«قازاق ادەبيەتى» گازەتىنىڭ باس رەداكتورى بەلگىلى جۋرناليست, اقىن جاناربەك ءاشىمجان رەسپۋبليكالىق «انا ءتىلى» گازەتىنىڭ باسشىسى بولىپ تاعايىندالدى. ال «قازاق ادەبيەتى» گازەتىنىڭ باس رەداكتورلىعىنا «اباي-اقپارات» قازاقستان ينتەرنەت كەڭىستىگىن دامىتۋ قورى» قوعامدىق قورىنىڭ پرەزيدەنتى, جازۋشى داۋرەن قۋات كەلدى.
ج.ءاشىمجان ءار جىلدارى قالالىق «الماتى اقشامى» گازەتىندە, «قازاقستان» جۋرنالىندا, رەسپۋبليكالىق «جاس الاش» گازەتىندە قىزمەت ەتكەن. 2005–2008 جىلدارى رەسپۋبليكالىق «جاس قازاق» ۇلتتىق اپتالىعىندا باس رەداكتوردىڭ ورىنباسارى بولىپ, 2008 جىلدان باستاپ قازاقستان جازۋشىلار وداعىنا قاراستى «جۇلدىز», «پروستور», «سىن» جۋرنالدارى مەن «قازاق ادەبيەتى» گازەتتەرىن بىرىكتىرگەن «قالامگەرمەديا» ورتالىعىنىڭ ديرەكتورى قىزمەتىن اتقاردى.
د.قۋات رەسپۋبليكالىق «حالىق كەڭەسى», حالىقارالىق «قازاق ەلى», رەسپۋبليكالىق «جاس الاش» گازەتتەرىندە تىلشىلىك قىزمەت اتقاردى. 2004-2007 جىلدارى رەسپۋبليكالىق «التىن وردا» گازەتىندە, 2008-2009 جىلدارى رەسپۋبليكالىق «جاس قازاق» گازەتىندە, كەيىنگى جىلدارى «Abai.kz» اقپاراتتىق پورتالىندا باس رەداكتور لاۋازىمىندا بولدى.
«ەگەمەن-اقپارات»
