ءوڭىردىڭ تاڭعاجايىپ تابيعاتى كورگەن جاننىڭ كوزىن توعايتىپ, كوكىرەگىندە قۋانىش سامالىن سوقتىراتىندىعى ءتامام ەلگە بەلگىلى. سولاي بولا تۇرا, تۋريستىك نارىققا قوسىمشا قىزمەتتەر قوسۋدىڭ مۇمكىندىكتەرى ءالى دە تولىق قولعا الىنباي وتىر. بيزنەس-مودەلدەردى جەتىلدىرىپ, ەل يگىلىگىنە جاراتقان كەزدە وتاندىق, شەتەلدىك ينۆەستيتسيا تارتۋعا كەڭ جول اشىلماق. وبلىستىق تۋريزم باسقارماسى مەن اۋدان اكىمدىكتەرى بىرلەسە وتىرىپ قولعا العان تارتىمدى جوبالار كەڭسەسىنە الداعى ۋاقىتتا ۇلكەن جاۋاپكەرشىلىك جۇكتەلەدى.
بولاشاقتا بۇل كەڭسە جول بويىنداعى سەرۆيستى ۇيىمداستىرىپ, تسيفرلى تەحنولوگياعا نەگىزدەلگەن جاڭا تۋريستىك مارشرۋتتاردى اشۋ, قوناق ۇيلەر مەن دەمالىس ورتالىقتارىنىڭ قۇرىلىسى, كوڭىل كوتەرۋ اتتراكتسيوندارىن ورناتۋ جانە باسقا دا جوبالاردى قاراستىرىپ, ءتيىستى ۇيىمداستىرۋ قىزمەتىن اتقاراتىن بولادى. ويتكەنى تۋريستىك بيزنەستىڭ وركەندەۋى مەن باعانىڭ قولجەتىمدىلىگى جاندى باسەكەلەستىككە تاۋەلدى. ياعني زاماناۋي تۋريزم يندۋسترياسى شارۋاشىلىق ىلكىمدىلىكپەن قاتار, ساۋاتتى بيزنەس-جوسپارلاردى قاجەت ەتەدى.
جەرگىلىكتى اتقارۋشى ورگاندارمەن ارىپتەستىك بايلانىس كوپتەگەن اكىمشىلىك ىستەردى, جەر ءبولۋ, ينفراقۇرىلىمدى دامىتۋ ءتارىزدى ماسەلەلەردى اقىلداسا وتىرىپ, بىرلەسىپ كۇش جۇمىلدىرىپ شەشۋگە مول مۇمكىندىك بەرەدى. ال كاسىپكەرلەر پالاتاسى كەز كەلگەن بيزنەس-ۇسىنىستاردى سارالاپ, ينۆەستيتسيالىق تارتىمدىلىعىن ايقىندايدى. ينۆەستورلاردىڭ قاتىسۋىمەن روۋد-شوۋ ۇيىمداستىرىلىپ, تاڭداۋلى جوبالاردىڭ تانىستىرىلىمى وتكىزىلەدى. بۇل ءۇشىن ارنايى بايلانىس جەلىسى دە اشىلىپ وتىر.
بايقال ءبايادىل,
«ەگەمەن قازاقستان»
