ق.كەلىمبەتوۆتىڭ ايتۋىنشا, قازىرگى تاڭدا «استانا» حالىقارالىق قارجى ورتالىعىنا 55 كومپانيا قاتىسۋشى رەتىندە تىركەلگەن. جىل اياعىنا دەيىن 100 كومپانيا تىركەلەدى دەگەن جوسپار جاسالىپ وتىر.
– بيىلعى جىلدىڭ اياعىنا دەيىن 100 كومپانيا تىركەلەدى دەگەن جوسپار بار, دەمەك جوسپاردىڭ جارتىسى ورىندالدى دەگەن ءسوز. ورتالىققا الەمدىك قارجى ۇيىمدارى تاراپىنان قىزىعۋشىلىق بار,– دەيدى ق.كەلىمبەتوۆ.
قارجىلىق تەxنولوگيالار بويىنشا تىركەۋگە تۇرعان كومپانيالار دا از ەمەس. ولاردىڭ باسىم كوپشىلىگى رەسەي, تايلاند, نيگەريا, افريكا ەلدەرىنىڭ, شۆەيتساريانىڭ وكىلدەرى. اتالعان كومپانيالار جاڭا تولەم قۇرالدارى, بانكينگ جانە تاعى باسقا قىزمەتتەر بويىنشا جۇمىس ىستەۋگە دايار ەكەندىكتەرىن ءبىلدىرىپ وتىر.
بۇدان بولەك, قارجى ورتالىعىنىڭ بيرجاسىنا كەلگەن بروكەرلىك كومپانيالاردىڭ دا قاتارى كوبەيىپ كەلەدى. احقو بيرجا باسقارما توراعاسىنىڭ ورىنباسارى ءامينا تۇرعىلوۆانىڭ سوزىنە قاراعاندا, وسى اپتادا بىرقاتار بروكەرلىك كومپانيالارعا ارنايى كۋالىكتەر تاپسىرىلادى.
شەتەلدىك كومپانيالار تاراپىنان احقو-عا دەگەن قىزىعۋشىلىق اسا جوعارى. اسىرەسە قىتايدىڭ قۇندى قاعازدار جونىندەگى كومپانيالارى بەلسەندىلىك تانىتۋدا. باعالى قاعازداردى باسقارۋ بويىنشا قىتايدىڭ ماڭدايالدى 5 بانكى, ودان بولەك ءىرى-ءىرى 5 كومپانياسى قاتىسۋعا نيەت بىلدىرگەن. الەمدىك ەڭ ءىرى قارجى ينستيتۋتتارىنىڭ ءبىرى – قىتاي مەملەكەتتىك دامۋ بانكى ورتالىقتا وكىلدىك ءوفيسىن اشىپ, الداعى ۋاقىتتا بىرلەسە جۇمىس اتقارۋعا بىلەك سىبانا كىرىسىپ وتىر.
– بۇرىنعى كەڭەس قۇرامىنداعى ەلدەردىڭ اراسىندا تۇڭعىش رەت اعىلشىن قۇقىعىنىڭ قاعيداتتارى ەنگىزىلىپ, قارجى ورتالىعىنىڭ رەسمي ءتىلى اعىلشىن ءتىلى بولىپ بەلگىلەندى. احقو-نىڭ نەگىزگى مىندەتتەرى قارجىلىق قىزمەت سالاسىندا ينۆەستيتسيالاۋ ءۇشىن تارتىمدى ورتا قۇرۋ ارقىلى ەل ەكونوميكاسىنا تىكەلەي شەتەل ينۆەستيتسيالارىن تارتا وتىرىپ, قازاقستان رەسپۋبليكاسىنىڭ باعالى قاعازدار نارىعىن دامىتۋ. ونىڭ حالىقارالىق كاپيتال نارىقتارىمەن ىقپالداسۋىن قامتاماسىز ەتۋ نەگىزگى مىندەتتەرىمىزدىڭ ءبىرى. ءبىزدىڭ ەلىمىز جاھاندىق ەكونوميكانىڭ ءبىر بولشەگىنە اينالىپ, حالىقارالىق ەكونوميكالىق زاڭدىلىقتار بويىنشا جۇمىس اتقارىپ وتىر. ەكونوميكانى ءارتاراپتاندىرۋ بويىنشا ەلباسىنىڭ باستاماسىمەن جۇزەگە اسقان يندۋستريالىق-يننوۆاتسيالىق دامۋ جانە «نۇرلى جول» باعدارلامالارى تىڭ سەرپىن اكەلگەنى انىق, – دەدى ق.كەلىمبەتوۆ.
«استانا» حقو باسقارۋشىسى اتاپ وتكەندەي, ورتالىق بۇگىندە الەمنىڭ كوپتەگەن مەملەكەتتەرى قولداۋ بىلدىرگەن ء«بىر بەلدەۋ, ءبىر جول» حالىقارالىق باعدارلاماسىنا قارجىلىق قىزمەت كورسەتەتىن ورتالىققا اينالۋ مۇمكىندىگىنە يە بولىپ وتىر.
ەركەجان ايتقازى,
«ەگەمەن قازاقستان»
