قور جەتەكشىلىگى جۇرتشىلىقتىڭ بۇل شاراعا دەگەن قىزىعۋشىلىن ەسكەرە وتىرىپ, اشىق ەسىك كۇنىن ءداستۇرلى شاراعا اينالدىرۋدى شەشىپ وتىر. ءبىر جارىم جىل ىشىندە اشىق ەسىك كۇنىنە 20 مىڭنان استام ادام قاتىستى. بۇل جولى قور قىزمەتكەرلەرى شاراعا قاتىسۋشىلاردى زەينەتاقى جارنالارىنىڭ تۇرلەرىمەن جانە جەكە زەينەتاقى شوتىنىڭ جاي-كۇيى تۋرالى اقپارات الۋ ادىستەرىمەن تانىستىردى.
قازىرگى تاڭدا قازاقستاندا زەينەتاقى جارنالارىنىڭ 3 ءتۇرى بار. مىندەتتى زەينەتاقى جارنالارى ازاماتتاردىڭ, مىندەتتى كاسىبي زەينەتاقى جارنالارى جۇمىس بەرۋشىلەر تاراپىنان زياندى جاعدايدا جۇمىس ىستەيتىن جۇمىسكەرلەردىڭ ەسەبىنە اۋدارىلسا, ءۇشىنشى- ەرىكتى زەينەتاقى تۇرلەرى ءوزىنىڭ زەينەت جاسىن جوسپارلاپ, قارتتىق شاقتاعى قاجەتتىلىكتەرىنە قاراجات جيناۋعا نيەتتى ازاماتتارعا ارنالعان.
سالىمشىلار ءۇشىن وزدەرىنىڭ جەكە زەينەتاقى شوتتارىنىڭ جاي-كۇيى تۋرالى ءبىلىپ وتىرۋ دا ماڭىزدى. بۇگىندە بۇل تۋرالى ءبىلۋ ءۇشىن قور كەڭسەسىنە بارۋ نەمەسە ءداستۇرلى پوشتا بايلانىسىمەن پايدالانۋ مىندەتتى ەمەس. بجزق-دا كوپتەگەن قىزمەت تۇرلەرىن ەلەكتروندىق سەرۆيستەر ارقىلى الۋعا بولادى. بۇل باعىتتا جاسالعان العاشقى قادام ەلەكتروندىق پوشتا بولسا, قازىر بجزق سالىمشىلارى مەن الۋشىلارى- www.enpf.kz سايتى جەكە كابينەت اشۋىنا بولادى نەمەسە «e-mail-گە جزش-دان ءۇزىندى –كوشىرمە الۋ» قىزمەتىمەن; Android, iOS (iPhone, iPad) وپەراتسيالىق جۇيەلەرىنە ارنالعان ENPF ءموبيلدى قوسىمشاسىمەن پايدالانا الادى. ال «تسيفرلى قازاقستان» ۇلتتىق باعدارلاماسى ەلەكتروندىق قىزمەت مۇمكىندىكتەرىن كەڭەيتە ءتۇستى. EGOV.KZ ەلەكتروندىق ۇكىمەتىنىڭ پورتالى ارقىلى دا قور قىزمەتتەرىن قولدانۋعا بولادى.
اشىق ەسىك كۇنى تۋرالى پىكىرىمەن شاراعا زەينەتاقى شوتىنىڭ جاي-كۇيىن بىلگىسى كەلگەن اجەسىن اكەلگەن نۇرلان ەسىمدى جىگىت: «زەينەتاقى قورىنىڭ جۇمىسىن مەن ەسكىشە تۇسىنەتىنمىن. ال بۇگىن مۇندا زاماناۋي تەحنولوگيالار جان-جاقتى ەنگىزىلگەنىن كورىپ, تاڭدانىپ قالدىم. ەندى اجەمە ولاردى قولدانۋعا كومەكتەسەمىن. ۇيدە ءشاي ءىشىپ وتىرىپ-اق قىزمەت الاتىن بولادى».
ايداربەك ەسىمدى تاعى ءبىر قاتىسۋشى جاۋاپكەرشىلىگى شەكتەۋلى سەرىكتەستىكتە قىزمەت ەتەدى ەكەن. «مەن زەينەتاقى شوتىم تۋرالى اقپاراتتى ەلەكتروندىق پوشتا ارقىلى الىپ وتىرامىن. سوڭعى ءۇزىندى-كوشىرمە كەلگەندە, جۇمىس بەرۋشى جارنامدى ۋاقىتىلى اۋدارماعانىن, بىراق بۇنى بىزدەن جاسىرعانىن ءتۇسىندىم. بۇكىل مەكەمەدەگى جاعادي وسىنداي بولىپ شىقتى. ءبىزدىڭ تالابىمىزدان كەيىن جارنا اۋدارىلدى. ەندى مەن قور سايتىندا جەكە كابينەت اشىپ, جاعدايدى ءاردايىم قاداعالاپ وتىرماقپىن. باسقالارعا دا وسىنداي كەڭەس بەرەم. ينتەرنەت ارقىلى قىزمەت الۋدىڭ ەش قيىندىعى جوق, ءارى ىڭعايلى».
2017 جىلدىڭ قورىتىندىسى بويىنشا بجزق وپەراتسيالارىنىڭ 52 پايىزى ەلەكتروندىق ادىسپەن كورسەتىلگەن. قوردىڭ كورپوراتيۆتىك ستراتەگياسىنا ساي, 2021 جىلى بۇل كورسەتكىشتى 60 پايىزعا جەتكىزۋ كوزدەلگەن.
دايىنداعان ايناش ەسالي,
«ەگەمەن قازاقستان»
الماتى
