىپ, ەكى كۇن بويى جەرگىلىكتى توتەنشە جاعداي قىزمەتكەرلەرىن ابىگەرگە سالدى. ءتىلسىز جاۋدى اۋىزدىقتاۋعا 80-گە تارتا ادام مەن 10 تەحنيكا جۇمىلدىرىلعان. الايدا ادام مەن تەحنيكا كۇشىنە بوي بەرمەگەن الاپات اپات تاۋلى ايماقتى ءبىراز جايلادى. بولجام بويىنشا قۇرعاق ءشوپتىڭ تۇتانۋىنان بولعان ءورت 200 گەكتار جەردى شارپىعان.
اپات اتىپ كەلمەيدى. الاپات ءورتتى ءسوندىرۋ كەزىندە ت.رىسقۇلوۆ اۋدانى, اقىرتوبە ورمان شارۋاشىلىعى مەكەمەسىنىڭ ورمانشى-قورىقشىسى, قايىڭدى اۋىلىنىڭ 46 جاستاعى تۇرعىنى اسىلبەك التاەۆ قازا تاپتى. قىزىل جالىنمەن ايقاس كەزىندە تاۋ شىڭىنان اياعى تايىپ كەتىپ اجال قۇشقان ازاماتتىڭ ارتىندا بەس بالاسى قالدى. ال اقىرتوبە ورمانداردى جانە جانۋارلار دۇنيەسىن قورعاۋ جونىندەگى مەكەمە باسشىسى جاندار مۇزدىباەۆ تا بۇل وقيعانىڭ جۇمىس بارىسىندا بولعانىن ايتىپ, قايعىلى وقيعانىڭ شىنىمەن ورىن العانىن راستاپ وتىر. ال اسىراۋشىسىنان ايىرىلعان وتباسىنىڭ جاعدايى ايتپاسا دا تۇسىنىكتى.
بيىل جامبىل وڭىرىندە ەشقاشان بولماعان جاز بولدى. كۇننىڭ قىزۋى قىرىق گرادۋستان اسىپ كەتىپ, ءتىپتى تۇرعىنداردىڭ تاڭدانىسىمەن قاتار, ۇرەيىن دە تۋعىزدى. الايدا تابيعاتتىڭ توسىن مىنەزىنە توتەپ بەرۋ مۇمكىن ەمەس. سوندىقتان دا ءاربىر ازامات تابيعاتقا جاناشىرلىقپەن قاراپ, ءورت قاۋىپسىزدىگىنە ءجىتى ءمان بەرسە ەكەن دەيسىڭ. اي مەن كۇننىڭ امانىندا ارىستاي ازاماتىنان ايىرىلىپ قالعان التاەۆتار وتباسىنىڭ باسىنداعى قايعىلى جاعداي ەندى قايتالانباسا ەكەن.
حاميت ەسامان,
«ەگەمەن قازاقستان»
جامبىل وبلىسى
