...توقسانىنشى جىلدارى ەلگە جاڭا جۇيە ەنىپ, اركىم جەكە وتاۋىن قۇرىپ جاتقاندا قاراشەۆتار «يۋبيلەينىي» جشس-ءىن قۇرىپ, ءبىر كەزدەرى «اكساكوۆكا», «يۋبيلەينىي» اتالعان كەڭشاردى ىدىراتۋعا جول بەرمەي, ساقتاپ قالۋعا كۇش سالدى.
– باستاپقىدا بۇل ىسىمىزگە كۇدىكپەن قارايتىندار كوپ بولدى, – دەيدى بۇگىندە «يۋبيلەينىي» جشس باسشىسى مامىربەك قاراشەۆ. – ۇجىمدى تاراتپاي, ء«بىر جاعادان باس, ءبىر جەڭنەن قول» شىعارا, بىرلەسە ەڭبەك ەتۋ باستاماسىن قولداۋدان گورى كەرى تارتاتىنداردىڭ كوپ بولاتىنى بەلگىلى عوي. «قىرىق كىسى ءبىر جاق, قىڭىر كىسى ءبىر جاق» بولىپ ءبىر جۇيەگە كەلگەنشە ءارى-ءسارى كۇي كەشكەنىمىز راس.
ۇزاق جولعا شىققان كەرۋەن جۇگىن تەز تۇزەپ الدى. تارباعاتايدىڭ قويناۋىندا وتىرعان اۋىل جۇرتشىلىعى وزگەدەن كومەك كۇتپەي, ءوز ەڭبەكتەرىنە ارقا سۇيەدى. ايرانداي ۇيىعان كولدەنەڭ اتتى الاقانداي اۋىلدىڭ اتاعى الىسقا تارادى. 1994 جىلى پرەزيدەنت ن.نازارباەۆتىڭ قۇرمەت گراموتاسىن يەلەنگەن كومباينشى جاس جىگىت مامىربەك باقتىعازى ۇلى مەن بۇگىندە ماۋسىم كەزىندە 100-دەن اسا جاننىڭ باسىن بىرىكتىرىپ, جۇمىس كوزىن تاۋىپ بەرىپ وتىرعان ۇجىمنىڭ اراسىندا تاريح سالعان سوقپاقتار جاتقانى راس. جىل سايىن «ۇزدىك سالىق تولەۋشى» اتاعىن جەڭىپ الىپ كەلە جاتقان سەرىكتەستىككە مۇنداي مارتەبە وزدىگىنەن كەلگەن جوق, ارينە.
– يۋبيلەينىيلىقتار بيزنەستىڭ الەۋمەتتىك جاۋاپكەرشىلىگىن دۇرىس ءتۇسىنىپ كەلە جاتقان ۇجىم. اۋىلداعى كومەككە ءزارۋ, تۇرمىسى تومەن وتباسىلارىنا, جاستارى ەگدە تارتقان قاريالار مەن مەكتەپ ۇجىمىنا ۇنەمى قولداۋ ءبىلدىرىپ كەلە جاتقان مامىربەك باقتىعازى ۇلىنا العىس ايتامىز, – دەدى اۋىل اكىمى سايلاۋحان ەستەمەسوۆ. – ول اۋىلداعى مەشىت, سپورت كەشەنى, قاتىمحانا, مەيرامحانا, ناۋبايحانا, سۇيىق ماي شىعاراتىن زاۋىت, قىرمان, ماشينا-تراكتور جوندەۋ شەبەرحاناسى, اۋدان ورتالىعىنداعى ديىرمەن, – بارلىعىنىڭ جۇمىسىن العا باستىرىپ وتىر.
قازىرگى كەزدە وبلىس اكىمى د.احمەتوۆتىڭ تاۋارلى ءسۇت فەرمالارىن قايتا جاڭعىرتۋ يدەياسىن قۋاتتاپ, اتالعان ىسكە بەل شەشە كىرىسكەن مامىربەك كولدەنەڭ اۋىلىنا ۇزىندىعى – 120, ەنى 10 مەتردى قۇرايتىن قوراجاي سالىپ, سيىر ساۋاتىن قۇرىلعىلار ساتىپ الدى. ارنايى سيىر بۇزاۋلايتىن جانە ساۋىن سيىر تۇراتىن قوراجايلار قازىر وندىرىسكە ساقاداي-ساي. سونداي-اق اسىل تۇقىمدى «سيممەنتال» سيىرلارى, رەسەيدەن اكەلگەن «التاي», «رىساك» تۇقىمدى جىلقىلارى, قازاقتىڭ «بايىس» تۇقىمدى قارا قويلارى مەن «گيسسار» قويلارى دا وسى شارۋاشىلىقتا. باعۋى كەلىسسە قويلاردىڭ ءوزى 100 كەلىدەن ەت بەرە الادى.
وسىنىڭ بارىنە ازىق كەرەك ەكەنى بەلگىلى. كولدەنەڭ اۋىلى جەرى قۇنارلى, ءشوبى شۇيگىن جەردە ورنالاسقاندىقتان استىق ءوسىرۋ – سەرىكتەستىكتىڭ باستى مىندەتتەرىنىڭ ءبىرى. بيداي, ارپا, كۇنباعىس سەكىلدى ءداندى, مايلى داقىلداردىڭ ءار گەكتارىنان ۇنەمى جوعارى ءونىم الۋعا قول جەتكىزىپ كەلەدى.
– بيىل 20 ميلليون تەڭگەگە وسى داقىلداردى كەپتىرەتىن اگرەگات ساتىپ الدىق, – دەيدى سەرىكتەستىك باسشىسى. – سول سياقتى كۇنباعىس ءدانىن سەبەتىن «ماتارماكس» اتتى 3 تۇقىمسەپكىش, 5 «بەلارۋس», 3 كومباين الدىق. بۇدان وزگە وزىمىزدەگى «زاريا» كۇنباعىسىنا قوسىمشا 23 ميلليون تەڭگەگە جۋىردا عانا شەتەلدىك «ساناي», «كوندي», «تريستان» اتتى كۇنباعىس تۇقىمدارىن اكەلدىك. سونداي-اق, وسكەمەن قالاسىنداعى تاجىريبە الماسۋ ورنىنان «داريا», «توما» دەگەن بيداي تۇقىمدارىن ساتىپ العانبىز. اللا قالاسا, كوكتەم شىعا جەرگە سىڭىرمەكپىز. جەرىڭ قانداي قۇنارلى, بونيتەتى جوعارى بولعانىمەن, تىڭايتقىشسىز ءىس بىتپەيدى. جامبىل وبلىسىنان «اممافوس»
تىڭايتقىشىن, كۇزدىك بيدايعا اقتاۋ قالاسىنداعى «قازازوتتان» سەليترا الىپ جەردى تىڭايتامىز. ءبىر سوزبەن ايتقاندا, باسەكەگە قابىلەتتى, جاڭا زامانعا لايىق ءىس جاساساق دەگەن وي.
...بيىل تارباعاتاي قويناۋىنا كوكتەم كەشىگىپ كەلدى. ديقان قاۋىمى مەن مالشىلار كۇننىڭ رايىن باقىلاپ جاتا المايتىن حالىق. ءبىرى كەتپەن, كۇرەگىن الىپ, اتىز بويلاپ كەتسە, ءبىرى مىڭعىرتىپ مالىن ورگىزىپ بارقىتبەلدىڭ باۋىرىن جايلاۋدا...
بەرىكحان تايجىگىت,
جۋرناليست
شىعىس قازاقستان وبلىسى,
ءۇرجار اۋدانى
