پارتيا حاتشىسى وقۋشىلار سارايىنىڭ بازاسىندا اشىلعان IT سىنىبىنىڭ اياسىندا قولعا الىنىپ جاتقان جۇمىس بارىسىمەن تانىستى. مۇندا اندرەي دۋپيك جەتەكشىلىك ەتەتىن ۇيىرمە بالالاردى ءۇيىرىپ العان دەرسىز. وقۋشىلار سارايىندا «نۇر وتان» پارتياسى مەن قالالىق ءبىلىم باسقارماسىنىڭ قولداۋىمەن اشىلعان IT سىنىبىندا شاكىرتتەر جازعى لاگەر رەجىمىندە بىلىكتى مۇعالىمدەردەن قاراپايىم الگوريتمدەردىڭ تىزبەسى مەن ءتۇرلى باعدارلاۋ, web-caيتتار جانە كومپيۋتەر ويىندارى, 3D-مودەلدەۋ, انيماتسيالاردى جاساۋدىڭ قىر-سىرىن ۇيرەنەدى. بالالار ءوز بىلىمدەرىن «نۇر وتان» پارتياسىنىڭ حاتشىسى تامارا دۇيسەنوۆاعا كورسەتىپ, جوبالارىمەن تانىستىردى.
قازاقستاندا بارلىعى 7 مىڭعا جۋىق مەكتەپ بار. وسى مەكتەپتەردە «نۇر وتان» پارتياسى 1000 IT سىنىبىن اشۋدى جوسپارلاپ وتىر. 2020 جىلدىڭ سوڭىنا قاراي ءار مەكتەپتە مۇنداي فاكۋلتاتيۆتىك كلاستار بولۋى ءتيىس. بۇگىندە ەلىمىز بويىنشا وسىنداي 89 سىنىپ اشىلدى.
«بارلىق بالالار ينجەنەر جانە باردارلاماشىلار بولۋى كەرەك دەپ مىندەتتەۋ ەمەس. ەڭ باستىسى, ولار مەكتەپ بىتىرگەن سوڭ جاڭا اقپاراتتىق كەڭىستىكتە وزدەرىن ەركىن باعدارلاي ءبىلۋى ءتيىس. ءبىز IT سىنىپتىڭ كومەگى ارقاسىندا جاس ۇرپاق وكىلدەرىنىڭ تسيفرلى ساۋاتتىلىعىن ارتتىرىپ قانا قويماي, كاسىبي باعدارلاماشى-مامان رەتىندە اقپاراتتىق تەحنولوگيانىڭ دامۋىنا ۇلەس قوسادى دەپ ۇمىتتەنەمىز», دەدى ت.دۇيسەنوۆا.
سونداي-اق پارتيا حاتشىسى الماتىداعى «SmArtPointAlmaty» كوۆوركينگ ورتالىعىنىڭ جۇمىسىمەن تانىستى. ۇيىمداستىرۋشىلاردىڭ ايتۋىنشا, اتالعان نىسان كرەاتيۆتى جانە زاماناۋي تۇلعالاردى, سونداي-اق قوعام ءۇشىن ىسكەرلىك پەن مادەني قۇندىلىقتاردى تۋعىزادى. مۇندا جوعارى تەحنولوگيالار مەن بيزنەس سالاسىندا جۇمىس ىستەيتىن 40-قا جۋىق كومپانيا ورنالاسقان. ءبىر ارتىقشىلىعى, تاۋلىك بويى قىزمەت كورسەتەدى.
ورتالىقتا جاستاردىڭ جان-جاقتى دامۋىنا بارلىق جاعداي جاسالعان قاجەتتى تەحنيكالارمەن جانە جيھازدارمەن جابدىقتالعان كونفەرەنتس-زالدار دا جۇمىس ىستەيدى. «كوۆوركينگ ورتالىعى تولىققاندى كلاستەر, وندا بيزنەستى جۇرگىزۋ ءۇشىن بارلىق قاجەتتى قولايلى جانە شاعىن كەڭسەلەر, دەمالىس ورىندارى مەن سپورتپەن اينالىسۋعا ارنالعان بۇرىش قامتىلعان. مەنىڭ ويىمشا, وسىندا تالاپتى جاستار ءوزىنىڭ باعىن سىناپ, ومىردە ءوز ورنىن تابادى», دەپ اتاپ ءوتتى ت.دۇيسەنوۆا.
ستاتيستيكالىق مالىمەت بويىنشا, الماتى حالقىنىڭ جارتىسىن, ياعني 800 مىڭ ادامدى جاسى 14-تەن 35 جاسقا دەيىنگى جاستار قۇرايدى.
ساپار سوڭىندا پارتيا حاتشىسى جامبىل اتىنداعى جاسوسپىرىمدەر كىتاپحاناسىنىڭ جاڭارتىلعان قىزمەتىمەن تانىستى. ورتالىقتا «رۋحاني جاڭعىرۋ» باعدارلاماسى اياسىندا كۇردەلى جوندەۋ جۇرگىزىلگەن. وسىلايشا جاستارعا ارنالعان ينتەللەكتۋالدىق ورتالىققا اينالدى. كىتاپحانادا كىتاپتارمەن, ەلەكتروندى اقپاراتپەن جۇمىس ىستەۋگە, عىلىمي-تانىمدىق فيلمدەردى كورۋگە مۇمكىندىك بەرەتىن زاماناۋي Open space بولمەسى مەن تەگىن Wi-Fi بار.
ساپارباي پارمانقۇل,
«ەگەمەن قازاقستان»
الماتى
