ەلەنا 1999 جىلدىڭ 17-ماۋسىمىندا ماسكەۋدە تۋعان. بەس جاسىنان بەرى سپورتتىڭ وسى تۇرىنە دەن قويعان ول ءوز قۇربىلارى اراسىندا بىرقاتار تۋرنيرلەردە جاقسى ناتيجە كورسەتىپ, ءتۇرلى جارىستاردا جۇلدەلى ورىنداردى يەلەندى. جاسوسپىرىمدەر اراسىنداعى «ۇلكەن دۋلىعا» ساناتىنداعى تۋرنيرلەرگە قاتىسىپ, 2017 جىلى مەلبۋرندەگى اۆستراليانىڭ اشىق بىرىنشىلىگى مەن پاريجدەگى «رولان گارروستىڭ» جارتىلاي فينالىنا دەيىن جەتتى. سونىمەن قاتار, 18 جاسقا دەيىنگى ەۋروپا بىرىنشىلىگىنىڭ كوماندالىق سايىسىندا رىباكينا باس جۇلدەنى ولجالاعان.
ايەلدەر اراسىنداعى جارىستاردا دا ەلەنا رىباكينا ءوزىن جاقسى قىرىنان كورسەتۋدە. اتاپ ايتساق, 2015-2017 جىلدار ارالىعىندا ول انتاليا, حەلسينكي جانە فەرگانادا ۇيىمداستىرىلعان تۋرنيرلەردىڭ فينالدىق سايىسىندا ونەر كورسەتتى. قازىرگى كەزدە 19 جاستاعى ويىنشى WTA رەيتينگىندە 191-ورىندى يەلەنۋدە.
عالىم سۇلەيمەن,
«ەگەمەن قازاقستان»
