قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ «قارۋلى كۇشتەرىمىز بەس قارۋى ساي زاماناۋي ۇلگىدەگى ايبىندى ارمياعا اينالدى. سايىپقىران ساربازدارىمىز بۇگىندە ۇلى دالانىڭ سەنىمدى قىرانى, ازاماتتىعىمىزدىڭ الماس الداسپانى», دەپ باعالاعان قازاق اسكەرىنىڭ بىلىكتىلىگى حالىقارالىق شارادا جان-جاقتى سىنالۋدا.
ەلىمىزدىڭ اۋماعىندا حالىقارالىق ارميا ويىندارى شەڭبەرىندە «ارتيللەريالىق وق اتۋ شەبەرلەرى» بايقاۋى, ۇشقىشسىز ۇشۋ اپپاراتتارى ەسەپ توپتارىنىڭ «سۇڭقار اڭشىلىعى» جانە اسكەري بايلانىسشىلاردىڭ مۇلدەم جاڭا سايىس ءتۇرى – «سەنىمدى قابىلداۋ» سايىسى ءوتىپ جاتىر. بىزدەگى ويىندارعا بارلىعى 12 مەملەكەتتەن, اتاپ ايتقاندا, ازەربايجان, بەلارۋس, ۆەنەسۋەلا, زيمبابۆە, يران, قازاقستان, قىتاي, قىرعىزستان, رەسەي, تاجىكستان, وزبەكستان مەن سيريادان 18 كوماندا قاتىسۋدا.
ايتۋلى شارانىڭ قازاقستان اۋماعىندا وتەتىن كەزەڭىنىڭ «وتار» 40-شى اسكەري بازاسىنداعى اشىلۋ سالتاناتىندا سول كەزدەگى قورعانىس ءمينيسترى, گەنەرال-پولكوۆنيك ساكەن جاسۇزاقوۆتىڭ: «ارميالىق سايىس بارىسىندا الەمنىڭ ءارتۇرلى ەلدەرىنىڭ اسكەري ماماندارى وقۋ-جاتتىعۋ پوليگوندارىندا جاۋىنگەرلىك ماشىقتارىن پاش ەتەدى, ال تانكتەردىڭ, اۆياتسيا مەن تەڭىز كورابلدەرىنىڭ اتىسى تەك وقۋ نىسانالارىنا باعىتتالادى. ارميا حالىقارالىق ويىندارىنداعى سايىس – بۇل نىسانالاردى جويۋداعى دالدىكتى, ءارتۇرلى قارۋدى شەبەر مەڭگەرۋ, ۇلگىلى سپورتتىق دايىندىق پەن توزىمدىلىك, جاڭعىرتىلعان اسكەري تەحنيكانى باسقارۋداعى داعدى مەن شەبەرلىكتى كورسەتۋ عانا ەمەس, سونىمەن بىرگە باعا جەتپەس تاجىريبە بولىپ تابىلادى», – دەۋى بەكەر ەمەس.
ويتكەنى بيىل قازاقستاندىق اسكەري قىزمەتشىلەر ويىن اياسىنداعى 28 كونكۋرستىڭ 14-نە قاتىسادى. ونىڭ ۇستىنە 2017 جىلعى ارميا ويىندارىنىڭ قورىتىندىسى بويىنشا قازاقستان رەسپۋبليكاسى قارۋلى كۇشتەرىنىڭ قۇراما كومانداسى الەمنىڭ 28 ەلىنەن كەلگەن 150 كوماندانىڭ ىشىندە جالپىكوماندالىق ەسەپ بويىنشا ءۇشىنشى ورىنعا تۇراقتاعان بولاتىن. ۇيىمداستىرۋشىلار سول جولى قازاقستان كومانداسىنىڭ قاتىسۋشىلارىن ەڭ كوپ ءارى بەلسەندى ۇجىم رەتىندە باعالادى. ال حالىقارالىق ويىنداردىڭ تورەشىلەر القاسى قازاقستاندىق جاۋىنگەرلەردىڭ جوعارى دايىندىعى مەن كاسىبيلىگىن جانە بىلىكتىلىگىن ەرەكشە اتاپ ءوتتى.
ارمەنيادا تىركەلگەن العاشقى جەڭىس
حالىقارالىق ارميا ويىندارىنىڭ ارمەنيا رەسپۋبليكاسىندا وتكەن «دوستاستىق جاۋىنگەرى» بايقاۋىندا قازاقستاندىق اسكەري قىزمەتشىلەر توپ جاردى.
بۇل سايىسقا ارمەنيا, بەلارۋس, گرەكيا, يران, قازاقستان جانە رەسەي اسكەريلەرى قاتىسقان بولاتىن. بايقاۋ اياسىنداعى «كاسىپقوي», «مەرگەن» جانە «كاۆالەر/حانشا» ەسترادالىق-كوركەمدىك كەزەڭى بويىنشا ءبىزدىڭ سپورتشىلار جوعارى ناتيجەلەر كورسەتتى.
ءۇش كەزەڭدىك سايىس قورىتىندىسى بويىنشا قارسىلاستارىنان وق بويى وزا شاۋىپ, ەڭ جوعارى ۇپاي جيناعان سەرجانت سەيىتكارىم نۇرسەيىتقوجا «دوستاستىق جاۋىنگەرى» اتاعىنا يە بولدى.
– مۇنداي دودالارعا بىرنەشە مارتە قاتىسسام دا بيىلعىداي باسەكەلەستىكتى بۇرىن-سوڭدى كورگەن جوقپىن. بيىل قاتىسۋشىلار سانى ارتتى جانە ولاردىڭ دايىندىق دەڭگەيى اناعۇرلىم جوعارى بولدى. جەڭىسكە ۇمتىلعان كوماندالاردىڭ قاي-قايسىسى دا ايانىپ قالعان جوق», – دەيدى سايىس جەڭىمپازى.
بۇل دودادا قازاقستان اسكەرىنىڭ تاعى ءبىر وكىلى كىشى سەرجانت ەرتىلەك بەكبولاتوۆ ەكىنشى ورىندى يەلەندى. ال ەرلەر اراسىنداعى ۇزدىك ۇشتىكتى ارمەنيا رەسپۋبليكاسىنىڭ اسكەري قىزمەتشىسى ايك اكوپيان تۇيىندەدى.
ايەلدەر اراسىندا ارمەنيا قورعانىس مينيسترلىگىنىڭ ۆ.ساركيسيان اتىنداعى اسكەري ۋچيليششەسىنىڭ كۋرسانتى ارمينە گريگوريان ۇزدىك دەپ تانىلسا, ەكىنشى ورىندى قازاقستان قارۋلى كۇشتەرىنىڭ سەرجانتى جانارگۇل اقبالانوۆا ەنشىلەدى. ءۇشىنشى ورىن رەسەي وكىلى سەرجانت ليليا داۋتوۆاعا بۇيىردى.
تورەشىلەر بايقاۋداعى باسەكەلەستىكتىڭ جوعارى بولعاندىعىن ەسكەرە وتىرىپ, قازاقستان قارۋلى كۇشتەرىنىڭ سەرجانتتىق قۇرامى پوستكەڭەستىك اۋماقتا اسكەري-كاسىبي تۇرعىدا ەڭ ۇزدىك سانالاتىندىعىن اتاپ ءوتتى.
ادەتتە اسكەردىڭ كاسىبيلىگى, بولىمشەلەردەگى اسكەري ءتارتىپ, جەكە قۇرامنىڭ رۋحى سەرجانتتاردىڭ كاسىبيلىگىمەن ولشەنەتىنى راس. دەمەك قازاقستاندىق سەرجانتتاردىڭ جەڭىسى اسكەري جۇيەنى باسقارۋدىڭ باستاپقى كەزەڭىنىڭ سالماقتى ەكەندىگىن كورسەتىپ وتىر.
قازاقستاننىڭ مادەنيەتىمەن تانىستى
قازاقستان اۋماعىنداعى 2018 جىلعى ارميا حالىقارالىق ويىندارىنا قاتىسۋ ءۇشىن كەلگەن الەمنىڭ 12 ەلىنىڭ اسكەري قىزمەتشىلەرى سايىس كەزەڭدەرىندە وزدەرىنىڭ كاسىبي شەبەرلىكتەرىن پاش ەتىپ قانا قويماي, سونىمەن بىرگە ەلىمىزبەن ەتەنە تانىسۋعا ۇلگەرۋدە.
«ارتيللەريالىق وق اتۋ شەبەرلەرى», «سۇڭقار اڭشىلىعى» جانە «سەنىمدى قابىلداۋ» بايقاۋىنىڭ قاتىسۋشىلارى ءۇشىن ەلىمىزدىڭ قورعانىس مينيسترلىگى مادەني باعدارلاما ۇيىمداستىردى. الماتىعا ساپار بارىسىندا ويىن قاتىسۋشىلارىن شاھاردىڭ كورىكتى جەرلەرىمەن تانىستىردى.
ازەربايجان, بەلارۋس, ۆەنەسۋەلا, زيمبابۆە, يران, قىتاي, قىرعىزستان, قازاقستان, رەسەي, تاجىكستان, وزبەكستان جانە سيريانىڭ اسكەري قىزمەتشىلەرى تۇڭعىش پرەزيدەنت ساياباعىنا, ۇلتتىق مۇراجاي مەن ايگىلى «مەدەۋ» مۇز ايدىنىنا باردى. ودان باسقا, قاتىسۋشىلارعا ارناپ تۇسكى اس ۇيىمداستىرىلدى. وندا سايىس مەيماندارىنا قازاقتىڭ ۇلتتىق تاعامدارىنان ءدام تاتقىزدى.
جەڭىمپازداردى قارسى الدى
وسى اپتادا ەلىمىزگە حالىقارالىق ارميا ويىندارىنىڭ العاشقى جەڭىمپازدارى ورالدى. ەلورداداعى «نۇرسۇلتان نازارباەۆ» اۋەجايىنان جۇرتشىلىق «دوستاستىق جاۋانگەرلەرى» حالىقارالىق كونكۋرسىندا ءبىرىنشى ورىندى جەڭىپ العان قازاقستاندىق كوماندانى كۇتىپ الدى. قارسى الۋشىلار قاتارىندا قازاقستان رەسپۋبليكاسى قارۋلى كۇشتەرىنىڭ باسشىلىعى, اسكەري قىزمەتشىلەردىڭ تۋىستارى مەن ارىپتەستەرى بولدى. اتالعان سايىس 28 شىلدە مەن 3 تامىز ارالىعىندا ارمەنيا رەسپۋبليكاسىنىڭ اۋماعىندا وتكەن بولاتىن. جوعارىدا اتاپ وتكەنىمىزدەي, وعان ارمەنيا, بەلارۋس, گرەكيا, يران, قازاقستان جانە رەسەي اسكەريلەرى قاتىستى.
سەرىك ابدىبەك,
«ەگەمەن قازاقستان»
