كەشە قازاقستان رەسپۋبليكاسى پارلامەنتى ءماجىلىسىندە ەل تاۋەلسىزدىگىنىڭ جيىرما جىلدىق مەرەيتويىنا ارنالعان سالتاناتتى جينالىس ءوتتى, دەپ حابارلادى ءماجىلىستىڭ ءباسپاسوز قىزمەتى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعىمەن مەملەكەتتىك جانە قوعامدىق قىزمەتتەگى ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن قازاقستان رەسپۋبليكاسى پارلامەنتى ءماجىلىسى ءتورتىنشى شاقىرىلىمىنىڭ ءبىرقاتار دەپۋتاتتارىنا جوعارى وتاندىق ناگرادالاردى مەملەكەتتىك حاتشى قانات ساۋداباەۆ تاپسىردى.
ول پارلامەنتشىلەرگە: «وتە قىسقا مەرزىمدە ەلىمىز عاسىرعا تاتىرلىق جولدان ءوتتى. ەلباسىمىز قازاقستاندى الەمگە تانىتتى. قازاقستان حالقى وسىناۋ 20 جىلدا جوعارى ەڭبەك ۇلگىسىن كورسەتىپ, مەملەكەت باسشىسىنىڭ جانىنا تىعىز توپتاستى. ونىڭ ۇلكەن ماقساتى مەن ءورشىل مۇراتىن جۇزەگە اسىرۋ جولىندا جۇرتىمىز جانقيارلىقپەن, جاسامپازدىقپەن ەڭبەك ەتتى. سىزدەر دە ەلباسىمىزبەن بىرگە وسىناۋ ۇلان-عايىر ىسكە ءوز ۇلەستەرىڭىزدى قوستىڭىزدار. ءماجىلىس ءتورت جارىم جىلدىڭ ىشىندە 525 زاڭ جوباسىن قابىلداپ, سەناتقا جولدادى, ونىڭ ىشىندە 493 زاڭعا پرەزيدەنت قول قويدى. قول قويىلعان زاڭداردىڭ ءبىر پاراسى الەم ەكونوميكاسى داعدارىسقا ۇشىراعان كەزەڭدەگى قيىن جاعدايدان شىعۋعا ۇلكەن ىقپال ەتتى. دەپۋتاتتار ەكونوميكامىزعا قاجەتتى زاڭداردى دەر كەزىندە قابىلداپ, ۇكىمەتتىڭ داعدارىسقا قارسى پارمەندى شارالار قولدانۋىنا مۇمكىندىك جاسادى. قابىلدانعان زاڭ جوبالارى ىشىندە ەلىمىزدىڭ ىشكى-سىرتقى ساياساتىنا بايلانىستى اسا ماڭىزدى, ستراتەگيالىق ءمانى زور قۇجاتتار دا بار. ماسەلەن, بىلتىرعى جىلى عانا سىزدەر كەدەن وداعىنا قاتىستى 30-دان استام زاڭ جوباسىن ءبىر ايدىڭ ىشىندە, شۇعىل تۇردە قابىلدادىڭىزدار. تاۋەلسىزدىگىمىزدىڭ 20 جىلدىق مەرەكەسىنە وسىنداي تولايىم تابىستارمەن كەلىپ وتىرسىزدار», – دەدى.
سودان كەيىن مەملەكەتتىك حاتشى گۇلجان قاراعۇسوۆاعا II دارەجەلى «بارىس» وردەنىن, سەيىتسۇلتان ايىمبەتوۆ, زاعيپا باليەۆا, ۆيكتور كيانسكي, داۋىلباي قۇسايىنوۆ, رومين ءمادينوۆ, ءۋالي قۇرمانعاليعا «پاراسات» وردەنىن, ۆلاديمير بوبروۆقا ءىى دارەجەلى «دوستىق» وردەنىن تاپسىردى.
سونىمەن قاتار, مايرا ايسينا, جاقىپ اسانوۆ, سۆەتلانا بىچكوۆا, ءۋاليحان قاليجانوۆ, ءۋاليحان قوڭىرباەۆ, شاۆحات وتەمىسوۆ, ايگۇل سولوۆەۆاعا «قۇرمەت» وردەنىمەن قوسا, «قازاقستان رەسپۋبليكاسىنىڭ ءتاۋەلسىزدىگىنە – 20 جىل» مەرەكەلىك مەدالىن تاپسىردى.
ق.ساۋداباەۆ قازاقستان رەسپۋبليكاسى پارلامەنتى ءماجىلىسى ءتورتىنشى شاقىرىلىمىنىڭ ءبىرقاتار دەپۋتاتتارىنا دا «قازاقستان رەسپۋبليكاسىنىڭ تاۋەلسىزدىگىنە – 20 جىل» مەرەكەلىك مەدالىن تابىستادى.
مەملەكەتتىك حاتشى ءماجىلىس اپپاراتىنىڭ ءبولىم مەڭگەرۋشىسى ناركەس تىلەۋحان مەن ءماجىلىس اپپاراتى ءبولىم مەڭگەرۋشىسىنىڭ ورىنباسارى ساتبەك شالباەۆقا «قۇرمەت» وردەنىن, ءماجىلىس اپپاراتى باسشىسىنىڭ ورىنباسارى اراي ورازوۆقا «ەرەن ەڭبەگى ءۇشىن» مەدالىن, ءماجىلىس اپپاراتىنىڭ ءبولىم مەڭگەرۋشىسى پاتيما قياسباەۆاعا قازاقستان رەسپۋبليكاسىنىڭ قۇرمەت گراموتاسىن جانە قازاقستان رەسپۋبليكاسى پارلامەنتى ءماجىلىسى اپپاراتىنىڭ باسشىسى ەرگەن دوشاەۆقا «قازاقستان رەسپۋبليكاسىنىڭ تاۋەلسىزدىگىنە – 20 جىل» مەرەكەلىك مەدالىن تاپسىردى.
* * *
سونداي-اق, قازاقستان رەسپۋبليكاسى پارلامەنتى ءماجىلىسىنىڭ اپپارات باسشىسى ەرگەن دوشاەۆ پالاتا قىزمەتكەرلەرىن ەل تاۋەلسىزدىگىنىڭ 20 جىلدىق مەرەيتويىمەن قۇتتىقتاپ, سالتاناتتى جينالىس وتكىزدى. ءبىرقاتار پارلامەنت قىزمەتكەرلەرىن مەرەكەلىك مەدالمەن ماراپاتتاپ, اپپارات قىزمەتكەرلەرىنىڭ ءبىر توبىنا مەملەكەتتىك تۇرعىن ۇيدەن بولىنگەن پاتەرلەردىڭ قۇجاتتارىن تاپسىردى. سونىمەن قاتار, ءماجىلىستىڭ قىزمەتىن قامتاماسىز ەتۋگە قوسقان ۇلەسى مەن بەلسەندى ەڭبەگى ءۇشىن پارلامەنت قىزمەتكەرلەرىنىڭ تاعى بىرقاتارىنا العىس جاريالاندى.
