باس باسىلىم «استانا ايشىقتارى» تاقىرىبىمەن ۇيىمداستىرعان كونكۋرسقا رەسپۋبليكانىڭ تۇكپىر-تۇپكىرىنەن 20-دان استام ۇمىتكەر 30-دان اسا جۇمىس ۇسىنعان. بايقاۋدى ۇيىمداستىرۋداعى باستى ماقسات – قازاق باسپاسوزىندە ۇمىتىلىپ بارا جاتقان كاريكاتۋرا جانرىن قايتا جاڭعىرتۋ. ەگەمەننىڭ بۇل باستاماسىن شاراعا قاتىسۋشىلار, زيالى قاۋىم وكىلدەرى بارىنشا قولدايتىنىن ءبىلدىردى. كورمەگە قويىلعان ۇزدىك 15 سۋرەتتىڭ ىشىنەن وزا شاپقان ءۇش اۆتوردىڭ جۇمىسى جۇلدەلى ورىنداردان كورىنىپ, ءبىر كاريكاتۋراشى ىنتالاندىرۋ سىيلىعىنا يە بولدى. اتاپ ايتساق, ءبىرىنشى ورىن الماتىلىق بەلگىلى كاريكاتۋراشى عالىم سماعۇل ۇلىنا بەرىلىپ, 300 مىڭ تەڭگەلىك سەرتيفيكات تابىستالدى. وسكەمەندىك بەرىك قاينار ۇلى ەكىنشى (200 مىڭ تەڭگە), ال اقتوبەلىك قايرات بولاتباي ۇلى ءۇشىنشى ورىنعا (100 مىڭ) يە بولدى. تارازدىق الميرا وماروۆاعا ىنتالاندىرۋ سىيلىعى بەرىلدى. كاريكاتۋراعا بايلانىستى ەلىمىزدە ءىرى كونكۋرستار 20 جىلدان بەرى ءبىرىنشى رەت وتكىزىلىپ وتىر.
«استانا قالاسىنىڭ 20 جىلدىعىنا وراي «ەگەمەن قازاقستان» گازەتىنىڭ جۇلدەسى ءۇشىن قازاق باسپاسوزىندە ۇمىتىلىپ كەتكەن كاريكاتۋرا جانرىن قايتا جاڭعىرتىپ, «استانا ايشىقتارى» تاقىرىبىمەن كاريكاتۋرا كونكۋرسىن جاريالاعان بولاتىنبىز. ەگەمەننىڭ بۇل باستاماسى سۋرەتشىلەر اراسىندا كەڭىنەن قولداۋ تاۋىپ, كونكۋرسقا 20-دان استام ۇمىتكەردەن 30-دان اسا جۇمىس كەلىپ ءتۇستى. ولاردىڭ اراسىنان ەڭ ۇزدىكتەرى تاڭدالىپ, بۇگىنگى ماراپاتتاۋ راسىمىنە كەلىپ وتىر», دەدى «ەگەمەن قازاقستان» گازەتىنىڭ باسشىسى دارحان قىدىرالى.
كاريكاتۋرا تەك كەمشىلىكتى عانا كورسەتەتىن جانر دەپ تار ويلايتىندار دا بار. بىراق شىنتۋايتىنا كەلگەندە كاريكاتۋرا ارقىلى جاقسىلىقتى دا, كەمشىلىكتى دە تەڭدەي ەتىپ كورسەتۋگە بولادى. ول سۋرەتشىنىڭ شەبەرلىگىنە بايلانىستى. بۇل كونكۋرستىڭ باس جۇلدەسىن العان شىعارما نىساناعا وتە كەڭ ولشەممەن كەلگەن. تاقىرىپتى قىلقالاممەن اشۋ, وعان ويدى ۇشاستىرۋ – قيىننىڭ قيىنى. وسى جاعىنان العاندا جۇلدەگە يە بولعان اۆتور ويىنىڭ ۇشقىرلىعى مەن قالامىنىڭ شەبەرلىگى انىق كورىنەدى.
كاريكاتۋرا تەك قانا بىرجاقتى سىن ەمەس. ول – ۇلكەن ونەر, استارلى ءسوز, تاپقىر شەشىم, ۇتىمدى وي, ساراپتاما مەن سىننىڭ توعىسى. كەيدە كاريكاتۋرانىڭ ۇلكەن ماقالانىڭ, كىتاپتىڭ جۇگىن ارقالاپ تۇراتىن تۇستارى بولادى. ۇلكەن وركەنيەتتى ەلدەردە قازىر ءباسپاسوز كاريكاتۋراسىز شىقپايدى. بۇل – ءباسپاسوزدىڭ ۇلكەن ءبىر بولشەگى, ءىرى سالاسى. سوندىقتان بۇل سالانى دا جانداندىرعان ءجون.
كاريكاتۋرا ونەرىن كوپشىلىك قاۋىم تەك ادام تانىمىنا ءاجۋالى ءازىل اكەلەدى دەپ تۇسىنەدى. اسىلىندا, ول – ءبىر ءسات وي-سانانى سەرگىتىپ, ءاجۋادان بولەك اسەرلى وي نۇرىن شاشاتىن اۋقىمى كەڭ ونەر. ءار قوعامنىڭ ساياسي, الەۋمەتتىك, پسيحولوگيالىق, مورالدىق بولمىس-سيپاتى وسى ونەردە قىلقالام شەبەرىنىڭ قيالى ارقىلى قاپىسىز قالىپتالادى. وسى ماقساتتا كاريكاتۋرانىڭ ۇلكەن مەكتەبى بار «ەگەمەن قازاقستان» گازەتى كەنجەلەپ قالعان وسى ونەردىڭ كەڭىنەن دامۋىنا ءوز ۇلەسىن قوسىپ, قىلقالام شەبەرلەرىنىڭ وسپاق ونەرىن وقىرماندارعا تەرەڭ ناسيحاتتاۋدى قولعا الىپ وتىر.
بايگەنى ۇيىمداستىرۋ جۇمىسىنىڭ باسى-قاسىندا جۇرگەن سۋرەتشى ايداربەك عازيز ۇلى: «سۋرەتشىلەرگە قويىلعان تالاپ وڭاي بولعان جوق. كاريكاتۋرا تۋرالى قالىپتاسقان تاپتاۋرىندى بۇزۋ ءۇشىن وسىنداي بايگەلەر كەرەك. استانامىزدىڭ جايناعان ديدارىن وسى ونەر ارقىلى بەرۋ – قاتىسۋشىلارعا ۇلكەن سىن بولدى. تاپقىر, قيالى جۇيرىك سۋرەتشىلەر بايگەدەن سۇرىنبەي كەلدى», دەدى.
شارا بارىسىندا, سونداي-اق استانا قالاسىنىڭ 20 جىلدىعىنا ارنالعان «ەگەمەن قازاقستان» كىتاپحاناسى» سەرياسىمەن جارىق كورگەن, ەلوردامىزدىڭ ايشىقتى كەلبەتىن سوزبەن ارلەگەن «باقوردا» كىتابىنىڭ تانىستىرىلىمى ءوتتى.
باعاشار تۇرسىنباي ۇلى,
«ەگەمەن قازاقستان»
