دەپۋتات قاراجال قالاسىنىڭ تۇرعىن ءۇي-كوممۋنالدىق شارۋاشىلىعى, جولاۋشىلار كولىگى, اۆتوموبيل جولدارى قۇرىلىس جانە تۇرعىن ءۇي ينسپەكتسياسى ءبولىمى مەكەمەسىندە, №5 مەكتەپتە, سۋ قويماسىندا, «وركەن-اتاسۋ» وكىلدىگىنىڭ «وركەن» مەكەمەسىندە بولىپ, ەڭبەك ۇجىمدارىمەن كەزدەستى. ر.ابدىكەروۆ «وركەن» مەكەمەسىندەگى كەزدەسۋى بارىسىندا كاسىپورىننىڭ جۇمىسىمەن تانىسىپ, وندىرىلەتىن كەننىڭ قورى جانە ونى يگەرۋ ماسەلەلەرىن كوتەردى.
بۇدان كەيىن سەناتور قاراجال قالالىق ءماسليحاتىنىڭ دەپۋتاتتارىمەن, ايماقتاعى مەكەمە باسشىلارىمەن, بۇقارالىق اقپارات قۇرالدارىنىڭ وكىلدەرىمەن كەزدەسىپ, ولارعا ەلباسىنىڭ بەس الەۋمەتتىك باستاماسىنىڭ ماڭىزىن ءتۇسىندىردى. سونىمەن قاتار 7-20-25 باعدارلاماسى مەن ءبىلىم گرانتتارى, ستۋدەنتتەردى جاتاقحانامەن قامتاماسىز ەتۋ جايى دا اڭگىمە بولدى.
– بيىل جاڭاارقا اۋدانى بويىنشا مەكتەپ تۇلەكتەرىنىڭ 80 پايىزى تەحنيكالىق ماماندىقتارعا قۇجات تاپسىرىپتى. بولاشاقتا ولار قاراجال-جايرەم ايماعىنداعى فابريكالارعا جۇمىسقا ورنالاسىپ, جۇمىسسىزدىق ازايادى دەپ ويلايمىن, – دەدى سەناتور. ول ايماقتا اتقارىلىپ جاتقان يگى ىستەرگە توقتالىپ, ەڭبەككەرلەردىڭ قاجىرلى قىزمەتىنە ريزاشىلىعىن ءبىلدىردى.
ر.ابدىكەروۆ قاراجال قالاسىنىڭ اكىمى ت.دوساەۆپەن بىرگە وڭىردەگى الىپ كاسىپورىن «جايرەم كەن-بايىتۋ كومبيناتى» اكتسيونەرلىك قوعامىندا بولىپ, اتقارىلىپ جاتقان جۇمىستارمەن تانىستى. سەناتور كاسىپورىن باسشىلىعىمەن جانە جۇمىسشىلارمەن كەزدەسۋ بارىسىندا ولاردىڭ ەڭبەكتەرىنىڭ تابىستى بولۋىنا تىلەكتەستىگىن ءبىلدىردى.
* * *
سەناتور نۇرجان نۇرسيپاتوۆ ايماقتارعا ساپارى اياسىندا «نۇر وتان» پارتياسىنىڭ پاۆلودار وبلىستىق بولىمشەسىنە بارىپ, جەرگىلىكتى ازاماتتاردى قابىلدادى.
قابىلداۋ بارىسىندا پاۆلودار وبلىستىق ەكولوگيا دەپارتامەنتى زەرتحانالىق-تالداۋ ءبولىمىنىڭ باسشىسى ەرىك ەگىمباەۆ جوبالىق قۇجاتتاردى ازىرلەۋ بارىسىندا ەكولوگيالىق مونيتورينگتى اۆتوماتتاندىرۋ كەرەكتىگى تۋرالى ۇسىنىسىن جەتكىزدى. سونداي-اق پاۆلودار وبلىسىنداعى اۋداندىق ماڭىزى بار جانە اۋىلدىق دارىگەرلىك مەكەمەلەردىڭ قولدانىستاعى نەگىزگى تاريفتەرىن وزگەرتۋ تۋرالى ماسەلە كوتەرىلدى. ال شارباقتى اۋداندىق ءماسليحاتىنىڭ دەپۋتاتى ليۋدميلا مارينكو بولسا, ەلىمىزدە رەسەي ۇلگىسىندە انا كاپيتالى جۇيەسىن ەنگىزۋ مۇمكىندىگى تۋرالى ويىن ورتاعا سالدى. كەزدەسۋ سوڭىندا سەنات دەپۋتاتى تالقىعا سالىنعان ماسەلەلەردى نازارىندا ۇستايتىنىن جەتكىزدى.
سونداي-اق ن.نۇرسيپاتوۆ پارتيانىڭ وبلىستىق بولىمشەسىندەگى پارتيالىق باقىلاۋ كوميسسياسى مەن سىبايلاس جەمقورلىققا قارسى ءىس-قيمىل جونىندەگى قوعامدىق كەڭەس مۇشەلەرىمەن جۇمىس بابىنداعى كەزدەسۋ وتكىزدى. وندا پارتيانىڭ سىبايلاس جەمقورلىققا قارسى 2015-2025 جىلدارعا ارنالعان باعدارلاماسى, «نۇر وتان» پارتياسىنىڭ جانە ەلىمىزدىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ىنتىماقتاستىق تۋرالى مەموراندۋمى اياسىندا بىرلەسكەن شارالار جۇرگىزۋ جوسپارىن ىسكە اسىرۋ, مەملەكەت باسشىسىنىڭ بەس الەۋمەتتىك باستاماسىنىڭ ورىندالۋىن پارتيالىق باقىلاۋمەن قامتاماسىز ەتۋ ماسەلەلەرى تالقىلاندى.
* * *
ايماقتارعا ساپار اياسىندا سەناتور سەرگەي ەرشوۆ قاراعاندى وبلىسىنداعى ۇلىتاۋ اۋداندىق ءماسليحاتىنىڭ دەپۋتاتتارىمەن جانە تۇرعىندارىمەن كەزدەسۋ وتكىزدى.
تۇرعىندارمەن كەزدەسۋ بارىسىندا سەنات دەپۋتاتى ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋى مەن بەس الەۋمەتتىك باستاماسىن جانە «100 ناقتى قادام» ۇلت جوسپارىن جۇزەگە اسىرۋعا قاتىستى پارلامەنت سەناتىنىڭ زاڭ شىعارۋ قىزمەتى تۋرالى اڭگىمەلەدى. سونىمەن قاتار جەرگىلىكتى ءوزىن-ءوزى باسقارۋ مەن جەر قاتىناستارىن دامىتۋ ماسەلەلەرى, پارلامەنت تاياۋدا قابىلداعان «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى», «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردىڭ ەرەجەلەرىن ىسكە اسىرۋ تەتىكتەرى تالقىلاندى.
اۋداندىق ءماسليحات دەپۋتاتتارى تۋريزم سالاسىنداعى مامانداردى دايارلاۋ مەن ەكولوگيالىق زاڭنامانى جەتىلدىرۋگە بايلانىستى سۇراقتار قويدى. سونداي-اق ولار سەناتورعا وبلىستاعى مەكەمە قۇرىلىسى, اۆتوموبيل جولدارىن جوندەۋ جانە تاعى باسقا وزەكتى ماسەلەلەردىڭ ءتىزىمىن بەردى. سەنات دەپۋتاتى بۇدان وزگە ۇلىتاۋ اۋداندىق ورتالىق اۋرۋحاناسىندا جانە وقۋشىلار ۇيىندە بولىپ, بىرقاتار كەزدەسۋلەر وتكىزدى. دارىگەرلەرمەن كەزدەسۋ بارىسىندا دەپۋتات دەنساۋلىق ساقتاۋ جانە ءبىلىم سالاسىنداعى زاڭنامانى جەتىلدىرۋگە قاتىستى ساۋالدارعا جاۋاپ بەردى.
ال 3 شىلدە كۇنى س.ەرشوۆ جەزقازعاندا وسى شاھار مەن ساتباەۆ قالالارىنا, ۇلىتاۋ, جاڭاارقا اۋداندارى مەن قاراجال كەنتى, جايرەم اۋىلىنىڭ تۇرعىندارىنا تاۋلىك بويى جەدەل دارىگەرلىك كومەك كورسەتەتىن ورتالىق قالالىق اۋرۋحانادا بولدى. دەپۋتات وبلىستاعى دەنساۋلىق ساقتاۋ سالاسىنىڭ مەملەكەت-جەكەمەنشىك ارىپتەستىگى بويىنشا قارقىندى دامىپ جاتقانىنا كۋا بولىپ, ۇجىممەن كەزدەسۋ بارىسىندا ەلىمىزدىڭ دەنساۋلىق ساقتاۋ سالاسىنىڭ الدىندا تۇرعان بىرقاتار مىندەتتەر, اتاپ ايتقاندا مەديتسينانىڭ ساندىق تۇرعىدا دامۋى, ەلەكتروندى دەنساۋلىق قۇجاتىن ەنگىزۋ ماسەلەلەرى تۇرعانىن ايتىپ ءوتتى. سونىمەن بىرگە ماماندار دايارلاۋ جانە ولاردىڭ الەۋمەتتىك قامتىلۋى ماسەلەسى كوتەرىلدى. وسى ورايدا ايتا كەتەر جايت, سوڭعى ءۇش جىل ىشىندە جەزقازعانعا 17 جاس مامان كەلگەن كورىنەدى. سەنات دەپۋتاتى ماماندار تاپشىلىعى ماسەلەسى ءتيىستى مينيسترلىكتەر مەن ۆەدومستۆولار دەڭگەيىندە كوتەرىلۋى قاجەتتىگىن اتاپ ءوتتى. ول «قازاقمىس» كومپانياسىنىڭ ۇلگىسىندە جەرگىلىكتى جاستاردى وقىتۋدىڭ كەلەشەگى وتە زور ەكەنىنە توقتالدى.
دايىنداعان
ۆەنەرا تۇگەلباي,
«ەگەمەن قازاقستان»
