دانيانىڭ حەرنينگ قالاسىندا وتكەن جاۋاپ كەزدەسۋدە ويىننىڭ ءبىرىنشى مينۋتىنان باستاپ شابۋىل شەبىندە كونگو در شابۋىلشىسى جۋنيور كابانانگا وينادى. استاناداعى العاشقى ماچتا رومان مۇرتازاەۆ شىققان-دى. «استانا» كومانداسىنىڭ باس جاتتىقتىرۋشىسى رومان گريگورچۋك قارىمتا ماتچقا وسىنداي وزگەرىس جاسادى. قارسىلاس كوماندا ساپىندا دا وتكەن ويىنمەن سالىستىرعاندا ءبىر ويىنشى عانا وزگەرگەن ەكەن. ەكى كوماندا قۇرامىندا ازداعان وزگەرىس بولعانىمەن, ويىن ءدال ءبىرىنشى كەزدەسۋدەگىدەي ءوتتى.
«مەن بۇگىنگى ويىندا تىڭ وزگەرىستەردىڭ بولۋى مۇمكىن ەكەندىگىن بىلگەن ەدىم. ەگەر شىندىعىنا كەلەر بولساق, دانيا چەمپيوناتىنداعى قارسىلاستاردىڭ ويىنىن كورىپ, جاۋاپ كەزدەسۋىنە شىعاتىن قۇرامىن ءدال تاپتىم. كەشەگى ويىن استاناداعى كەزدەسۋمەن سالىستىرعاندا ايتارلىقتاي ەرەكشە بولدى دەي المايمىن. مۇمكىن, جانكۇيەرلەردىڭ قىزۋ قولداۋى كەزدەسۋ بارىسىنا باسقاشا اتموسفەرا بەرگەن بولار», دەيدى رومان گريگورچۋك.
كوماندالار كەزدەسۋدىڭ العاشقى مينۋتتان-اق گول سوعۋدىڭ قامىنا كىرىسىپ, ويىندى بەلسەندى باستادى. اسىرەسە, الاڭ يەلەرى جىلدام گول سوعۋعا تىرىسىپ باقتى. دەگەنمەن «استانا» قورعانىسى سىر بەرمەي, قاۋىپتى شابۋىلداردىڭ بەتىن قايتارىپ جاتتى. ورايى كەلگەندە قاقپاشى ەريچ تە الىس-جاقىننان باعىتتالعان سوققىلاردى ءدال اڭداپ, دانيالىق كوماندانىڭ شابۋىلشىلارىن اتتاپ باستىرمادى. گريگورچۋك شاكىرتتەرى دە ءجيى شابۋىلداپ, حانسەننىڭ ابدەن مازاسىن قاشىرعان. سونداي ساتتەردىڭ بىرىندە 19 مينۋتتا كابانانگا گول دا سوققان. الايدا يسپانيالىق تورەشى حۋان مارتينەس بۇل تازا گولدى ەسەپتەمەي تاستادى.
95 مينۋتقا سوزىلعان ويىندا ەسەپ اشىلماي, استاناداعى العاشقى كەزدەسۋدە 2:1 ەسەبىمەن جەڭىسكە جەتكەن ەلوردانىڭ «استانا» كومانداسى چەمپيوندار ليگاسىنىڭ ءۇشىنشى كەزەڭىنە جولداما الدى. ەندى «استانا» كومانداسى كەلەسى كەزەڭدە حورۆاتيانىڭ «دينامو» كومانداسىمەن «استانا ارەنا» ستاديونىندا 7 تامىز كۇنى كەزدەسەدى. زاگرەبتىڭ كومانداسى ەكىنشى ىرىكتەۋ كەزەڭدە ءيزرايلدىڭ «حاپوەل» كلۋبىن ەكى ماتچتىڭ قورىتىندىسى بويىنشا 7:2 ەسەبىمەن جەڭگەن.
