ەلىمىز وبلىستارى, استانا, الماتى قالالارىنداعى ءبىلىم بەرۋ باسقارمالارىنىڭ ۇيعارىمىمەن بەكىتىلگەن تاريحشى, ولكەتانۋشى عالىمدار, ادىستەمەشى-پەداگوگ مامانداردىڭ جۇمىس توبى اكادەميك ك.بايپاقوۆتىڭ جەتەكشىلىگىمەن جارتى جىلعا جۋىق مەرزىمدە «ولكەتانۋ» وقۋلىعىن ازىرلەدى.
جاڭا وقۋلىققا اۆتورلار تاراپىنان تۋىپ-وسكەن ولكەنىڭ تاريحى مەن ادەبيەتى, ونەرى جانە تابيعي-گەوگرافيالىق ەرەكشەلىكتەرى تۋرالى ماعۇلماتتار ەنگىزىلدى. وقۋلىقتىڭ كاسىبي دەڭگەيدە دايىندالىپ, مازمۇنىنىڭ تارتىمدىلىعى مەن ارلەنۋىندە «الماتىكىتاپ باسپاسى» ماماندارىنىڭ ەڭبەگى ەرەكشە.
«باسپانىڭ بۇل سالاداعى تاجىريبەسى جوعارى. مىسالعا باسپادان شىققان «مەنىڭ قازاقستانىم» توپتاماسىن الساق تا جەتكىلىكتى. وسى ورايدا ەلىمىز تاريحىنىڭ جارقىن بەتتەرى, مادەنيەتى, گەوگرافيالىق نىساندارى تۋرالى كوركەم بەزەندىرىلگەن الپىس شاقتى البوم جارىق كورگەن. باسپا ماماندارىنىڭ جىلدار بويعى تاجىريبەسى «ولكەتانۋ» سياقتى جاڭا ءارى قىزىقتى ءپاندى جيناقتاۋعا سەپتىگىن تيگىزدى. اۆتورلار ءۇشىن باسپامەن جۇمىس ىستەۋ وڭايعا ءتۇستى دەپ بىلەمىن» دەگەن پىكىرىمەن بولىسكەن «الماتىكىتاپ باسپاسى» باس رەداكتورىنىڭ ورىنباسارى الميرا سۋجيكوۆا وقۋلىق اۆتورلارىنا, عالىمدار مەن ساراپشىلارعا العىسىن ءبىلدىردى. الداعى ۋاقىتتا وقۋلىقتىڭ حرەستوماتياسى جانە مۇعالىمدەرگە ارنالعان ادىستەمەلىك نۇسقاۋلىقتارى دايىندالاتىن بولادى.
وقۋلىقتاردى شىعاراتىن باسپانى تاڭداۋ قۇقىعى وبلىستىق اكىمشىلىكتەر مەن ءبىلىم باسقارمالارىنىڭ قۇزىرىنا بەرىلگەن.
ۇيىمداسقان ۇجىمنىڭ قاجىرلى ەڭبەگىنىڭ ارقاسىندا باسپا «ولكەتانۋ» ءپانىن الماتى, اقتوبە, تۇركىستان, جامبىل, قاراعاندى وبلىستارى مەن استانا جانە الماتى قالالارىنا ۇسىناتىن بولادى. شىعىس قازاقستان جانە قوستاناي وبلىستارىنىڭ وقۋلىقتارىن باسۋعا «اتامۇرا» باسپاسى اتسالىسۋدا. اتالعان باسپانىڭ جەتەكشى رەداكتورى مۇرات مۇقاشەۆتىڭ ايتۋىنشا, وقۋلىقتىڭ ساپالى شىعۋى ءتيىستى مينيسترلىك تاراپىنان قۇرىلعان ارنايى جۇمىس توبى مەن «وقۋلىق» رەسپۋبليكالىق عىلىمي-پراكتيكالىق ورتالىعى ماماندارىنىڭ ءجىتى باقىلاۋىندا. ءتۇرلى-ءتۇستى بەزەندىرىلىپ, مازمۇنى كاسىبي ماماندارمەن تولىقتىرىلعان جاڭا كىتاپ جاس ۇرپاقتى وتانسۇيگىشتىككە باۋلۋعا سەپتىگىن تيگىزەرى ءسوزسىز دەپ سانايدى وقۋلىق اۆتورلارى.
ەلۆيرا سەرىكقىزى,
«ەگەمەن قازاقستان»
الماتى
