«مادەنيەت جانە سپورت مينيسترلىگى استانانىڭ 20-جىلدىعىن مەرەكەلەۋ اياسىندا ءبىراز اۋقىمدى سپورتتىق شارالاردى قولعا الدى. « ۇلى دالا رۋحىنىڭ» ەرەكشەلىگى – فەستيۆال ەلىمىزدىڭ بارلىق ءوڭىرىن قامتيدى. استانا ورتالىق بولادى, ءۇش ايدان سوڭ, اقتىق جارىستار ەلورداسىندا ۇيىمداستىرىلادى», دەدى سەرىك مارات ۇلى.
ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان, ۇلى دالا رۋحىمەن قاتار, استانانىڭ تۋعان كۇنىنە ارنالعان «استانا كۋبوگى» بايگەسى تۋرالى تىلگە تيەك ەتتى.
«بيىل استانا قالاسىنىڭ 20 جىلدىعىن مەرەكەلەۋ كەڭ اۋقىمدا قولعا الىندى. جىل باسىندا «20 جىلدىققا-20 ءىس-شارا» اتتى كامپانيا جۇمىسىن باستاعانبىز. وسى جوبا بويىنشا ءبىراز شارالاردى وتكىزدىك. سونداي-اق, استانانىڭ تۋعان كۇنىنە «استانا كۋبوگى» ات جارىسىن جوسپارلادىق. بۇل بايگە ەكى قاشىقتىق بويىنشا وتەدى. الامان – 25 شاقىرىم, ەكىنشى بايگە – 16 شاقىرىم. استانا كۋبوگىن ساراپقا سالۋعا رەسپۋبليكامىزدىڭ بارلىق وبلىستارى, استانا , الماتى قالالارىنىڭ اتبەگىلەرى 2 جۇيرىكتەن قوسا الادى», دەدى بەكبولات تىلەۋحان.
4 شىلدە كۇنى باستالىپ, 16 قىركۇيەك كۇنى اياقتالاتىن جاستار اراسىنداعى فەستيۆال باسەكەسىنە رەسپۋبليكا بويىنشا 7073 سپورتشى قاتىسادى. ۇلتتىق سپورتتىڭ كوكپار, بايگە, تەڭگە ءىلۋ, اۋدارىسپاق, جامبى اتۋ, قازاق كۇرەسى, توعىزقۇمالاق, اسىق اتۋ تۇرىنەن وتەتىن جارىستار كوماندالىق تارتىپتە جۇرگىزىلەدى. ءۇش ايدان استام ۋاقىتقا سوزىلاتىن بۇل فەستيۆال II كەزەڭگە بولىنگەن. I كەزەڭ ايماقتىق ىرىكتەۋ جارىستارى. العاشقى كەزەڭ باسەكەسى ءتورت ايماقتا وتەدى. 4 شىلدە كۇنى قازمەديا ورتالىعىندا فەستيۆالدىڭ اشىلۋ سالتاناتى جانە جەرەبە تارتۋ ءراسىمى بولادى. وسى جەرەبە بويىنشا وتەتىن رەسپۋبليكامىزدىڭ وڭتۇستىك, شىعىس, باتىس جانە سولتۇستىك ايماقتارىنداعى جارىستاردىڭ سالتاناتتى اشىلۋى ءار مەرزىمگە بەلگىلەنگەن. اتاپ ايتقاندا, 13-15 شىلدە كۇندەرى شىمكەنت قالاسىندا وڭتۇستىك ايماق, 27-29 شىلدە كۇندەرى اقتوبە قالاسىندا باتىس ايماق, 13-15 تامىز كۇندەرى پاۆلودار قالاسىندا شىعىس ايماق, 17-19 تامىز كۇندەرى استانا قالاسىندا سولتۇستىك ايماق جارىستارىنىڭ سالتاناتتى اشىلۋى وتكىزىلەدى. سونداي-اق, كوكپار, قازاق كۇرەسى, توعىزقۇمالاق, اسىق اتۋ سپورت تۇرلەرىنىڭ ىرىكتەۋ باسەكەلەرىن ايماقتىق وڭىرلەردە, ال, اۋدارىسپاق, جامبى, تەڭگە, بايگە سپورت تۇرلەرىنىڭ ىرىكتەۋ باسەكەلەرىن استانادا وتكىزۋ جوسپارلانعان. ايماقتارداعى ىرىكتەۋ جارىستارى 31 تامىزدا مارەگە جەتەدى. ەلىمىزدەگى 14 وبلىس, 3 قالا كوماندالارى اراسىنان ۇزدىك شىققان كوماندالار فەستيۆالدىڭ II كەزەڭىنە وتەدى. استانا قالاسىندا 11-16 قىركۇيەك كۇندەرى ارالىعىندا وتەتىن ءىى كەزەڭگە 250 جۋىق سپورتشى قاتىسادى دەپ كۇتىلۋدە.
