- ەلوردامىزدى سارىارقا تورىنە كوشىرۋ تۋرالى قابىلدانعان شەشىمنەن باستاپ, باس قالانىڭ قالىپتاسۋى جانە 20 جىلدىق تۇتاس دامۋ كەزەڭى ەلباسى نۇرسۇلتان ءابىش ۇلى نازارباەۆتىڭ ەسىمىمەن تىكەلەي ءارى تىعىز بايلانىستى. تاۋەلسىز قازاقستان تاتۋلىق پەن بەيبىتشىلىكتىڭ ورتالىعى دەيتىن بولساق, استانا – التىن بەسىگى. سەبەبى وسى از عانا ۋاقىت ىشىندە استانا ەۋروپاداعى قاۋىپسىزدىك جانە ىنتىماقتاستىق ۇيىمى باسشىلارىنىڭ ءسامميتىن, بىرنەشە رەت الەمدىك جانە ءداستۇرلى ءدىن باسشىلارىنىڭ سەزىن وتكىزىپ كەلەدى. حالىقارالىق ەكسپو-2017 كورمەسىن ابىرويمەن ۇيىمداستىردى. قىسقى ازيا ويىندارى مەن سپورتتىڭ ءتۇرلى شارالارىن اتقارىپ كەلەدى. سيريا قاقتىعىسىنىڭ ءتۇيىنىن تارقاتۋ ماقساتىندا تالاي رەت باس قوسقان مەكەنگە اينالدى. بۇگىن مىنە استانا حالىقارالىق قارجى ورتالىعىنىڭ اشىلۋ سالتاناتى ءوتتى, - دەدى التاي كولگىنوۆ.
ءوڭىر باسشىسىنىڭ ايتۋىنشا, 20 جىلدا استانا قۇرىلىسىنا بيۋدجەتتەن 2,3 ترلن تەڭگە بولىنگەنىمەن, ول قازىرگە دەيىن ەل قازىناسىنا شامامەن 7 ترلن تەڭگە سالعان ەكەن. ياعني قالانىڭ دامۋىنا سالىنعان مەملەكەتتىڭ قارجىسى ءۇش ەسە ارتىعىمەن قايتارىلدى. استانا حالقىنىڭ سانى جيىرما جىلدىڭ ىشىندە 3,5 ەسەگە ءوسىپ, 1 ميلليوننان اسقان.
بۇگىندە ساياسي-ەكونوميكالىق قانا ەمەس, مادەني, رۋحاني جۇرەگى اتانعان ەلوردا قازاقستاننىڭ بارلىق وڭىرلەرىنىڭ باستى قوزعاۋشى كۇشى بولىپ, وڭىرلەردىڭ دامۋىنا دا سەرپىن بەرىپ كەلەدى. بۇگىندە پرەزيدەنت قابىلداعان «نۇرلى جەر», «نۇرلى جول» باعدارلامالارى ارقىلى باتىس قازاقستان وبلىسىنىڭ ءاربىر شالعاي ەلدى مەكەنىنە تازا اۋىز سۋ جەتىپ, باسپانا, ءبىلىم بەرۋ جانە دەنساۋلىق ساقتاۋ نىساندارى بوي كوتەرۋدە.
- ناقتى دالەلدەرمەن ايتار بولسام, وسى 20 جىل ىشىندە وبلىس ەكونوميكاسىنا 4 ترلن.تەڭگەگە جۋىق ينۆەستيتسيا تارتىلعان. 4 ملن. شارشى مەتر تۇرعىن ءۇي پايدالانۋعا بەرىلدى. وتكەن 20 جىل ىشىندە 1800 شاقىرىم جول جوندەلگەن. وڭىرىمىزدەگى جىلدار بويى قوردالانىپ كەلە جاتقان جولدىڭ پروبلەمالارى بىرتىندەپ شەشىلۋى – ەل دامۋىنىڭ ناقتى كورىنىسى. تازا اۋىز سۋ الىس ەلدى مەكەندەرگە جەتكىزىلۋدە. سوڭعى ەكى جىل ىشىندە 2 مىڭ شاقىرىم سۋ قۇبىرى تارتىلدى. مىنە, بۇل استانامەن قاتار ءبىزدىڭ ءوڭىرىمىزدىڭ دە دامۋىنىڭ كورسەتكىشتەرى, - دەدى التاي سەيدىر ۇلى.
ايتا كەتۋ كەرەك, استانانىڭ كوركەيۋىنە ءاربىر باتىسقازاقستاندىقتىڭ دا قوسقان ۇلەسى بار. 20 جىلدىق مەرەيتوي قارساڭىندا ەلوردادا سوۆەت وداعىنىڭ باتىرى مانشۇك مامەتوۆانىڭ ەسكەرتكىشى بوي كوتەرىپ, «اقجايىق» تىنىمباعى پايدالانۋعا بەرىلدى.
قازبەك قۇتتىمۇرات ۇلى,
«ەگەمەن قازاقستان»
ورال قالاسى
