بەلگىلى جازۋشى, جۋرناليست, قازاقستاننىڭ مادەنيەت قايراتكەرى, كەزىندە «ەگەمەن قازاقستان» گازەتى باس رەداكتورىنىڭ ورىنباسارى قىزمەتىن اتقارعان, مارقۇم سابىرجان شۇكىر ۇلى تۋعان جەرىندە جەمىستى ەڭبەك ەتكەن ۋاقىتتارىندا وسى ءۇيدىڭ تۇرعىنى بولعان. ەندى مىنە, اراعا جىلدار سالىپ, ءۇي قابىرعاسىنا ەسكەرتكىش تاقتا قويىلىپ, قالا حالقى مارقۇمعا وزدەرىنىڭ قۇرمەتىن كورسەتكەن.
بىرنەشە كىتاپتاردىڭ اۆتورى, تاريح, ادەت-عۇرىپ, ءتىل تاقىرىبىنا قالام تەربەگەن سابىرجان شۇكىر ۇلىنىڭ ازاماتتىق كەلبەتى, شىعارماشىلىق جەتىستىگى حاقىندا ارقالىق قالاسى اكىمىنىڭ ورىنباسارى ت.اۋباكىروۆ باياندادى. الماتىدان ارنايى كەلگەن سىيلاس دوسى ك.ساۋىتوۆ, شارۋا قوجالىق يەسى ك.كاربوزوۆ, ءىنىسى ق.شىنتەمىروۆ ەستەلىك ايتتى. قازاقستان جازۋشىلار وداعىنىڭ مۇشەسى, اقىن ناعاشىباي مۇقاتوۆ قالامداس ارىپتەسى حاقىندا ولەڭنەن ورنەك ءورىپ, مىناداي جولدارمەن تۇيىندەدى.
اينالىپ الۋان ءتۇرلى ساعىمعا كۇن,
الا بۇلت اسپانىمدا قالىقتادىڭ,
نار عانا ناعاشىبايدى نالىتپاي ما,
سار دالا ساعىنار ءالى سابىرجانىن.
مادەني شارادا لەنتانى قيۋ قۇرمەتى ەلدىڭ ەڭسەلى ازاماتتارى ك.كاربوزوۆ پەن ج.ومىربەكوۆكە جۇكتەلىپ, سوڭىنان «دوستىق» مەيرامحاناسىندا مارقۇمنىڭ رۋحىنا ارنالىپ اس بەرىلىپ, قۇران باعىشتالدى.
وسىلايشا جازۋشى قالامگەردىڭ ەكىنشى رۋحاني عۇمىرى باستالدى دەۋگە ابدەن بولادى. الداعى جىلى تۋعانىنا سەكسەن جىل تولعالى وتىرعان قارىمدى قالامگەر سابىرجان شۇكىر ۇلىن اقىن ايتقانداي سار دالا ءالى ساعىنارىنا ەش كۇمان جوق.
انار تولەۋحانقىزى,
«ەگەمەن قازاقستان»
