كورمەنى ازىرلەپ اكەلگەن – فرانتسيا ەلىنىڭ ۇلتتىق مۋزەيلەر بىرلەستىگى. شارانىڭ اشىلۋ سالتاناتىندا ءسوز العان فرانتسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە مىرزا ءوز ەلىندەگى ەجەلگى رۋحاني مۇرالار ساقشىسى – ۇلتتىق مۋزەيلەر بىرلەستىگى وتكەن جىلى استانا ۇيىمداستىرعان حالىقارالىق مامانداندىرىلعان ەكسپو كورمەسى اياسىندا ەلوردالىقتارعا فرانتسۋز تاريحىنا قاتىستى قۇندى دۇنيەلەر ۇسىنعان بولسا, ەندى مىنە ءحىح عاسىرداعى فرانتسۋز سيمۆوليكاسىنىڭ ءىرى وكىلى پول سەريۋزەنىڭ كارتينالارى اكەلىنىپ وتىر دەدى.
سونداي-اق كوپشىلىكتى كورمەنىڭ ماڭىزىمەن تانىستىرعان مادەنيەت جانە سپورت ءمينيسترى ارىستانبەك مۇحامەدي ۇلى ءبىر جىل بۇرىن مادەنيەت, ونەر جانە مادەني مۇرانى ساقتاۋ سالاسىندا ەلارالىق ىنتىماقتاستىق مەموراندۋمىنا قول قويىلعانىن, بۇل شارا سونىڭ جالعاسى ەكەنىن جەتكىزدى.
كورمەگە بارلىعى 48 جاۋھار كارتينا اكەلىنسە, سونىڭ 80 پايىزىنىڭ اۆتورى – پول سەريۋزە. جۇمىستار تۇگەلدەي دەرلىك تۇپنۇسقا. ونىڭ «تەڭىز بەن جاعالاۋ», «توقىماشى», «ماحاببات بايتەرەگى» قاتارلى ەڭبەكتەرى مودەرن ستيلىنە جاقىن ار-نۋۆو سيمۆوليستەر توبىنا جاتادى ەكەن. نەگىزىنەن بۇل توپتى ەۋروپالىق ونەرتانۋشىلار «نابي» شىعارماشىلىق باعىتى دەپ باعالايدى. قازاقشا ايتقاندا, تىلسىممەن سىرلاسۋشىلار.
اتالمىش توپ وكىلىنە جاتاتىن كەسكىندەمەشىلەر – ەميل بەرنار, پەر بوننار, مورريس دەني, انري مورە, ماكسيم موررا, پول گوگەن, تاعى باسقالارىنىڭ تۋىندىلارى دا كورمە سورەسىنەن ورىن الىپتى. بۇلاردىڭ ءبارى بۇگىندە ومىردەن وزعان, بىراق سۋرەتتەرى ارقىلى الەمگە تانىمال تۇلعالار.
كورمە كوميسسارى تاۋەلسىز ونەرتانۋشى جانە سەريۋزە اتىنداعى كوميتەت توراعاسى كارولين بويل-تەرنەردىڭ پىكىرىنشە, بۇل كەسكىندەمەلەر كورمەسى تۇڭعىش رەت فرانتسيا شەكاراسىنان اسىپ, ەۋرازيا كەڭىستىگىنە, سونىڭ ىشىندە قازاق دالاسىنا كەلىپ وتىر, سونىمەن قاتار تۋىندىلاردىڭ دەنى كەسكىندەمە بولعانىمەن دەكوراتيۆتى ينتەرەر اشەكەيلەرىنەن تۇراتىن ار-دەكو ونەرىنىڭ بىرەگەي ۇلگىسى. ال كورمەنىڭ كوركەمدىك مانەرىنە كەلسەك, مۇنداعى كارتينالار كورەرمەندى قيال الەمىنە جەتەلەيتىن مودەرن ءستيلىنىڭ اسەمدىك سيپاتىن سىڭىرگەن دۇنيەلەر.
بەكەن قايرات ۇلى,
«ەگەمەن قازاقستان»
