بۇگىندە تاراز قالاسىنداعى ء«ۇمىت» بالالار ۇيىندە بەس جاسقا دەيىنگى جەتپىس ءبۇلدىرشىن تاربيەلەنۋدە. ال وسى بالالاردىڭ جاعدايى قالاي دەيتىن بولساق, كۇمىلجىپ قالاتىنىمىز انىق. ولاي دەيتىنىمىز, جۋىردا جامبىل وبلىسىنىڭ اكىمى اسقار مىرزاحمەتوۆ اتالعان بالالار ۇيىنە توسىننان بارعاندا بىرقاتار كەمشىلىك انىقتالعان بولاتىن. اۋەلى اكىم مەكەمەنىڭ اسحاناسىنا باس سۇعىپ, مۇنداعى ازىق-ت ۇلىك تاعامدارىنىڭ جەتىسپەۋشىلىگىن بايقاعان ەدى. سوندا بۇل بالالار نە ءىشىپ, نە جەپ ءجۇر؟ مەملەكەتتەن بولىنگەن قاراجات قايدا؟ ارينە, مەكەمە باسشىسىنان باستاپ قىزمەتكەرلەرىنە دەيىن ەشقانداي ماردىمدى جاۋاپ بەرە العان جوق. سوندا باسشىلار كەلەتىن بولسا عانا ءبارىن جايناتىپ, قالعان ۋاقىتتا وسىلاي جۇرە بەرۋ كەرەك پە دەگەن وي كەلەدى. تەكسەرىس كەزىندە عانا ەمەس, ءاردايىم تالاپقا ساي قىزمەت ەتۋگە مىندەتتى ەمەس پە؟ ال اكىمنىڭ كەلەتىنىن بىلمەي دىمى قۇرىعان مەكەمە باسشىلىعىنان نە كۇتۋگە بولادى؟ دەمەك, بالالاردىڭ كۇندەلىكتى كۇنكورىسى كوڭىلدەگىدەي ەمەس دەگەن ءسوز.
تاعى ءبىر مىسال, تاراز قالاسىنداعى 170 ادامعا قىزمەت كورسەتىپ وتىرعان №1 ارناۋلى الەۋمەتتىك قىزمەتتەر ۇسىنۋ ورتالىعىندا سىرقاتتانعان قارتتاردىڭ ەم-دومىنا قاجەتتى ءدارى-دارمەكتەر جەتىسپەيدى. بۇل رەتتە مەكەمە قىزمەتكەرلەرىنىڭ ابدىراپ, اۋرە-سارساڭعا تۇسكەنىنەن باسقا ەشتەڭە دە بولعان جوق. ءوڭىر باسشىسىنا قاريالار ينۆاتاكسي كەرەكتىگىن ايتىپ جاتتى. اكىم توسىننان كەلگەندە مۇنداي جايتتار ق.سارىمولداەۆ اتىنداعى بالالار ۇيىندە دە انىقتالعان ەدى. اتالعان بالالار ءۇيىنىڭ تاربيەلەنۋشىلەرىنە مونشا كەرەك. باسشى كەلگەندە عانا باس كوتەرىپ, قالعان ۋاقىتتا بۇعىپ وتىرا بەرەتىن مەكەمە قوعام دامۋىنا قانداي ۇلەس قوسا الادى. الەۋمەتتىك مەكەمەلەردى توسىننان ارالاعان اكىم قوعامنىڭ بۇل توپتارى قاشاندا مەيىرىمگە مۇقتاج ەكەنىن, ولارعا كورسەتىلەتىن قىزمەتتىڭ دە ءمىنسىز بولۋ كەرەكتىگىن ايتىپ كەتتى. ەندى جاۋاپتى باسشىلار جايشىلىقتا دا تالاپقا ساي جۇمىس اتقارسا جاقسى عوي...
حاميت ەسامان,
«ەگەمەن قازاقستان»
جامبىل وبلىسى
