بۇل وتىرىستا ءفيلمنىڭ شىعارماشىلىق توبى اتقارعان جۇمىستارى تۋرالى جانە تۇسىرىلىمگە دايىن ەكەنىن جەتكىزدى. كارتينانىڭ ستسەناري اۆتورى ءارى قويۋشى رەجيسسەرى – جۇزدەن استام دەرەكتى ءفيلمنىڭ اۆتورى باقىت قايىربەكوۆ.
اتالعان سپورتتىق دراما قازاقستاننىڭ ەڭبەك ەرى, گرەك-ريم كۇرەسىنىڭ پالۋانى, الەم چەمپيونى, وليمپيادا چەمپيونى, كسرو ەڭبەك سىڭىرگەن سپورت شەبەرى (1980), قازاق كسر ەڭبەك سىڭىرگەن جاتتىقتىرۋشىسى – جاقسىلىق ۇشكەمپىروۆتىڭ ءومىرى تۋرالى باياندايدى.
- بۇل كوركەم فيلم جانرىندا تۇسىرگەلى وتىرعان مەنىڭ العاشقى تۋىندىم. كارتينا 48 كگ سالماقتاعى وليمپيادا چەمپيونى بولعان العاشقى قازاق – جاقسىلىق ۇشكەمپىروۆ تۋرالى. ول ءتۇرلى مەملەكەت دارەجەسىندەگى جارىستارعا قاتىسىپ, جۇلدەلى ورىنداردان كورىنسە دە, سپورتشىعا حالىقارالىق ارەنالارعا شىعۋعا مۇمكىندىك بەرمەگەن. تەك 1980 جىلى عانا ول ماسكەۋدە وتكەن وليمپيادا ويىندارىنا قاتىسۋعا جولداما الىپ, الەمدىك دەڭگەيدە ونەرىن كورسەتە الدى. فيلم وڭتۇستىك قازاقستان اۋىلدارىنىڭ بىرىندە دۇنيەگە كەلگەن سپورتشىنىڭ بالالىق شاعىنان باستاپ, بۇكىل كەڭەس وداعى قوشەمەتپەن قارسى العان پالۋاننىڭ وليمپيادا ويىندارىندا جەتكەن جەتىستىكتەرىنە دەيىنگى ءومىر جولىن بەينەلەيدى, -دەدى ءفيلمنىڭ رەجيسسەرى باقىت قايىربەكوۆ.
قاتارىندا كينورەجيسسەر ساتىبالدى نارىمبەتوۆ, كينودراماتۋرگ سماعۇل ەلۋباي بار «قازاقفيلمنىڭ» ەكسپەرتتىك كەڭەس مۇشەلەرى الدىندا ءتۇسىرىلىم توبى كورمە ۇيىمداستىرىلدى. وندا فيلمدە قولدانىلاتىن رەكۆيزيتتەر مەن سوۆەت وداعى داۋىرىندەگى سپورتتىق كوستيۋمدەر قويىلعان. ەكسپەرتتىك كەڭەس الدىندا ءسوز العان ءفيلمنىڭ باس پروديۋسەرى تاسبولات مەرەكەنوۆ تۇسىرىلىمدەر وسكەمەن, تالدىقورعان, الماتى جانە الماتى وبلىسىندا وتەتىندىگىن ايتتى. سونىمەن قاتار, كەي ساحنالار بەلارۋسسيادا ساحنالاتىنىن حابارلادى. ايتا كەتەلىك, ءفيلمنىڭ ءتۇسىرىلىم جۇمىستارى شىلەدىڭ 29-ى باستالىپ, قىركۇيەكتىڭ سوڭىنا دەيىن جالعاسادى.
- جاقىندا عانا قىتايدا وتكەن شۇى اياسىنداعى كينوفەستيۆالدە «قازاقفيلم» مەن «بەلارۋسفيلم» ىنتىماقتاستىق تۋرالى مەموراندۋمعا قول قويعان بولاتىن. وسى ءىس-شارادان سوڭ, مينسكىگە ءتۇسىرىلىم توبىمەن بارىپ, ونداعى سپورت نىساندارىن, 80-ءشى جىلداردى ەسكە سالاتىن قاجەتتى رەكۆيزيتتەردى كورىپ قايتتىق. مينسكىدە 80-ءشى جىلدارداعى ماسكەۋگە ۇقسايتىن كوشەلەر ساقتالعان ەكەن. وندا زاماناۋي جارناما, دۇكەندەر مەن مەيرامحانالار جوق. ونداعى تۇسىرىلىمدەر تامىز ايىنا بەلگىلەنگەن, - دەپ قوستى رەجيسسەر.
كاستينگ-ديرەكتور ايجان دۇيسەمباەۆنىڭ ايتۋىنشا بيىل ناۋرىز ايىندا جاريالانعان رەسپۋبليكالىق كاستينگكە 1000 استام ءجاسوسپىرىم مەن جەتكىنشەك قاتىسقان. كوپتەگەن فوتو جانە ۆيدەو سىناقتان كەيىن باستى رولگە ەلنار نازارقۇل مەن سانۇرجان سۇلەيمەنوۆ بەكىتىلگەن. ولار جاقسىلىق ۇشكەمپىرىوۆتىڭ بالا كەزى مەن جەتكىنشەك شاعىن سومدايدى. ال تەاتر اكتەرى ولجاس ساق جىگىت شاعىن وينايتىن بولسا, قازاقستاننىڭ حالىق ءارتيسى, جەزقازعان تەاترىنىڭ اكتەرى دوسجان جانبوتاەۆ 60- جاستاعى سپورتشىنىڭ وبرازىن جاسايدى.
ەكسپەرتتىك كەڭەس مۇشەلەرى جوبانى قورعاۋ بارىسىندا فيلمگە قاتىستى ويلارىن ايتىپ, ءتۇسىرىلىم توبىنا ساتتىلىك تىلەدى. اتاپ ايتار بولساق, ساتىبالدى نارىمبەتوۆ: «ماعان تاڭداعان اكتەرلەر ۇناپ وتىر. ولار تانىمال ەمەس. جاڭا اكتەرلەر. بۇل - كارتيناعا شىنايىلىق بەرەدى. توپ جاقسى كينو ءتۇسىرسىن دەپ تىلەيمىن, ويتكەنى جاقسىلىق ۇشكەمپىروۆ كينو كەيىپكەرى بولۋعا لايىقتى تۇلعا». ساتىبالدى نارىمبەتوۆتىڭ سوزىنە قوسىلعان سماعۇل ەلۋباي بىلاي دەدى: ء«بىز جاقسىلىق ۇشكەمپىروۆتىڭ ءومىر جولىن بىلەمىز. ونىڭ جەڭىمپاز ەكەنى دە بىزگە انىق. دەسە دە ءفيلمنىڭ سوڭىنا دەيىن ونىڭ جەڭىمپاز اتاناتىنى بەلگىسىز بولۋى ءتيىس. ءتۇسىرىلىم توبىنا تولىق سەنىم بىلدىرە وتىرىپ, ساتتىلىك تىلەيمىن».
