مىسالى, استانادا قابىلدانعان ەلدىڭ يندۋستريالدىق-يننوۆاتسيالىق دامۋ باعدارلاماسى سۇرانىس پەن ۇسىنىس نارىعىن قالا اۋماعىندا عانا ەمەس, بۇكىل رەسپۋبليكا بويىنشا قالىپتاستىرۋعا جول اشتى» دەۋى ايقىن اقيقاتقا اينالىپ, ۇزدىكسىز پروگرەسس پەن تۇراقتى وركەندەۋ جولىنىڭ باستاۋى بولعانىن سولتۇستىكقازاقستاندىقتار دا اركەز ماقتانىش ەتەدى. باس قالاعا قاراپ وي دا, بوي دا تۇزەپ كەلە جاتقان تەرىسكەيلىكتەر وسىدان بىرەر جىل بۇرىن بوگەنباي جانە جەڭىس كوشەلەرى قيىلىسىندا ساياباق تۇرعىزىپ, تارتۋ ەتسە, بيىل جالپى ۇزىندىعى 56 شاقىرىمدى قۇرايتىن ۆەلوتراسسانىڭ سالىنۋىنا ءوز ۇلەستەرىن قوستى. ونى پايدالانۋعا بەرۋگە 30 شاقتى تەحنيكا, 50-دەن استام ادام جۇمىلدىرىلىپ, جول جيەكتەرىنە 160 اسپالى شام, 25 قوقىس جاشىگى ورناتىلدى, دەدى سويلەسكەنىمىزدە «جولقۇرىلىس-نس» جشس-ءنىڭ ۋچاسكە جەتەكشىسى دوسبول جولماعانبەتوۆ.
«استانانىڭ گۇلدەنۋى – قازاقستاننىڭ گۇلدەنۋى» مەملەكەتتىك باعدارلاماسى اياسىندا توعىز جولدىڭ تورابىندا ورنالاسقان پەتروپاۆل قالاسى دا ءوسىپ-وركەندەپ كەلەدى. جۋىردا نۇرسۇلتان ءابىش ۇلىنىڭ تىكەلەي تاپسىرماسىنا وراي سولتۇستىك قازاقستان وبلىسىنىڭ 2018-2021 جىلدارعا ارنالعان كەشەندى دامۋ جوسپارى ءتۇزىلىپ, 64 ءىس-شارانى ىسكە قوسۋ بەلگىلەندى. ول بويىنشا 12 باعىتتى قامتيتىن جوبالار شەڭبەرىندە الەۋمەتتىك نىساندار, كولىك جانە ينجەنەرلىك كوممۋنيكاتسيالار, اگروونەركاسىپ, قورعانىس وبەكتىلەرى جاڭعىرتىلادى. 300 ميلليارد تەڭگەنىڭ ينۆەستيتسيالىق قارجىسى قۇيىلىپ, 14 مىڭ جاڭا جۇمىس ورنى قۇرىلادى. جۇمىس توبىنىڭ وتىرىسىندا ايماق باسشىسى قۇمار اقساقالوۆ ەلباسى تاپسىرماسىن ورىنداۋدىڭ ماڭىزدىلىعىن, كەشەندى جۇمىستار ءوڭىردىڭ الەۋمەتتىك-ەكونوميكالىق دامۋىنا زور سەرپىن بەرەتىنىن, تۇرعىنداردىڭ ءومىر ءسۇرۋ ساپاسىن نىعايتاتىنىن اتاپ كورسەتتى. تەك بيىلدىڭ وزىندە عانا جىلۋ, جارىق, سۋ جۇيەلەرىن قالپىنا كەلتىرۋگە رەسپۋبليكالىق قازىنادان 5,1 ميلليارد تەڭگە باعىتتالىپ وتىر. «بەس الەۋمەتتىك باستاما» جوباسى بويىنشا 2018-2019 جىلدارى وبلىس ورتالىعىندا 1,5 مىڭ پاتەر تۇرعىزىلادى. ءبىر سوزبەن ايتقاندا, «استانا ەلدىڭ بارلىق وڭىرىنە ءوڭ بەرەتىن جانە مەملەكەت جۇرەگىنىڭ جۇمىس قابىلەتىنە جاڭعىرىق بولىپ جەتەتىن بارشا قوعامدىق قاتىناستىڭ جيىنتىعى» ەكەنىن سولتۇستىكقازاقستاندىقتار دا جاقسى سەزىنەدى.
مەرەيتوي قارساڭىندا «استانا – بەيبىتشىلىك پەن كەلىسىمنىڭ باستاۋى» اتتى شارانى قازاقستان حالقى وبلىستىق اسسامبلەياسى ۇيىمداستىرىپ, قازىرگى زامانعا لايىق استانا سالۋ يدەياسى, بۇگىنگى كۇنى الەمدىك زور مارتەبەگە يە ەلوردانىڭ قالىپتاسۋ توڭىرەگىندە تاعىلىمدى اڭگىمەلەر قوزعالدى. «قازاق ءتىلى» حالىقارالىق قوعامى جەرگىلىكتى ۇيىمىنىڭ توراعاسى جانكەلدى ءتاجيننىڭ ايتۋىنشا, استانا قازاقستاننىڭ, قازاق حالقىنىڭ برەندىنە اينالىپ, جەر ءجۇزى تاۋەلسىزدىكتىڭ , حالىقتار دوستىعىنىڭ سيمۆولى رەتىندە تانيدى. «ابىلايحان رەزيدەنتسياسى» مۋزەي كەشەنىندە «كيەلى تۇركىستان» كورمەسى اشىلىپ, جۇرتشىلىق نازارىنا نەبىر قۇندى جادىگەرلەر ۇسىنىلدى. «ازىرەت سۇلتان» مەملەكەتتىك تاريحي-مادەني قورىق مۇراجايى جىلىنا 60-تان استام ءىس-شارا وتكىزىپ, استانا اجارىن ايشىقتاۋعا دا زور ۇلەس قوسىپ كەلەدى.
«اسىل ميراس «قايىرىمدىلىق قورىنىڭ قولداۋىمەن جاقىندا بالالار اۋرۋحاناسىنا 76,6 ميلليون تەڭگەنىڭ ستاتسيونارلىق ساندىق رەنتگەنوگرافيالىق كەشەنى, امبەباپ ۋلترادىبىستىق جانە ەكى دەزينفەكتسيالىق كامەرا تارتۋ ەتىلدى. سالتاناتتى راسىمدە سويلەگەن سوزىندە قوردىڭ ديرەكتورى مارات ايتماعامبەتوۆ مەملەكەت-جەكەمەنشىك ارىپتەستىگى شەڭبەرىندە قولعا الىنعان جوبالار ەلوردا مەرەيتويىنا ارنالعانىن, ەلىمىزدە التى ساۋىقتىرۋ ورتالىعى اشىلعانىن, 366 بالا ەمدەۋ كۋرستارىنان وتكەنىن, سوڭعى بەس جىلدا جارتى ميلليارد تەڭگەنىڭ قايىرىمدىلىق شارالارى كورسەتىلگەنىن جەتكىزدى. وڭىردە مەديتسينالىق كلاستەر قۇرۋ, 700 ورىندىق كوپسالالى اۋرۋحانا تۇرعىزۋ مىندەتى تۇر.
وسىلايشا استانانىڭ 20 جىلدىعى قىزىلجار وڭىرىندە دە كەڭ كولەمدە اتاپ ءوتىلىپ, تۇرعىنداردىڭ ەرەكشە قىزىعۋشىلىعىن تۋدىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
