استانا – «اسيتانەي شاحانە», ياعني «پاتشانىڭ تابالدىرىعى, تاڭعاجايىپ باس قالا» دەگەندى بىلدىرەدى. بۇل انىقتاما كەزىندە ىستانبۇل ءۇشىن قولدانىلعان ەدى.
مەملەكەتتەر مەن ەلدەردىڭ قالىپتاسۋ تاريحىندا ۇلى كوشباسشىلار قانداي رولگە يە بولسا, باستى شەشىمدەر شىعارىلعان شاھارلار دا ماڭىزدى ورىن العان. قازىرگى قازاقستاننىڭ نەگىزىن سالعان اقساقالىمىز – كوشباسشى نۇرسۇلتان نازارباەۆ تاۋەلسىز ەلدىڭ سيمۆولى رەتىندە استانانى ىرگەتاسىنان باستاپ تۇبەگەيلى جوسپارلاپ, ءاربىر عيماراتتىڭ قۇرىلىسىن قالتقىسىز قاداعالاپ, ءار كىرپىشىن قامقور قولمەن قالادى. استانا ءاپ-ساتتە ەگەمەن ەلدىڭ التىن تاجىنە اينالىپ ۇلگەردى.
تۇركيا رەسپۋبليكاسى قۇرىلعان كەزدە استانانى ىستانبۇلدان انكاراعا كوشىرۋ سەبەبى قانداي بولسا, باس قالانى الماتىدان اۋىستىرىپ, قازاقستاندى جاڭا تاۋەلسىز مەملەكەت رەتىندە ورنىقتىرۋ سونداي زامان تالابى ەدى. باس قالانىڭ قونىس اۋدارۋى دەر كەزىندە دەربەس قابىلدانعان ستراتەگيالىق شەشىم رەتىندە تىڭ باستامانىڭ جانە جاڭا ءبىر ءداۋىردىڭ باستاۋى رەتىندە تاريحي ماڭىز يەلەندى.
جاڭا تۇركيا مەملەكەتىنىڭ قاھارمانى جانە قۇرۋشىسى مۇستافا كەمال اتاتۇرىك دەسەك, ال قازىرگى قازاقستاننىڭ لايىقتى ليدەرى نۇرسۇلتان نازارباەۆ دەپ مويىندايمىز. ۇلى تۇلعالاردىڭ ءومىرى, كوزقاراسى, سەنىم ارتقان قۇندىلىقتارى ءبىر-بىرىنە ۇقسايدى جانە تولىقتاي ۇيلەسەدى. ەكى قايراتكەر دە تۇگەل تۇركىنىڭ ماقتانىشى, ەسىمى ەل ەسىندە ماڭگى قالاتىن بەدەلدى باسقارۋشىلار. ەكەۋى دە ەركىن, ازات جانە زايىرلى مەملەكەت جاساقتاۋ ءۇشىن حالىقتىڭ رۋحىن قايتا ءتىرىلتتى. ەركىندىك پەن بوستاندىق اڭساعان كۇرەستە اتاتۇرىك انكارا ارقىلى, نۇرسۇلتان نازارباەۆ استانا ارقىلى جەڭىسكە جەتتى. جاڭا شاھاردىڭ بوي كوتەرۋى جانە مەگاپوليس مارتەبەسىنە جەتۋى ۇلت تاريحىمەن, ادەت-عۇرپىمەن, سالت-داستۇرىمەن تىكەلەي بايلانىستى وربىسە, بولاشاعى دا وسى قۇندىلىقتارمەن ايشىقتالارى انىق.
ءيا, استانا – بايىرعى بايتاق دالانىڭ باستى ورتالىعى. جاڭا قونىستان سونى تەحنولوگيامەن سالىنعان زاماناۋي عيماراتتارمەن قاتار, قايماعى بۇزىلماعان كونە قازاق مادەنيەتىنىڭ ءار الۋاندىعىن كورۋگە بولادى.
استانانىڭ ايبارى – قازاقستاننىڭ جانە قازاق باۋىرلارىمىزدىڭ بيىك مارتەبەسى, اسقاق ابىرويى.
استانا – قازاقستان جەتىستىكتەرىنىڭ ايناسى.
كيەلى مەكەنگە كوز جۇگىرتكەنىمىزدە مادەنيەتى باي, تاريحى تەرەڭ, سەنىمى نىق قابىرعالى قالىڭ ەل مەن كونە شەجىرەنى, ساف ونەردى انىق كورەمىز.
استانا – وتارلىق ەزگىدەن قۇتىلىپ, بوداندىقتىڭ قامىتىن سىپىرعان ازات ەلدىڭ بەيبىت جەڭىسىنىڭ جەمىسى.
ورىس پاتشالىعىنىڭ قۇرساۋى مەن كەڭەستىك جۇيەنىڭ شەكپەنىنەن شىققان قازاقتىڭ اقىل-پاراساتىن, ەرىك-جىگەرىن پاش ەتكەن قالا.
بۇرىن تۇراق تەپكەن ورىس حالقىنىڭ وكىلدەرى باسىم بولسا, كەيىن جاس وتباسىلار لەك-لەگىمەن شوعىرلانىپ, قازاقتىڭ قۇتتى مەكەنىنە اينالدى. تولەرانتتى قوعام ورناپ, ۇلتارالىق تاتۋلىق سالتانات قۇردى. دىنارالىق كەلىسىم مەن ىمىراگەرشىلىك بىتە قايناسقان عالامات عاسىردىڭ التىن ارقاۋى – تۇركى الەمىنىڭ اقساقالى نۇرسۇلتان نازارباەۆ. ول استانا ارقىلى تەرەڭ پاراسات يەسى, دارا تۇلعا, دانا باسشى, مەملەكەت جانە قوعام قايراتكەرى, ءىرى ساياساتكەر ەكەنىن دالەلدەپ شىقتى.
جاس قالا قازىرگى تاڭدا قازاقستاننىڭ دامۋى مەن ءوسىپ-وركەندەۋىنە وڭ ىقپال ەتىپ, ايماقتىق تۇراقتىلىققا, عالامدىق قاۋىپسىزدىككە ۇلەس قوسۋ ارقىلى اسا ماڭىزدى ميسسيا اتقارىپ وتىر. سيريا ماسەلەسىن رەتتەۋ بويىنشا كەلىسسوزدەر جۇرگىزىلگەن استانا پروتسەسى, يسلام ىنتىماقتاستىعى ۇيىمى, شانحاي ىنتىماقتاستىق ۇيىمى, استانا «ەحرو-2017», ورتالىق ازيا ەلدەرى مەملەكەت باسشىلارىنىڭ ءسامميتى سىندى كوپتەگەن حالىقارالىق باسقوسۋلاردىڭ باستاماشىسى بولىپ, بەيبىتشىلىك سۇيگىش قالا اتانىپ ۇلگەردى.
1991 جىلدىڭ اياعىندا تاۋەلسىزدىگىن جاڭادان جاريالاعان تۇركىتىلدەس ەلدەردى بىرنەشە جىل عانا ءومىر سۇرەدى دەپ ويلاعاندار از ەمەس ەدى.
الايدا بۇگىنگى جاعدايعا قاراپ وتىرساق, ءوسىپ-وركەندەۋى مەن دامۋى قارقىندى تۇردە جالعاسقان ەگەمەن قازاقستاننىڭ ونەگەلى ۇلگىسى تۇماندى سەيىلتىپ, كۇدىكتى جوققا شىعاردى, جان-جاعىنا جارقىن ۇلگى بولا ءبىلدى. سونىمەن قاتار تۇركى الەمىنىڭ «تىلدە, پىكىردە, ىستە – بىرلىك» دەگەن ۇستانىمىن بەرىك ۇستاعان قازاقستان كوشباسشى مەملەكەت رەتىندە العا شىقتى.
جۇزدەگەن جىل بويى مادەنيەت مايەگىن بۇزباي جەتكىزىپ, تۇركىلىك رۋحتى قايتا تۇلەتكەن قازاق ەلى شىعىستان كوتەرىلىپ, باتىسقا شۋاق شاشقان كۇن ءتارىزدى جارقىراپ كەلەدى.
جۇزجىلدىق باسقىنشىلىقتان امان شىعىپ, اتاجۇرتتان كەلىپ, انادولىدا ءۇمىت وتىن تۇتاتۋى بارلىق عۇمىرىن وسى يدەياعا ارناعان بىزدەر ءۇشىن شەكسىز باقىت.
بۇگىندە قازاقستان – ازيا كىندىگىندەگى تورتكۇل دۇنيەمەن تەرەزەسىن تەڭەستىرىپ, شەجىرە-تاريحىن تۇگەندەگەن وزىق مەملەكەت, زايىرلى رەسپۋبليكا. جەر بەتىندە ءار سالانى ۇرشىقتاي ءيىرىپ, دامۋشى ەلدەردىڭ قاتارىنان قالماي كەلە جاتقان قازاقستان دەگەن ەل بار ەكەنى ءسوزسىز. وسى عاجاپ قۇبىلىستىڭ ساۋلەتشىسى, ۇلى كوشباسشى – تۇركى الەمىنىڭ اقساقالى نۇرسۇلتان نازارباەۆ, ال ونىڭ قولتاڭباسى – تاڭعاجايىپ شاھار استانا.
توبەدەگى كوك كۇمبەز قۇلامايىنشا, تومەندەگى قارا جەر قاق ايىرىلمايىنشا, ۇلى تۇركى اۋلەتىنىڭ قاھارمان دا وجەت ءاربىر مەملەكەتى, حالىقتارى ماڭگى-باقي ەركىن جانە تاۋەلسىز ءومىر ءسۇرىپ, تىنىشتىعىن ساقتاپ قالماق.
باۋىرلاس قازاقستان مەملەكەتى دۇنيە توقتاعانشا توقتاماي, جاساي بەرسىن!
يالچىن توپچۋ,
تۇركيا رەسپۋبليكاسى پرەزيدەنتىنىڭ باس كەڭەسشىسى
