كەزدەسۋ بارىسىندا جاسىل ەكونوميكانى, بيزنەستى, لوگيستيكانى جانە قارجى جۇيەسىن دامىتۋ سالالارىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرى تالقىلاندى. قازاقستان مەن سينگاپۋر اراسىندا 25 جىل ىشىندە بارلىق باعىتتار بويىنشا سىندارلى ديالوگ ورناعان, ەكىجاقتى قارىم-قاتىناستى دامىتۋدا جانە حالىقارالىق ۇيىمدار اياسىندا ءوزارا ءىس-قيمىل جاساۋدا وڭ ءۇردىس قالىپتاسقان.
سونداي-اق, كەزدەسۋگە قاتىسۋشىلار سوت جۇيەسىنە تسيفرلىق تەحنولوگيالاردى ەنگىزۋ جانە Smart City جوبالارىن ىسكە اسىرۋداعى تابىستىلىق تۋرالى تاجىريبە الماستى.
ب. ساعىنتاەۆ قازاقستان سينگاپۋردى وڭتۇستىك-شىعىس ازيا مەن اسەان ايماعىنداعى نەگىزگى سەرىكتەس رەتىندە قاراستىراتىنىن اتاپ ءوتتى. سينگاپۋردىڭ ساۋدا جانە قارجى, كولىك–لوگيستيكالىق حاب رەتىندەگى جالپىعا تانىلعان بەدەلىن ەسكەرە وتىرىپ, ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ەكىجاقتى قارىم-قاتىناستىڭ باسىم سالاسى بولىپ قالا بەرمەك.
پرەمەر-مينيستر وتكەن جىلى $123,7 ملن قۇراعان ەكىجاقتى تاۋار اينالىمىنىڭ ديناميكاسىنداعى وڭ وزگەرىستەردى اتاپ ءوتتى. سوڭعى ۋاقىتتا ەكىجاقتى قارىم-قاتىناس ايتارلىقتاي جاندانا ءتۇستى. بۇدان وزگە, قازاقستاندىق نارىقتا سينگاپۋرلىق ينۆەستورلار ءۇشىن ەۋرازيالىق ەكونوميكالىق وداق جاڭا مۇمكىندىكتەر اشۋدا. قازاقستان سينگاپۋردىڭ ەاەو-مەن ەركىن ساۋدا تۋرالى كەلىسىم جاساسۋ جونىندەگى باستاماسىن قولدايدى.
سونىمەن قاتار, قازىرگى تاڭدا قازاقستاننىڭ بىرجاقتى تارتىپتە سينگاپۋر ازاماتتارىنا ۆيزالىق رەجيمدى 30 كۇنگە دەيىن الىپ تاستاۋىنا بايلانىستى ىسكەرلىك بايلانىستار كەڭەيىپ جاتقانى بايقالۋدا.
2016 جىلى ءوزارا ساۋدا-ساتتىق $91,4 ملن قۇرادى. ەكى ەل اراسىنداعى تاۋار اينالىمى وتكەن جىلى $123,7 ملن قۇرادى, سونىڭ ىشىندە ەكسپورت — $86,5 ملن. 2018 جىلدىڭ ءى توقسانىنداعى تاۋار اينالىمى $28,1 ملن بولدى.
