مەملەكەتتىك حاتشى ءوز سوزىندە ەلباسى نۇرسۇلتان نازارباەۆتىڭ جاستارعا: «بولاشاققا دەگەن ءبىزدىڭ ۇكىلى ءۇمىتىمىز – سىزدەر. ءبىزدىڭ بۇگىن جاساپ جاتقانىمىزدىڭ بارلىعى – سىزدەر ءۇشىن جاسالۋدا», دەپ ايتقانىن اتاپ ءوتتى.
«ازاتتىق العان سوڭ بۇكىل تاۋەلسىز مەملەكەتتەر دوستاستىعى ەلدەرى اراسىنان العاشقى بولىپ, 1997 جىلى 2030 جىلعا دەيىنگى دامۋ جوسپارىن ازىرلەپ, ونى 15 جىل ىشىندە ورىندادىق. قازىر ءبىز «قازاقستان-2050» ستراتەگياسىن جۇزەگە اسىرىپ جاتىرمىز. ونىڭ باستى ماقساتى – الەمدەگى وزىق 30 ەلدىڭ قاتارىنا قوسىلۋ. وسى ورايدا ەلدە ينستيتۋتتىق 5 رەفورما جاريالانىپ, ۇلت جوسپارى, ءۇشىنشى جاڭعىرۋ اياسىندا اۋقىمدى جۇمىس جۇرگىزىلىپ جاتىر», دەدى گ.ابدىقالىقوۆا.
سونداي-اق مەملەكەتتىك حاتشى شەتەلدەگى قانداستار ماسەلەسىنە, انا ءتىلى مەن ءتول تاريحىنا, مادەنيەتى مەن رۋحانياتىنا, ۇلتتىق قۇندىلىقتاردى ساقتاۋعا قولداۋ كورسەتۋگە, تىعىز الەۋمەتتىك-ەكونوميكالىق بايلانىس ورناتۋعا پرەزيدەنتتىڭ باسا نازار اۋداراتىنىن جەتكىزدى. قازاقستاننىڭ قانداستاردى ەلگە جيناۋ جونىندە گەرمانيا جانە يزرايلمەن ءبىر قاتاردا ءتيىمدى ەتنوستىق كوشى-قون ساياساتىن جۇزەگە اسىرىپ وتىرعان ەلدىڭ ءبىرى ەكەنىن اتاپ ءوتتى. وسىنداي جۇمىستىڭ ناتيجەسىندە تاۋەلسىزدىك العالى بەرى ەلىمىزگە ميلليوننان استام قانداسىمىز ورالدى. قازىرگى كەزدە قازاقستاننان تىس جەرلەردە, شەت مەملەكەتتەردە 5 ميلليوننان استام قازاق دياسپوراسى وكىلى بار.
بۇگىندە تۇركيادا شامامەن 10 مىڭداي قازاق تۇرادى. دياسپورا وكىلدەرىنە وزەكتى ماسەلەلەر بويىنشا كومەك كورسەتۋ ماقساتىمەن «قازاق-تۇرىك قورى», «قازاق تۇركىلەرىنىڭ الەۋمەتتىك جانە مادەني دامۋىن قولداۋ قورى», «احمەت ياساۋي قورى», «قازاق-تۇرىك ءبىلىم, عىلىم جانە زەرتتەۋ قوعامى» ءتيىمدى جۇمىس جۇرگىزىپ وتىر.
كەزدەسۋ سوڭىندا مەملەكەتتىك حاتشى تۇركياداعى قازاق دياسپوراسى جاستارىنىڭ وقۋدا جاقسى ناتيجەگە قول جەتكىزىپ, ومىردە تابىستى جانە باق-بەرەكەلى بولۋىنا تىلەكتەستىك ءبىلدىردى.
اباي اسانكەلدى ۇلى,
«ەگەمەن قازاقستان»
