ولار قورىم باسىندا ارحەولوگيانىڭ تىلسىم سىرلارىنا قانىقپاق. مارتوك اۋدانىنىڭ رودنيكوۆكا اۋىلى ماڭىندا ەڭبەك ەتىپ جۇرگەن جاستاردىڭ ارحەولوگياعا دەگەن ىنتىزارلىعى وتە جوعارى. ستۋدەنتتەردىڭ عالىمدارمەن قازبا جۇمىستارىن بىرلەسە جۇرگىزۋىنىڭ ەكى جاقتى پايداسى بار. بىرىنشىدەن, بولاشاق ماماندار بەلگىلى عالىمداردان كوپ ءىلىم ۇيرەنسە, ەكىنشىدەن, عالىمداردىڭ دا قولى ۇزارادى. ەڭ باستىسى, ورتاق ءىس ناتيجەلى. ايتالىق, ۋنيۆەرسيتەتتىڭ بيىلعى تۇلەگى قۋاندىق سامرات ارحەولوگيالىق قازبا جۇمىستارىنا ارالاسقان ءتورت جىلدىڭ ىشىندە كوڭىلىنە كوپ دۇنيە ءتۇيدى. «وسى ۋاقىت ارالىعىندا ارحەولوگيانىڭ سينتەزدىك, ياعني بىرنەشە ماماندىقتىڭ تۇيىسەتىن ارناسى ەكەنىن اڭعاردىم. ارحەولوگيا سونىسىمەن دە تۇڭعيىعىنا تارتا ءتۇستى», دەيدى ول.
ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ رەكتورى باۋىرجان ەردەمبەكوۆ ستۋدەنتتەردىڭ قازبا جۇمىستارىن جۇرگىزۋىنە قولداۋ كورسەتىلىپ وتىرعانىن, ولاردىڭ جۇمىس ىستەۋى مەن دەمالۋى ءۇشىن ارنايى شاتىرلار تىگىلگەنىن, قولداناتىن قۇرال-سايماندارىن جاڭعىرتۋ ءىسى قولعا الىنعانىن ايتادى. سونداي-اق ۋنيۆەرسيتەتتە دالالىق تاجىريبەگە بولىنەتىن ساعاتتار سانى قايتا قاراستىرىلماق. ال تاريح-ارحەولوگيا ماماندىعىن بىتىرگەن تۇلەكتەردىڭ ءارى قاراي ءبىلىمىن ماگيستراتۋرادا جالعاستىرۋىنا جول اشىق.
«ستۋدەنتتەر وزدەرى جۇرگىزگەن قازبا جۇمىستارىنىڭ نەگىزىندە ءتۇرلى عىلىمي سيپاتتاعى ماتەريالدار جازىپ, جاريالاپ ءجۇر. جوعارى وقۋ ورنىندا مامانداندىرىلعان ارحەولوگيالىق زەرتحانا اشۋدىڭ قاجەتتىلىگى وسىندا. ويتكەنى عىلىمي جۇمىستاردى سۇزگىدەن وتكىزۋ جاس زەرتتەۋشىلەردىڭ زەرتتەۋ اياسىن كەڭەيتە تۇسەدى. بۇل ستۋدەنتتەردى عىلىمي-ارحەولوگيالىق تالداۋ جاساۋعا دا قۇلشىندىرادى. ياعني, اتالعان جوبالار مەملەكەت باسشىسىنىڭ «رۋحاني جاڭعىرۋ» باعدارلاماسىنداعى «تۋعان جەر» باعىتىن بايىپتى تۇردە ورىنداۋدىڭ كورىنىسى بولماق», دەيدى ب.ەردەمبەكوۆ.
تەمىر قۇسايىن,
«ەگەمەن قازاقستان»
اقتوبە وبلىسى
