بۇگىنگى كۇنى «7 – 20 – 25» باعدارلاماسىنىڭ شەڭبەرىندە 63 كرەديت ماقۇلدانىپ, الماتى, استانا, اقتاۋ, وسكەمەن جانە ورال قالالارىندا يپوتەكالىق قارىز بەرىلدى.
ۇستىمىزدەگى جىلعى ناۋرىزدا مەملەكەت باسشىسى قازاقستان حالقىنىڭ ءال-اۋقاتىن جاقسارتۋعا باعىتتالعان 5 الەۋمەتتىك باستامانى ۇسىنعانىن ەسكە سالا كەتەيىك. ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» باستاماسىن ىسكە اسىرۋ شەڭبەرىندە قازاقستان ۇلتتىق بانكى «7 – 20 – 25» جاڭا يپوتەكالىق باعدارلاماسىن بەكىتىپ, باعدارلامانىڭ وپەراتورى بولىپ تابىلاتىن «باسپانا» ارنايى ۇيىمىن قۇردى. قازاقستاندىقتارعا يپوتەكالىق قارىزدار بەرىلەتىن تالاپتار باعدارلامانىڭ اتىندا بار: كرەديتتەر ەڭ تومەن 7%-تىك مولشەرلەمە, كرەديتتەلەتىن تۇرعىن ءۇيدىڭ قۇنىنان 20% مولشەرىندەگى باستاپقى جارنامەن, سونداي-اق 25 جىلعا دەيىنگى مەرزىمگە بەرىلەدى. كرەديتتەردىڭ تەڭگەمەن بەرىلەتىنىنىڭ ماڭىزى زور, ال قارىزدى بەرگەندە جانە وعان قىزمەت كورسەتكەندە كەز كەلگەن كوميسسيا الۋعا تىيىم سالىنعان.
«7 – 20 – 25» باعدارلاماسىنىڭ بۇرىن ىسكە اسىرىلعان جانە قازىرگى ۋاقىتتا قولدانىلاتىن باعدارلامالاردان ەرەكشەلىگى وندا نىسانالى مەملەكەتتىك قارجىلاندىرۋدىڭ بولماۋىندا. باعدارلاما كرەديتتىك رەسۋرستاردىڭ تەز قايتارىلۋىن قامتاماسىز ەتۋ ءۇشىن قور نارىعىندا ۇزاق مەرزىمدى رەسۋرستاردى تارتۋ ەسەبىنەن قارجىلاندىرىلادى.
باعدارلاماعا تۇراقتى تابىسى بار, مەنشىك قۇقىعىندا باسپاناسى جانە يپوتەكا بويىنشا وتەلمەگەن بەرەشەگى جوق ازاماتتار قاتىسا الادى.
باعدارلامانىڭ ىسكە قوسىلعانى تۋرالى مالىمدەي وتىرىپ, ۇلتتىق بانك توراعاسى دانيار اقىشەۆ قارىز الۋعا ۇمىتكەرلەردە راستالعان تابىسىنىڭ بولۋى ماڭىزدى ەكەنىن ەرەكشە اتاپ ءوتتى. باعدارلامانىڭ الەۋمەتتىك سيپاتىنا جانە جەڭىلدىك تالاپتارىنا قاراماستان, تۇرعىن ءۇي ساتىپ الۋعا بەرىلەتىن قاراجات كرەديت بولىپ تابىلادى, ال كرەديتكە بانكتىك قارىز شارتىنا قاتاڭ سايكەستىكتە قىزمەت كورسەتۋ قاجەت.
– باعدارلامادا ماسىلدىق بولجانبايدى. بۇل جونىندە مەملەكەت باسشىسى دا بىرنەشە رەت ايتتى. ءبىز «7 – 20 – 25» باعدارلاماسى بويىنشا كرەديت الاتىن ازاماتتار وعان بۇدان ءارى قىزمەت كورسەتە الادى دەپ كوزدەپ وتىرمىز. كرەديت العان قارىز الۋشىلار قانداي دا ءبىر ۋاقىتتان كەيىن ونى وتەي الماي, پروبلەمالىق قارىز الۋشىلار بولسا جانە ءبىز حالىققا ارنالعان باسپانا پروبلەماسىن شەشە وتىرىپ, يپوتەكالىق قارىز الۋشىلار پروبلەماسىنا تاپ بولساق, جاعىمسىز جاعداي ورىن الادى, – دەدى دانيار اقىشەۆ ۇلتتىق بانكتىڭ تاياۋ ۋاقىتتا عانا پروبلەمالىق يپوتەكالىق كرەديتتەردى قايتا قارجىلاندىرۋدىڭ اۋقىمدى باعدارلاماسىن ىسكە اسىرۋدى اياقتاعانىن ەسكە ءتۇسىرىپ.
باعدارلامانى ىسكە اسىرۋ قازاقستاندىقتاردىڭ مەنشىكتى باسپانا الۋ ارمانىن عانا ورىنداماي, قازاقستان ەكونوميكاسى درايۆەرلەرىنىڭ ءبىرى – قۇرىلىس سەكتورىنا ىنتالاندىرۋشى اسەر ەتەتىنى كۇتىلەدى.
– باعدارلامانى ىسكە اسىرۋ كوپتەگەن قازاقستاندىق ءۇشىن كوپتەن كۇتكەن باسپاناسىن ساتىپ الۋ مۇمكىندىگىن بەرەدى, يپوتەكالىق كرەديتتەۋ قارقىندارىن جانداندىرادى جانە تۇتاستاي العاندا ەل ەكونوميكاسىنىڭ دامۋىنا وڭ اسەر ەتەدى, – دەپ اتاپ ءوتتى ۇلتتىق بانك توراعاسى.
دانيار اقىشەۆ باعدارلامانى ىسكە اسىرۋ باستالعانىن, العاشقى كرەديتتەر الماتى, استانا, اقتاۋ, وسكەمەن جانە ورال قالالارىندا بەرىلگەنىن اتاپ كورسەتتى.
ءوز كەزەگىندە «باسپانا» يپوتەكالىق ۇيىمىنىڭ باسقارما توراعاسى قايرات التىنبەكوۆ بۇگىنگى كۇنى 7 بانكتىڭ باعدارلاماعا قاتىسۋشى بولعانىن جانە تاعى دا 2 بانكتىڭ جوباعا قاتىسۋعا دايىندالىپ جاتقانىن حابارلادى.
– بۇگىنگى كۇنى «باسپانا» تسەنتركرەديت بانكىمەن, حالىق بانكىمەن, ەۋرازيالىق بانكپەن, تسەسنابانكپەن, اتف بانكپەن, ربك بانكىمەن جانە تۇرعىن ءۇي قۇرىلىس جيناق بانكىمەن كەلىسىمدەرگە قول قويدى. سبەربانك پەن فورتە بانك باعدارلاماعا قىزىعۋشىلىق تانىتىپ, تەحنيكالىق جۇمىستار اياقتالعان سوڭ «7 – 20 – 25» يپوتەكالىق باعدارلاماسى بويىنشا كەلىسىمگە قول قويۋعا دايىن. وسىلايشا, ءبىزدىڭ ارىپتەس بانكتەرىمىزدىڭ دامىعان جەلىسىن ەسكەرە وتىرىپ, ءبىز «7 – 20 – 25» يپوتەكالىق باعدارلاماسى ەلدىڭ بارلىق ءوڭىرىن قامتيدى جانە قازاقستاننىڭ كوپتەگەن ازاماتتارىنا كوپتەن كۇتكەن باسپاناسىن الۋعا كومەكتەسەدى دەپ ۇمىتتەنەمىز, – دەپ اتاپ ءوتتى قايرات التىنبەكوۆ.
يپوتەكالىق ۇيىمنىڭ باسشىسى باعدارلامانىڭ تالاپتارىندا ساتىپ الىناتىن تۇرعىن ءۇي ءۇشىن باعا شەگى بەلگىلەنگەنىن ەسكە سالدى. استانا, الماتى, اقتاۋ جانە اتىراۋ ءۇشىن ول 25 ميلليون تەڭگەنى, قالعان وڭىرلەر ءۇشىن 15 ميلليون تەڭگەنى قۇرايدى. نىسانالى ينديكاتورلارعا سايكەس يپوتەكالىق كرەديتتەردىڭ جالپى كولەمى 1 تريلليون تەڭگە بولادى.
ۇلتتىق بانك باسشىسى تۇرعىن ءۇيدىڭ ەڭ كوپ قۇنىن شەكتەۋ باعدارلامانىڭ الەۋمەتتىك باعىتىنا بايلانىستى بەلگىلەنگەنىن اتاپ ءوتتى.
– باعدارلاما العاش رەت تۇرعىن ءۇي ساتىپ الاتىن ادامدارعا باعدارلانعان. مەنىڭ ويىمشا, ەشقاشان تۇرعىن ءۇيى بولماعان, وعان اسا مۇقتاج جانە بىردەن ۇلكەن پاتەرلەر نەمەسە ۇيلەر ساتىپ الۋعا دايىن ازاماتتار بىزدە سونشالىقتى كوپ ەمەس. بۇل ورايدا مىناداي قيسىن بار, مەملەكەت قولجەتىمدى باسپانا الۋ ءۇشىن جەڭىلدىك تالاپتارىن ۇسىنادى. تيىسىنشە, ونىڭ باعاسى شەكتەۋلى بولۋعا ءتيىس. ەكىنشىدەن, بۇل باعدارلاما الەۋمەتتىك باعدارلانباعان جىلجىمايتىن م ۇلىك وبەكتىلەرىن تارتۋعا جول بەرمەۋ ءۇشىن ىسكە اسىرىلادى, – دەپ ءتۇسىندىردى دانيار اقىشەۆ.
«7 – 20 – 25» باعدارلاماسىن ىسكە قوسۋ قازاقستاندىقتار اراسىندا ۇلكەن رەزونانس تۋعىزدى: باعدارلاما ىسكە قوسىلعان العاشقى ەكى كۇندە الەۋەتتى قارىز الۋشىلاردان 4 مىڭنان استام ءوتىنىش كەلىپ ءتۇستى. حالىقتىڭ تاراپىنان جوعارى سۇرانىستى ەسكەرە وتىرىپ, ۇلتتىق بانك, «باسپانا» جانە ارىپتەس بانكتەر باعدارلامانىڭ تالاپتارى تۋرالى اۋقىمدى اقپاراتتىق-تۇسىندىرمە جۇمىسىن جۇرگىزەدى. بۇدان باسقا, «باسپانا» www.baspana72025.kz رەسمي سايتىن ىسكە قوستى, وندا باعدارلاما تۋرالى بارلىق قاجەتتى اقپارات بار. وسى ماقساتپەن + 7 (727) 227-20-25 تەگىن ءنومىرى بويىنشا تاۋلىك بويى call-ورتالىق جۇمىس ىستەۋدە. سونىمەن قاتار قازىرگى ۋاقىتتا «7 – 20 – 25» باعدارلاماسىنىڭ موبيلدىك قوسىمشاسى ازىرلەنۋدە, ول تاياۋ ۋاقىتتا App Store جانە Play Market-تە كوشىرىپ الۋ ءۇشىن قولجەتىمدى بولادى.
سامات مۇسا,
«ەگەمەن قازاقستان»
